桌遊之夜 — Agricola 農家樂 — 土地問題又點會只係現代嘅問題呢？
原來我未寫過鼎鼎大名嘅 Agricola 農家樂。
Agricola (中譯：農家樂，不過我覺得譯做「農家苦」應該會貼切啲) 係 Uwe Rosenberg 2007 年嘅巨作，從獲獎同出再版嘅量嚟睇，話呢隻 game 係德式策略桌遊嘅經典真係一啲都唔過份。 2022 年仲出咗 15 周年記念版，而明明我唔太會再開呢隻 game，仍然都搞到我心郁郁想買番盒，大家就知個毒性有幾強啦。
講講隻 game 個 story 先。
故事背景係 17 世紀嘅歐洲農莊，玩家一開始會操控一對只有爛命兩條嘅農家夫婦，透過不斷伐木造磚、釣魚採果、開墾農田、收割播種、起屋裝修、生兒育女、馴養動物、宰羊殺牛、建爐做包等方法嚟改善生活，6 次收割後有最多「菜麥人豬牛羊屋田欄馬房」者勝。
好容易代入啦 right？
不過大部份玩家玩完第一次後都會有同一感覺：「what？要有菜麥人豬牛羊屋田欄廄？我連自己都未養掂喎！」
過程一啲都唔歡樂，唔好話要有田有地，剩係最次收割嗰陣要餵飽自己都唔係咁容易，係所以我話應該譯做「農家苦」先比較貼切。
「農家樂」同人生一樣，表面歡樂嘅背後係眾生皆苦，揀 3 個遊戲嘅人生啟示同大家開心 share 吓。
放心你絕對唔係零，因為你係負咯
Agricola 嘅計分法可謂非常討厭，以 end game 蔬菜計分為例：1 粒蔬菜 1 分，4 粒或以上 4 分，不過如果你一粒都無，sorry，你係 -1 分的！
咁聰明的大家就馬上會明白 2 件事：
- 因為一開始乜都無，只有爛命 2 條，雖然 1 條命值 3 分，不過由於缺嘅嘢實在太多 (包括 unused space 都係扣分的)，所以一開始你唔需要覺得自己係「零」，因為你係比「零」更差嘅「負」，呢個就係你嘅人生了。
- 「有」比「無」係遠遠重要過「有」同「多」，只要你係「有」就已經足夠由 -1 分跳上 1 分，來回係 2 分差距！又用「羊」計分為例，0 隻係 -1 分，1 隻係 1 分，3 隻 sorry 都係 1 分！所以話「五個多不如十個有」，就係咁嘅意思。
番番嚟現實世界，我畀你又靚仔又有錢老婆又靚都無用，你有無小朋友？有無六呎二吋？你有無 PhD？你有無奧運金牌？人總無十全十美，你要扣分嘅，又點會搵唔到位入呢？
想生仔？你解決咗土地問題未？
人多好辦事，人多每回合 action 就會多，喺時間有限下當然更容易構建夢寐以求嘅農莊。
可惜喺呢隻遊戲入面，你並唔係有一對夫婦就等於生得出仔，生仔前首先要解決土地問題，即係大家要先擴建房屋，要擴建房屋大家要有木材同蘆葦，而要有木材同蘆葦，大家就要再花時間分別採集。
咁咪採集咯，有咩問題？問題就大咯。
首先木材同蘆葦都係唔食得的，但係你啲人仔每回合都要食飯，而佢哋係唔餓得的，當解決 3 餐都咁艱難之際，仲要抽時間準備生仔，都可謂 21 世界得閑死唔得閒生仔嘅香港人嘅寫照。
其次就係木材同蘆葦根本就唔夠大家所有人用，以 4 人遊戲為例，遊戲合共 14 個回合，每回合出產 6 條木，即係合共 84 條木。如果大家都想攞滿分生 3 個仔 + 起 4 個圍欄養動物，最少每人要用 27 條木，4 個人即係 108 條木，即係一定有人會因為資源不足生唔仔養唔到動物咯。
又由於大家都想生仔，到你採集夠足夠材料，個起屋嘅 slot 就好可能已經畀人霸咗。因為每回合起屋嘅 slot 只有一個，想優先起屋，就要喺上一個回合花一個行動「搶 starting」，即係你要放棄一個伐木採果嘅權利，嚟換取一個排頭位嘅機會，類似 21 世紀攞 no pay leave 去排隊咁咯。
都係嗰句，想生仔？你解決咗土地問題sss未？
想有錢剩，你有無資源增值令自己一個鐘搵人哋十個鐘嘅錢先？
要贏遊戲，就要喺 14 個回合有最多嘅「菜麥人豬牛羊屋田欄馬房」，不過遊戲本身就有一個超級矛盾嘅機制，就係人係要食飯的！
食飯有好多方法，可以烤羊、焗包、食菜，不過羊、麥、菜呢啲全部都係計分的，當你明明有好多隻羊可以 end game 計分，但只係你一食你自己辛辛苦苦養大嘅羊羔，你就無咗你應得嘅分數喇。
即係點解我明明個個月都辛勤搵錢，戶口都仲係零嘅呢？因為你要食飯，而食飯係要錢個咯！
咁啲羊食又死唔食又死，咁點呢？有一技之長，令自己一個鐘搵人哋十個鐘嘅錢，最好仲有份秘撈，做到剩係靠份秘撈都夠晒食咯，咁就正職每個月搵 5 萬就真係儲到 5 萬落戶口喇！
要有一技之長，當然要資源增值，仲要將自己啲技能連成一氣先得，例如經典組合之一就係 Occupation 用 Harpooner 加 Minor 用 Herring Pot 同 Canoe，一個家庭成員釣一次魚 (呢份絕對係秘撈) 解決全家全年所需絕對不是夢呀。
咁其他 family member 做乜？做正職咯，即係整多啲「菜麥人豬牛羊屋田欄馬房」，不過啲菜麥豬牛羊通通都係只擺不吃的，留番嚟 end game 計分咯。
如果大家個個搵五萬都使足五萬，就梗係無辦法退到休啦。
Agricola 農家樂 — 土地問題又點會只係現代嘅問題呢？
玩多幾次 Agricola，你就會發現呢個就係人生，問題總係層出不窮，時間永遠都唔夠，乜都未做到但係又係時候開飯，明明應該投資未來，但係只好繼續面對現實，解決咗下一餐先再算。
唔知係咪畀人鬧得多，之後 Uwe Rosenberg 嘅遊戲係遠遠無咁 harsh 的，以後續嘅 Caverna: The Cave Farmers (洞穴農夫) 為例，game mechanism 差唔多，係多咗啲打獵元素，最大分別就係日子就好愜意得多，好難餓得死，又無咁容易畀對手卡死，自然多啲條件去 self-realization，就算輸 game 都有少少成就感嘛。
不過我自己就鍾意 Agricola 多啲，人生就係咁艱難嘛！
今個月供咗樓 ／ 交咗租未？
—
Patreon 傳送門：
- 桌遊之夜 -Through The Ages 告訴大家論國家的強弱，軍事、生產、糧食、快樂、科技都只是手段而已
- 桌遊之夜 -攻殺只是手段，圍棋給我的 3 個領悟
- 桌遊之夜 — Dexit — 說話含糊也是人生生存之道
- 桌遊之夜 — Le Havre 港灣情濃 — 資本主義的三個黑暗現實
- 桌遊之夜 — 大富翁 Monopoly 給我的 3 個人生道理
—
關於華田： 兒時夢想做i-banker，結果做了bank worker，還要是retail那種。過去在各大小銀行不同部門流徙，叫人借錢、催人還錢、審批貸款、出股票app、出借錢app、出信用卡、廣告策劃、銷售管理、分行佈點、生物認證、電子排隊、機器學習、敏捷開發，到現在還未安定下來。不懂財經、不懂經濟，只想談一下「銀行」這回事。
2021 年開始 Medium 只會發佈部份文章，想知最新銀行 insider insight，就要訂閱我 Patreon(patreon.com/watin) 喇！
2021 年 8 月 Medium 再次改制，讀者可以選擇將一半既 Medium 會費撥繳至你喜歡既作者。如果你想喺 Medium 上面支持我，可以去以下呢條 link (watin.medium.com/membership)登記做會員哦！
華田銀行 Patreon: patreon.com/watin 華田銀行 FB: facebook.com/WatinResearch 華田銀行 IG: instagram.com/bank_of_watin/ 華田銀行 CTGoodJobs 專欄：resources.ctgoodjobs.hk/columnist/author/137/華田銀行