【深水埗美食攻略 — 全部唔洗100蚊落樓 — 「一份廿二！」】 (一)

正所謂，辛苦揾嚟志在食。畀幾百蚊，要食一餐好食嘅嘢唔係咁難，但同時間啲嘢賣得貴一貴，亦唔代表一間餐廳啲嘢一定好食，只係越貴中伏機率比較低。

所以呢，喺一啲平民餐廳搵到一啲美食，會為你帶嚟一種好似尋寶嘅滿足感。嚟緊為大家介紹幾間深水埗必食餐廳(有人睇先再寫)。首先打頭陣就係新香園 (堅記)。

一提起新香園(堅記)，先唔係講食乜，首先第一印象係究竟呢間嘢係叫「新香園」、定「堅記」、定係「新香園 (堅記)」？個名有啲似中環著名大排檔「勝香園」、中環著名茶餐廳「蘭芳園」，而喺香港叫「堅記」嘅餐廳亦有唔少。啲名好鬼似，正如香港地周街都有「強記」。你喺街到叫一聲「阿強」，可能幾十個人應你都未定。Anyway，佢鐘意叫乜名就乜名，你識路嚟就OK。

呢間餐廳，以前開24小時，而家因為疫情關係開到下午8點就收鋪，相信疫情好番之後會轉番24小時。

好，講番食。呢間嘢，講食嘅，唯一一樣一定唔會中伏嘅係「蛋牛治」，起碼我食過咁多次水準都保持到，咁我都知好多人都知呢間餐廳，但總有人唔知。佢啲牛肉係用鮮牛肉同埋雞蛋煎成奄列狀，好似一塊牛肉蛋餅咁樣夾起兩片方包，再搽少少牛油，一開二就完成。

一份蛋牛治唔烘底二十一蚊，烘底二十二蚊。嚟呢到食蛋牛治唔係烘底不如唔好食。呢到烘底唔係求其烘，係真係烘到卜卜脆。

有個阿姐知道你班友仔嚟親都係食蛋牛治烘底居多，索性你地落完Order之後，佢即刻虎軀一震，向住水吧方向大叫一聲：「一份廿二！」師傅聽到Order後，一兩分鐘就整好一份熱辣辣嘅蛋牛治出嚟。點解係「廿二」？因為成間餐廳得蛋牛治烘底係賣廿二蚊，沒有其二、沒有其三。正所謂：「一夜夫妻百二蚊，一份蛋牛治，就廿二蚊咋！」

食完一份蛋牛治，想試其他嘢，唔知食咩好咁。諗住嚟開呢間嘢，諗住試埋食埋其他嘢(好似不枉此行)，好似食其他餐廳咁，你有咁嘅想法可能係中伏嘅開端。其他嘢普普通通。你真係想試其他嘢嘅，可以試下豬手麵，$26蚊一大碗，中伏成本低。

咁呢，呢到都有粥、雲吞麵嗰啲，但我就唔會試囉，呢啲都唔係佢專長。你鐘意可以試。我唔阻止你。

正如你唔會叫一個CFO去掃地，CFO可以去掃地，但佢嘅時薪唔係六十蚊，可能係六千蚊，但佢唔會掃地掃得比一個日日掃開地嘅阿姐掃得乾淨。Finding the right person to do his/her work will save you a lot of money。

一間餐廳有一樣專長、拿手招牌令到你會不斷咁做回頭客已經好厲害。正如澳牛咁樣，佢啲炒滑蛋冇得輸，之但係佢嘅蛋牛治係用咸牛肉。本人唔係唔喜歡食加工食物，我鐘意食餐肉，但就最憎食咸牛肉。點解你澳牛唔可以用滑牛整蛋牛治，而係偏用咸牛肉整呢？

除咗蛋牛治，鐘意就叫多杯奶茶，奶茶都唔錯嘅。有個專飲開奶茶走糖嘅同事同我講，啲奶茶幾好飲。

作為一個專業食家，你下次去食，可以整下同阿姐講：「阿姐，一份廿二多油，再嚟杯熱奶茶，唔該！」我自己鐘意食多牛油，所以要多牛油(我知，佢係馬芝蓮(人造牛油)唔係真係動物牛油)，but who cares，好味就得。

講開「新香園 (堅記)」都要提下「吱吱鼠」伍文生哥哥。維基資料如下：「伍文生目前已退出娛樂圈，於岳父的深水埗新香園堅記茶餐廳學藝，2014年則在大角咀開設蛋牛治外賣專門店，創立「SHY Xpress」，至2016年時已有3間分店。」

文生哥哥開嘅SHY Xpress，除咗售賣新香園 (堅記)招牌蛋牛治之外，亦有賣蛋包飯、其他香口小食之類，高峰時期有幾間分店，啱啱睇Openrice佢得番觀塘分店。我有食過佢以前喺葵芳和石門嘅分店。蛋牛治嚟講，佢係就係做到深水埗味道，但就做唔到深水埗價錢囉，一份賣30幾蚊。蛋包飯都好食，但就賣5、60蚊一份，又唔係貴嘅，但係都做唔住。

所以話呢，廿二蚊一份蛋牛治，夫復何求！

衛生我畀2.5分，如果太Care衛生可以選擇唔幫襯，呢到衛生都係一般茶餐廳Greasy Spoon之類咁樣。價錢已反映一切。

食物：4.5

服務：3

衛生：2.5

價錢：5

地址：深水埗桂林街38號A地下

推介：蛋牛治(一定要烘底)、奶茶

中伏位：蛋牛治以外所有食物