港鐵適合用移動區塊信號系統（Moving Block System）嗎？

全球鐵路信號有好多種，「鐵路2.0」其中一個項目就係將港鐵市區三線用咗40年的固定區塊信號系統（Fix Block System)的距離距間型式（Distance-To-Go）轉用移動區塊信號系統（Moving Block System）；咁大工程，到底運作咗40年的市區線係咪適合改用新系統呢？

新系統並唔係Upgrade

港鐵一直講呢個叫「升級」，但作為一個工程師（唔係鐵路工程師），我並唔認為今次叫升級。升級的意思係舊的軟件硬件大部分可以共容互通，增加配件使效能提升；但港鐵今次「系統升級」基本上係除咗條路軌外換晒所有野。情況有如用開Windows 8轉用Windows 10叫升級，但港鐵情況係Windows 8轉用MacOSX，咁樣叫做換機呀。

固定區塊系統

如果你玩過《電車Go!Go!Go!》，大概就會了解乜野叫做固定區塊；路軌沿途有信號燈，指示列車停止或行駛，確保路軌上每段區塊只有一列列車，好多時會依靠路軌上的感應器，以區域電腦回報列車位置。相比於移動區塊系列，路軌會因為指示燈的設計問題所以用得無咁盡，列車的間距一定比較大，所以班次無可能太密。（不過港鐵用咗40年都keep到2分鐘一班的服務）

移動區塊系統

用揸車黎比喻移動區塊就揸車要保持兩秒距離，路軌上唔需要任何指示燈，所有列車不斷傳送位置給區域電腦，由電腦指示列車行駛或停止。由於移動區塊更加依賴中央電腦，所以自動駕駛、防撞感應更加重要。（車長變得不重要了，所以港鐵做車長其實好悶）

移動區塊系統安全嗎？

只要軟體程式編輯正確，其實移動區塊系統都十分安全。世界上都有不少鐵路用緊移動區塊系統，如港鐵的西鐵線、馬鞍山線、倫敦Underground 的Victory Lines, Jubilee Lines、新加坡MRT的North South Lines, North East Line等等，其實除咗今次荃灣線的撞車，移動區塊系統並無其他重大嚴重事故。

咁點解會撞車？

首先，撞車地點係一個交叉路軌，兩邊路軌都可進出兩邊月台，如果使用固定區塊系統，交叉路軌必定係一個獨立區塊，列車定要等交叉路軌上的列車完全駛出，信號燈轉埋先可以駛過。若使用移動區塊系統，情況就有如車輛係無交通燈的情況下過十字路口一樣，唔係話一定會撞車，不過要顧及的野多好多，電腦要計算複雜，風險自然高。

市區線的移動區塊系統用Wi-Fi

由於市區線已經使用近40年，好多硬件都未必能好好配合使用，例如無縫路軌本來係最好的傳送信號方式，免卻信號以無綫傳播有所遺失，但港鐵無可能重鋪整條荃灣線的路軌，所以列車同區域電腦之間的信號傳送只係靠Wi-Fi。雖然港鐵聲稱為免Wi-Fi信號受到干擾，系統保安設計係接近國防級別；不過世界有太多干擾無線信號的方法，萬一列車有一刻未能與青衣車務控制中心交換信息，意外仍有機會發生。

現時意外的原因未有清楚公佈，係電腦計算有誤？信號傳送問題？還是有其他未知的問題尚未清楚，為求加密班次而重啟移動區塊系統實在危險。