「有一種命，叫辛苦命」

美國籃球界有「大帝」勒邦占士(LeBron James)以33歲「高齡」由東岸轉戰西岸，足球界同樣有基斯坦奴朗拿度(C朗，Cristiano Ronaldo)33歲人跳出comfort zone、離開連續三年稱霸歐洲嘅皇家馬德里，加盟意大利嘅祖雲達斯。

上述兩位球星受聘於球會，同大家一樣係打工仔。佢哋付出嘅努力有目共睹，去到呢個歲數仍然繼續挑戰自己，亦係反映佢哋對自己要求有幾高。唔信嘅，你望下C朗喺曼聯嘅舊隊友、現年32歲嘅朗尼？佢去咗美國掘金，呀唔係，係踢波喇。

講到呢度，你會唔會以為，「老驥伏櫪，志在千里」？你有冇諗過，大帝同C朗都只係辛苦命代言人？

十個打工仔，九個呻辛苦。第十個唔係唔辛苦，只不過佢認咗命，接受咗自己本質上係賤骨頭，鍾意有自唔在、攞苦嚟辛。大帝同C朗從奮鬥中搵到滿足感(以及榮譽、金錢⋯⋯)，算係冇咁灰嘅例子。普羅打工仔捱騾仔，搵到嘅不過係三餐一宿，一旦自覺付出同收入不成正比，負面情緒投射出嚟，咪就係覺得返工辛苦，畀客鬧、畀老細針對、畀同事講是非⋯⋯任何大小事稍有唔順心，就係辛苦。好正常，人性嚟嘅。

咁第十個人發生咩事？打工界嘅C朗，係咩玩法？置記可以大膽同你講，我見過，我真係見過。喺我一位舊老闆嘅身上，我見到「職場C朗」。

畀少少描述大家：「職場C朗」年過半百，身型健碩(真係有muscle，唔係肥嗰隻)但唔高大，目光如炬，同佢握手你會知道咩叫「堅實」。「職場C朗」事業曾經風光過，亦曾經高處不勝寒而喺權力遊戲之中打敗仗，離開服務多年嘅公司，喺新公司做咗置記上司。

跟「職場C朗」做嘢，你會學到好多嘢，唔單止因為佢經驗好豐富，見多識廣，更重要嘅係佢身體力行話你知，嘢，係要點樣做嘅。無論前路嘅障礙係公司嘅「老屎忽」，抑或係唔同山頭嘅利害關係，舊老闆一於勇往直前。無論係涉及全公司嘅系統提升，抑或只係部門周年晚宴，舊老闆一律全力以赴。我舉個最經典嘅例子：公司聖誕搞Party，循例要每team人貢獻一個才藝表演娛賓。當其他部門本身已經忙到甩碌，只可以喺lunch hour柴娃娃度下唱咩歌或者表演咩諧趣劇嘅時候，我舊老闆動員全組人整道具、錄音樂同埋排走位，喺Party當日嘅表演自然Outstanding，in both good and bad ways。

不過十隻手指有長短，一個有要求、自信、堅毅嘅人，喺另一啲人嘅眼中，可以係攞嚟搞、自大、固執。而喺唔認同我呢位舊老闆嘅人眼中，所謂「職場C朗」美其名係希望喺工作上尋找滿足感，實際上只係希望繼續證明畀人睇佢喺職場上嘅價值，唔想淪為公司嘅寄生蟲。

Layman嘅講法，咪就係中年危機。男人嘅嘢，最忌畀人話「唔得」，咪要千方百計證明自己「仲得」囉。職場，正正係一個證明自己尚餘價值、尚有餘熱嘅好地方。證明自己本身並無問題，客觀嘅效果，係會啟迪到某啲同路人一齊逆流而上，以及影響到一啲非我族類嘅人，本來風平浪靜、優哉悠哉嘅日子。而呢兩類人嘅比例，應該係一比九。十個打工仔，九個呻辛苦丫嘛！叫咗你聽書架啦。

你想唔想知道阿舊老闆最後點樣？其實我知嘅都係有限，因為我比佢早離開公司，去咗另一啲地方發展。不過，過年過節，我都有Whatsapp同佢問候兩句。即使喺同一間公司，舊老闆仍然繼續東征西討，事無大小都親力親為。或者舊老闆呢一套喺“Work Smart”嘅新文化之下唔太受歡迎；或者佢嘅志向一直高企、同佢越來越渺小嘅職能差距越來越大；或者虎落平陽，佢再難接觸到其他大帝、C朗，等住迎接佢嘅，只係一個又一個甘於平淡嘅朗尼。

咁樣嘅命水，你話唔係辛苦，係咩？