步走南美 1003 Walks in South America 1003
Day 2 埃爾卡拉法特 El Calafate
#觀光小鎮 #莫雷諾冰川
El Calafate 係巴塔哥尼亞(Patagonia) 一部份同智利邊境好近，有恆常巴士去Puerto Natales，如果唔係經智利轉飛去Puerto Natales，去百內嘅遊客都會取道El Calafate 順便遊覽，同周邊嘅El Chalten 同再南邊嘅烏蘇懷亞(Ushuaia)都係出名嘅觀光小鎮。呢個阿根廷南端嘅小鎮因為一個冰川而發大財，一搜尋 El calafate 嘅關鍵字就係冰川冰川冰川。
冰川國家公園(Los Glaciares National Park)位於阿根廷的Austral Andes地區，聖克魯斯(Santa Cruz)西南部，與智利接壤。1981年被聯合國教科文組織宣佈為「世界遺產」。國家公園內最知名嘅冰川就係 莫雷諾冰川(Glaciar Perito Moreno)，係世上其中一個最大型既冰川，其冰原係世界第三大嘅淡水儲備。由於同呢個冰川只有80公里距離，每年都好多遊客冒名而來，旅遊業近十幾年發展迅速令當地由原本幾千人變成一個幾萬人嘅城市。
我哋由Sao Paulo 經 Buenos Aires 半夜轉飛 El Calafate，差唔多天光就落機，隨即感受到當地同聖保羅嘅溫差，5月嘅El Calafate 平均氣溫得1°至8°。機場一眼望晒一入去個位就係行李帶，擰個頭對面就有齊晒租車公司/的士/接送小巴嘅櫃位，只要排埋去的士櫃位講個目的地會講收幾多錢。 為遷就去第二朝一早搭車去Puerto Natales，我哋揀咗住巴士總站附近嘅民宿。三個人未計行李費shuttle 價錢(400ARS/人)都同的士差唔多，所以的士直出總站。
到埗趁朋友去洗手間嘅空檔問下車站入面嘅旅行社有無車去冰川，點知叔叔話即有，我哋即刻擺低個背囊係佢個儲物房就跳上的士。 以為坐的士直奔咁霸氣，原來係坐的士去追啱啱出車嘅團友，就咁誤打誤撞趕到早一班車，換坐呢架小巴我哋就正式向冰川出發~
冰川國家公園離 El Calafate 市中心大約八十公里，開車繞阿根廷湖行個零鐘就到，去到公園門口，要齊齊落車各自出示護照買門券。
阿根廷當地貨幣貶值,通貨澎漲得好犀利，價格好浮動，我哋去個時2019年5月公園門票700ARS/人，第二日憑首日門票有半價。 打文時查下見到2019年6月已經加到800ARS，更難想係2017 年只要330 ARS！所以出發前記得參考最新嘅官方資料。
冰川國家公園嘅開放時間有分季節：夏季(9月到4月)由8am 至6pm，冬季5月至8月由9am 至4pm。每年最旺最多人係12月至2月，9月尾/10月中或者4月中/5月頭去會無咁多人，除咗平啲仲行得舒服啲。
去莫雷諾冰川，唔少人會揀上冰川行嘅團，呢啲團有兩種：Mini Trekking(大約HKD$1000，係冰川行個半鐘，全程預十個鐘)，Big Ice(大約HKD$2000，係冰川上行五個鐘，全程預十二個鐘) ，我都想去行但可惜呢啲活動全部都係夏天限定。
全年都有嘅係坐船睇冰川，遊湖仲會去埋其他阿根廷湖嘅冰川，跟團要預一整日，落機太趕所以唔敢訂，都係輕鬆搭車去行下步道。就啱時間可以去搭船近啲咁望莫雷諾冰川(10:00，11:30同14:00 都有班次)，可以係旅客中心或碼頭買飛。
莫雷諾冰川係Patagonia最後三個無後退嘅冰川，安第斯山脈嘅積雪係重力作用下擠壓成冰，沿斜坡向下滑形成冰川一直延伸到阿根廷湖 (Lago Argentino)。 莫雷諾冰川冰舌闊5公里，平均高於湖面74米，總冰深度為170米，當慢慢推前掂到陸地就會好似一條橋咁將阿根廷湖一分為二，呢條冰橋每隔幾年就會受唔住重量壓力成條崩塌。對上一次呢個難得一見嘅奇景係2016年，每次就冧都特別多旅客專登去希望遇到!
步道全長4公里，有唔同觀景臺同條路線等遊客可以用唔同角度去睇莫雷諾冰川，有唔少位置都可以好近咁望到冰川。行個陣會時不時會聽到好似行雷咁嘅巨晌，就係冰塌陷跌落阿根廷湖嘅聲。雖然未必好大舊，但睇住佢冧個感覺好似推銀機推冧啲銀係幾有趣。晴天同上晝會比較易見到崩塌，記得公園入面唔準用航拍，同唔準食煙。
我哋落車個陣大約11點幾12點，司機話會有四個鐘自由活動時間，行到去第一個觀景臺，冰川係眼前一望無盡嗰種壯闊真係好震憾。見電話訊號算收得唔錯即刻打個video call 返屋企(阿根廷慢香港11個鐘)等佢哋臨瞓前隔個mon 睇下個冰川。行多陣就上返去係餐廳食個午餐，再繼續邊行邊影相坐完通宵機都可以差唔多行晒咁多條步道，大約四點就上車返市中心。
係車站攞返個袋就去民宿，沖個涼攤陣就出發去小鎮最旺嘅大街食飯。大街鋪頭基本上都係做遊客生意，有好多旅行社貼晒啲行程係玻璃，仲有紀念品店，就連賭場都有。我哋去咗間運動餐廳Pietro’s Cafe，叫咗阿根廷牛扒同一個燴牛尾，好味之餘估唔到咁大份抵食。雖然已經食到好飽，但都忍唔住再行返去之前路過嘅La Zorra Taproom 飲杯啤酒。
食飽返去又係執行李嘅時間，夜晚雖然凍咗好多但室內有暖氣都瞓得好舒服，聽朝一早坐車去智利Puerto Natales！
P.S 係El Calafate 如果想搭的士唔係就咁係街伸手截，路邊會有類似的士站頭，埋同佢講去邊，佢就會幫你搵車。