［深夜慎入］避疫要食朱古力
講笑咩，朱古力幾時都要食
講真從來冇「抗疫」過，我只係「避疫」。避開多人密集地方、避開封閉地方、少啲堂食多啲外賣、唔搭地鐵（其實一向唔搭），避開所有高危嘅行為。咁的確喺屋企WFH嘅時間多咗，一路做嘢有咩好過食啲口立濕？其中一種我工作必備嘅，就係朱古力。朱古力同齋啡，冇咗佢哋我會死。當初食朱古力純粹補充血糖，因為天生貧血，又用腦用得多。不過我通常食85%以上兼無糖朱古力，補咩糖吖，藉口嚟啫。
除咗85%以上Dark，我嘅口味係少甜、朱古力入面唔要有餅乾（所以我唔食KITKAT），可以有果仁同乾果，有酒一流，多奶朱古力麻麻哋。以下推介我個人最近比較鍾意食嘅朱古力，如果你嘅口味同我差唔多嘅話大家交流吓，推介啲畀我。
朱古力我個人分為兩大類：日本朱古力、歐洲朱古力，其他地區出產嘅今次唔講。
日本朱古力
日本出嘅朱古力最大特點：花樣多多。
除咗周不時出新口味，又鍾意玩期間限定味道，又或者重新包裝原有產品再推出市面。明知道日本朱古力係玩花臣，但係見到新口味又會忍唔住買嚟試吓。伏都係最多伏一次，最多俾朱古力廠CAP你嗰一次就算。喺香港可以買到嘅日本朱古力牌子，不外乎係森永、明治、不二家嗰啲，去到日本就可以喺小店買手工朱古力（又講呢啲）。多得哈日嘅香港人，香港大量零食店、超級市場、小店都可以買到出產嘅日本朱古力，解吓思鄉嘅愁緒。
DARS Dark Milk
森永旗下嘅DARS價錢親民，基本口味大約120YEN左右，經典盒裝朱古力一盒12粒，我買親都係黑朱，基本味道我用正常形容。DARS好嘅地方係每粒大細啱啱好，放入口等佢融嗰吓又幾滑，就算咬都FEEL到嗰種滑嘅口感。睇埋佢個標籤，一粒大約21卡路里左右，不過唔好以為唔肥而狂食。通常一盒DARS我食幾日至一星期先至食完。今次特登影呢個期間限定包裝盒，係DARS同日本４個音樂單位Cross-Overr嘅包裝。買朱古力可以抽飛去LIVE。藍色盒裝Dark Milk呢位音樂人和ぬか一向出聲唔出樣，日本近年多咗好多呢種獨立音樂人，幾時香港都可以唔理音樂人嘅樣，真係做音樂呢？
Dars 開心果味／脆脆開心果味
繼續講吓DARS嘅特別味道。DARS癲起上嚟季季都推出期間限定新口味，唔係住喺日本都追唔切。好在呢種開心果味喺香港買得到。個人比較種意冇脆脆嗰種，真係食到朱古力同開心果味，反而脆脆多多，唔知自己食緊乜。另外，包裝盒熨金做乜鳩，平多兩蚊畀我仲實際。特別口味賣繄216YEN，都係平歐美朱古力成條街。
明治Melty Kissくちどけブランディ&オレンジピール（白蘭地加橙皮）
明治出嘅Melty Kiss系列最正嘅地方，真係滑到不得了，入口慢慢融化嘅口感太美好。佢出嘅朱古力，一有新口味都會買嚟試吓（雖然都係鍾意佢嘅黑朱古力）。呢款又係期間限定，盒面都寫咗含3.1%酒，寫住揸車唔好食。講笑？
一盒得４條咁大把，同價錢親民嘅DARS相比，真係貴太多。一條朱古力係82卡路里，嘩。橙皮切粒撈喺加咗白蘭地嘅朱古力漿，融喺口嗰陣可以咬吓咁。白蘭地加橙皮係個幾好嘅配搭，令朱古力味香咗好多。可惜真係貴咗啲，大約400YEN一盒，即係100YEN一條左右。
Fujiya Koshu Fuefuki demi sec Wine Chocolate（不二家甲州白酒朱古力）
除咗不二家同甲州，呢款產品我完全唔識讀。外層係40%朱古力，夾心係白酒白朱古力，香味幾好，入口有白酒味，但係唔夠持久，如果鍾意酒心朱古力嘅人可能覺得唔夠喉，呢種扁平朱古力片，我通常會啪開一塊慢慢分幾次食，等佢喺個口融。食第二塊會覺得隻酒好在唔係太勁，反而用嚟配黑啡幾唔錯。一塊朱古力29卡路里。
白酒係山梨縣出產，日本人支持番本地洋酒好合理，原本山梨縣就係日本水果王國，出口量係日本第一，而且甲州葡萄都好出名。盒面注明係使用O.I.V（國際葡萄與葡萄酒組織）已登記嘅白酒，我會比較Respect去傾合作呢個動作多啲。食朱古力嘅同時，了解當地嘅一啲特色都係個另類文化認知。
大一製菓くちどけカカオショコラ （融喺口朱古力）
大一製菓，即係日本DAISO供應商之一。你冇睇錯，呢包朱古力喺DAISO 100YEN店買嘅，連我都覺得好驚喜，入面好似有成十幾廿粒（冇特別數過）。睇個賣相就知係同明治Melty Kiss系列一樣，都係Sell融喺口嘅口感。食落口又真係意外地好味，融得冇Melty Kiss咁快，但係朱古力都好滑，而且外面有朱古力粉，拎上手都唔會黐𥹉𥹉。香港唔係間間Living Plaza都有得賣，見到好入多兩包。上網睇日本網民嘅反應都一致好評，有人話拍得住Godiva嘅高級朱古力，咁Godiva食包裝㗎嘛。
７仔ｘHershey’s 雙層忌廉泡芙
又估你唔到，7仔竟然傾到個咁嘅合作。半夜三間落7仔見到個咁嘅泡芙，都咪話唔邪惡。泡芙皮唔得，唔食可以搣走佢，淨食忌廉。個忌廉真心唔差，朱古力味都夠，而且口感都幾輕盈。雖然整體同你喺其他地方食倒嘅忌廉泡芙係有一段距離，但朱古力控不妨一試。食完掉咗個袋，冇睇標籤，好嘢冇煩惱。
有樂製菓ブラックサンダーまっちゃり雷神（抺茶雷神）／フルグラｘ雷神（麥果Bar）
呢種雷神朱古力喺香港紅過一時，又好快冇人理。我就係再之前由去咗日本嘅少女漫畫家愛芷老師推介畀我食嘅。
本身我唔鍾意朱古力入面有太多唔關事嘅材料（尤其餅乾），好在雷神後來出咗好多加果仁嘅口味，當堂啱食咗。今次我影相呢兩款，係綠茶味，同埋同麥果產品Cross-Over嘅口味。綠茶味係一貫脆脆口感，所以我麻麻地，但係麥果Bar反而幾好，食落有莓果香同埋燕麥，好啱做嘢好趕嗰陣啪。而且自從佢推出咗mini bar，細條咗又冇咁漏，冇咁大條，唔使夾硬每次隊晒大大條咁邪惡。
Black Thunder真係日本朱古力界奇蹟。1994年推出嗰陣完全冇人理，1995年仲因為賣得差而停產。1996年，喺九州局部地區推出，慢慢由零開始，就咁捱咗好多年，由九州推到去關西，自從入咗便利店之後，開始受到學生哥歡迎。
中間試過同聲優神谷浩史×小野大輔嘅電台節目「DearGirl～Stories～」Cross-Over出過鹽味，對我呢種聲優迷嚟講，簡直係夢幻口味。可惜香港當然係買唔到。
MUJI 柿の種チョコ
我鍾意食朱古力，又鍾意食杮種米菓，但係兩種撈埋一齊，唔得。完。頂吖，仲買咗兩包。
我見雷神出過有杮種口味，日本網民又覺得OK，好在香港冇，如果唔係我都會買嚟伏吓自己。
歐洲朱古力
我個人對歐洲朱古力嘅印象，停留喺好難食嘅金莎，同埋啲人由美國買番嚟啲手信嗰種難食朱古力。總之我細細個就覺得鬼佬朱古力唔好食，而特別鍾情日本仔朱古力（瑞士三角朱古力已經係細細個食過當中，算係好食嗰種）。但係，我錯了，只係我身邊啲親朋戚友冇食朱古力嘅品味。（拎住金莎嚟拜年嘅話我唔會開門，講真嘅）
歐洲朱古力係好好食㗎，尤其我大個咗鍾意食黑朱古力，就更加覺得歐洲嘅黑朱古力贏日本幾條街，但係日本仔朱古力咁多花臣，又真係好難割捨。
而家喺香港買朱古力真係好方便，求其一間大啲嘅超級市場都可以買到嚟自唔同國家嘅牌子同口味。歐美糖果店亦都越開越多，本身去開中環擺花街有間美國糖果店，最近喺灣仔利東街都開咗分店，開心死。
我食歐洲朱古力嘅口味好寡，只會食黑朱古力、薄荷朱古力、鹽味朱古力。喺美國糖果店買過辣椒朱古力，當係獵奇口味咁食係幾新奇，但係之後唔會再買。以下集中講鹽味朱古力。
Lindt Sea Salt Dark Chocolate
德國出產嘅Lindt，喺間間超級市場都買得到，都有好多唔同口味。佢嘅鹽味朱古力為我打開咗真理之門，之後一見到鹽味朱古力就會忍唔住買嚟試。
食過好多種鹽味朱古力，都覺得Lindt呢款最啱我口味，黑朱古力夠Bitter，鹽都夠多，兩種味道一齊喺個口入面感受好難形容，總之係少少鹹，多多朱咁。
Green & Black’s Dark Chocolate Sea Salt
呢種係嚟自倫敦朱古力廠嘅朱古力，佢好夠黑，但係唔夠鹽，同Lindt相比更加少鹹，開咗之後放入雪櫃，雪凍咗食更加食到純黑朱古力味道好醇。可惜卡路里太高，每片朱古力我都啪開分幾次食好耐，感覺冇咁邪惡。呢個牌子可以試佢純黑朱古力，海鹽味就完全滿足唔到我喇。
Food Nation Dark Chocolate Mixed with Himalayan Salt
比利時黑朱，佢嘅朱古力味濃，岩鹽都夠鹹，對鹹朱愛好者嚟講簡直完美。可惜嘅係唔係間間百佳都有（好似得百佳有得賣），仲要唔係成日有。
Simply Chocolate — SALTY FRED cholocate bar
早幾日見到百佳有呢種係丹麥嘅手工朱古力。極！度！邪！惡！我一開就唔覺唔覺食咗半條！平時我一日食一塊㗎咋！有杏仁再加鹽味真係無敵！呢種朱古力唔硬，明明係條朱古力Bar好厚，但係因為容易咬，好適合放入口咬咬咬，同日本朱古力滑溜口感嘅食法好唔同，所以更加容易一塊接一塊啪落口，就係咁我就啪咗半條。下次都係唔買佢喇…
講咗咁多朱古力，以上嘅份量我大約食三至四個月左右。朱古力絕對係人類食物史上最邪惡發現之一。學Baby John話齋，朱古力嘅黛安芬太神奇了。食朱古力嘅習慣，都反映嗰個人嘅性格。我媽鍾意食白朱古力（唔會苦），我表姐開一排朱古力要食晒，我同我妹只食黑朱。
人類喺現代文明社會可以咁容易就買到朱古力，每次食一粒都會感謝朱古力工人嘅努力。
講講吓又想睇多次《朱古力獎門人》，Johnny Depp嘅Willy Wonka真係太迷人。電影比原著多咗更多奇幻色彩，但係同樣令人反思食物背後嘅意義。
My Medium Record：(Update中) https://readmedium.com/my-medium-record-e1f290f9c470
順手睇埋~
個人BLOGss~ ☆伊死的漫畫特區 （講漫畫、讚漫畫） ★嚟Plurk吹水 ☆開咗MeWe
