【曼城周記】雜技聖誕派對
2022年｜周記 W49
周記，係記貝星人一周之事，包括大事，小事、有事、無事、瑣事、心事、無聊事。
水分充足，營養欠奉，例牌長文，敬請慢用。
- WFH先壞暖氣
- 病情依然反覆
- 公司聖誕Party
- 帶鬼佬見港男同鬼妹
- 初試曼城新景園這個冬天不太冷
今日 3 度，凍嘅。
間中清晨開車的話，車窗玻璃係結晒冰，要噴融冰液先得，但如果晏少少出車，8 點到已無呢種情況。
記得舊年 11 月時已有落下雪，今年就踏入 12 月都未見初雪，感覺無舊年咁凍。但又咁講，喺英國生活室內一定有暖氣，而家出入又通常揸車多，點到點，喺室外時間唔多，自然感覺又無咁凍。我依然覺得香港嘅 13 度係凍過英國嘅 3 度。
唔覺唔覺，雞蛋仔都移英一年。
舊年雞蛋仔嚟到，打開門佢都唔願意出去，因為怕凍，我要夾硬拉佢出門。但佢已今時唔同往日，而家朝早夜晚都識叫我開玻璃門俾佢出去花園大解，無懼寒冬！除咗係天氣無舊年咁凍外，我室友仲笑佢而家已經係「英國狗」唔怕凍。
預告又話過幾日落初雪，唔知真唔真。
WFH 先嚟壞暖氣
所謂唔太凍，先決條件係有暖氣。
呢個星期五，我 WFH，諗住可以瞓晏啲養下病，輕鬆啲工作，點知屋企個暖氣竟然無反應！本來未病好晒嘅我，咁樣凍一凍即刻又流鼻水又咳，最後決定抱埋雞蛋仔捐返上張床，實行人、床、電腦「三位一體」咁工作，work from bed！其實喺張床度返工都無問題吖！
但屋企無暖氣真係搞唔掂，10 點半未夠我就搵 Landlord 個 agent 求救，佢話佢搵師傅打俾我，但打到差不多 11 點半都未有電話嚟（英國生活日常），當我再追問時，佢索性俾個師傅電話我（英國生活日常 x2），OK，咁我自己打。
到 12 點，問題依然未解決，1 點有多，我再搵師傅，佢話佢會搞⋯⋯（英國生活日常 x3）。於是我決定 2 點後去 GYM 跑下！因為呢日公司搞 Christmas Party，全世界收早，無謂浪費時間吖，但點知個師傅又話可能 4 點至 5 點零嚟到，一係就星期一先整，咁我當然唔去跑步，乖乖等佢嚟整暖氣啦，邊個可以成個周末捱凍先？
但結果到 5 點都毫無聲氣，我再搵佢，話佢知我 6 點要出門口去 Party，佢叫我一係留條鎖匙俾佢。（吓？咩話？）個 Agent 幫口話個師傅好信得過。問題係，你信得過佢，但我完全唔識佢，仲要我唔係一個人住，如果我室友話唔見咗嘢咁點？最後佢 5 點半後先嚟到，但趕得切 6 點前整好。
雖然由朝凍住等到晚，但不論係室友定係過咗嚟英國住嘅香港朋友都異口同聲話： 「真係嚟咗已好，同一日嚟到咪已好好囉！」
係，喺呢度生活同睇曼聯一樣，要將標準降低，做好期望管理。
越洋 Video Call
有日同香港兩個酒鬼舊同事 3 人視像，感謝科技進步，可以隔咁遠都隨時「見面」傾偈。
言談間，我話再過兩個零月我就嚟咗英國兩年，係啦，咁雞蛋仔都過咗嚟一年，時間真係過得好快。傾傾下，我心裏有份感動，但無話佢哋知，就係分開咗將近兩年，大家無再喺同一間公司一齊共事，我亦對好多香港事開始脫節（口罩令、安心出行、紅黃碼、康復碼），但佢哋依然不時搵我隔空見面傾偈，我好感受到呢份友誼嘅存在感。
事實上，幾乎連根拔起咁離開香港，兩年無返過去，兩地距離遠又有時差，人人都各自有自己生活，以前有幾多朋友係一回事，而家同之後仲有幾多留低仲係朋友又係另一回事。
我感動係至少佢哋兩個都仲記住我，時間同空間係令我哋增加咗距離，但無令我哋喺彼此人生中抹走。而遺憾地，實在亦有啲朋友喺呢兩年間唔經唔覺地淡出咗我嘅人生，曾經有過嘅親密，唔知將來會唔會有一朝完全消失。
人生活到幾多歲都總有感慨同遺憾嘅時候。
公司聖誕 Party
星期五晚公司搞聖誕 Party，人少少二三十人咁，以為都係喺酒店餐廳細細地包個場自己聯誼下，點知我哋原來 Book 咗個好大型兼係公開性質嘅聖誕 Party，入到去唔知以為自己去咗馬戲團。
幾樣嘢有啲意料之外：
- 場地係 Manchester Central，前身應該係一個中央車站，咁你可以想像到有幾大。
- 入場要打蛇餅，你又可想而知有幾多人，而且嗰啲唔知係咩人，乜公司 Party 會夾埋其他人一齊玩？
- 啲人個個 Formal dressing，唔係傳說中嘅 Smart casual，牛記、波鞋唔俾入場。現場男嘅好多係一套老西，女嘅仲勁，無懼寒冬，照拋個胸，唔比身材，我包到上頸嘅裝束當然輸晒，但我再凍親的話就係輸條命。
- 入到去以為去咗馬戲團，有人踩高蹻，有人着少少喺中間跳舞，仲有啲帳篷俾你入去坐下休息。
- 未入場前嘅嘢飲要自費，入場後就枱面有幾多可以飲幾多，飲完就無。
- 上菜時間好隨意，隔離格食完前菜，我哋都未上菜。由於事先被告知呢間嘢好難食，無期望之下又覺得唔太難食，但個分量係正常成年男人應該覺得唔夠飽。
- 場內表演就仲似馬戲團，耍晒雜技咁，啲鬼仔睇到覺得好勁，但我哋香港嚟嘅人就梗係諗佢哋都未去過長隆動物園。
- 場內係有機動遊戲！碰碰車、咖啡杯等等。個咖啡杯玩完又暈又想嘔，我諗無咩必要都唔會再玩。當然，要俾錢先有得玩。
公司活動，員工唔使錢參加，以唔使錢嚟講就幾開心幾得意，如果想帶家人朋友出席，就要俾 £80，太貴囉！不過公司兩個靚仔鬼仔工程師都有帶老婆同女友出度。
又，文化差異又嚟喇，平時返工做嘢交雜唔多嘅同事，呢晚一見面就不論男女都嚟攬下我加嘴面珠（總有啲除外唔俾佢埋身，如「老孤狸」），就算當住老婆女友面都無問題，有個女友坐隔離仲對我又單眼又俾韓式心心，鬼仔鬼妹呢方面真係大方啲，同埋中西文化禮儀真係唔同，鬼仔鬼妹攬住錫落嚟感覺好正常，但港仔同我明明好熟都唔會咁囉！
當鬼佬遇上港仔與鬼妹
周末，鬼佬出城嚟曼城食飯，呢晚對佢嚟講幾有趣，分兩場活動：
- 同我兩位 HK 男同事一齊晚飯食中餐。
- 同我兩位鬼妹舊同事一齊飲酒。
上半場，一邊測試鬼佬對中餐口味，一邊港英文化交流，我哋幾個「新移民」講下喺英國嘅怪人怪事，又問下佢一啲英國文化同英文問題，又有講下廣東話咁。
講開英文，佢話 "Shit" 係 bad，但如果形容啲嘢 "The shit" 又變咗解 very good；至於英國人成日最鍾意返工問人周末過成點，鬼佬話其實無人真係想知你周末做過乜，只不過等於一句 say hello，而返工做嘢就硬係說話含糊不清，唔似美國人或香港人咁直來直往。我哋聽落覺得好笑，總之喺度同當地人吹水零舍多廢話。
下半場，約 9:30，結果鬼妹 10:30 先現身。鬼佬好明白歐洲文化，同我講呢啲叫 fashionably late，我話明明係 practically late! 不過我都好了解我兩個鬼妹 friend，所以我叫佢哋到咗話我知，我到時先出門。
同鬼妹見面嘅場景又唔同晒，去咗間有 live band 嘅 pub 飲酒聽歌，人多到開頭只能企，嘈到只可以交頭接耳咁傾偈，但明顯鬼佬鬼妹就係同一歐洲人種，完全覺得無問題。
我見到西班牙妹第一件事係打開佢件外套 check 下佢係咪又超性感拋兩團脂肪出嚟，果然不出我所料！唔理咁多抽下水先，哈哈！然後同鬼妹聽歌之際，當然唔少得又攬又錫，一個火辣西班牙妹加一個含蓄意大利靚女，我自覺好好艷福，哈！
而鬼佬就話呢晚好得意見到兩個我，覺得我對住唔同朋友有好唔同嘅一面，亦可以好融入喺唔同文化嘅朋友圈中。係㗎，我又好鍾意同我班工程師仔仔做兄弟咁，但我又好享受鬼妹嘅熱情同親密，小朋友先要選擇！我全部都要！
臨走見鬼佬攬住我兩個鬼妹朋友道別，我同佢講，如果我哋四個都係香港人，呢幕應該唔可能發生，好可能有命案。
但我估今時今日嘅我已唔再在乎呢啲嘢⋯⋯
寫作心態 / 生態
忙 / 懶 / 攰 / 病，唔寫文或寫得少總有理由（或曰藉口）。呢兩星期雖然仲未 100 %康復，但總算精神啲，咁橋又好多嘢想寫又有啲時間寫，於是產量增加返少少。
好喇，有人話出文太密係自己打自己，讀者都會忙 / 懶 / 攰 / 病，邊睇到你咁多文？結果只會洋洋數千字射落 Medium 個海，收視率同收益都會拉低，更有話留住啲文一星期先出一兩篇至係上策，最好兩篇文隔開啲日子出，確保啲人唔會睇一篇漏一篇，咁先可以將成本最低化、利益最大化咁話。
我就真係越寫越佛系，但依舊隨心，對收視收益近乎如浮雲，當然有讀者睇自己嘅文、拍手鼓勵、留言交流係件美事，每月 Medium 入雞碎咁多錢俾我呢個新丁窮 L 都好美好，但講到尾我喺度寫文係「為情而造文」而唔係「為文而造情」，想寫就寫、我手寫我心係我最想做嘅事，既係我日常自娛活動，又係我嘅自癒療程，我真係無打算要好策略性咁寫文出文。
硬係覺得，寫得好就自然有人睇；有緣嘅就自然會睇到，暫時心態都係咁，無好刻意追求啲乜。
開始跑返
睇返跑步紀錄，我 11 月幾乎無跑過咁，只跑咗 2 次，總共 6 km，主因係我由 10 月尾開始就病，病情一直反覆，無精神體力去跑。
11 月尾好少少，所以復跑咗 2 次，期望 12 月跑返多啲。睇返 2021 年紀錄，如果我想跑返 2021 年嘅里數或突破紀錄，我今個月要跑 100 公里先得，但幾乎係不可能嘅事。
我仲未決定出年跑唔跑長跑，但點都要 Keep 返跑步呢個運動，保持身體健康同唔會變肥婆。
再練弓道
呢個星期六，久休復出再練弓道！先生喺度！！
而我咁耐無好好練習，真係乜都唔記得晒，呢日趁先生喺度即刻搵佢補習返啲基本功。
除咗步法同技巧，先生提我練弓道嘅心態都好重要，團體練射時要注意同其他人嘅步伐一致和諧，練弓道要放低自我，融入他人，專注修練，呢啲都係我好需要改進嘅地方。先生就笑我總係有自己一套方法，但亦即係話我未做到放低自我。
下星期會係弓道研討會，基本上要練足一日，由朝早到下晝。而再下星期除咗星期六恒常練習我，星期日仲會上蘇格蘭同當地弓道協會嘅人交流，好忙咁！但亦期待嘅！
睇嚟呢個月真係要認真練射！
好想重拾 TMM
忙、病、攰，加上呢半年嚟日日夜夜同班工程師共處，我嘅生活節奏亂晒，無乜 Me-time，呢個月嘅病情更影響埋我早起嘅習慣。
TMM，The Miracle Morning 係我好想重拾嘅生活習慣，即每朝早起冥想、運動、睇書等等，未必需要好長時間，但重點係每日持之而恆。
我亦好想清晨之外，都俾返多啲 Me-time 自己，煲下劇、畫下畫、溫下日文法文、睇下書、放下狗，仲有想學返琴。
而家生活有同伴係熱鬧又不愁寂寞，但少咗時間自己獨處安靜，又少咗時間發展下自己興趣，希望自己可以搵到個平衡點。
曼城新景園
有晚我哋終於去咗曼城新景園食飯，我喺香港都未食過。得兩張枱好細，要堂食最好預先訂位，好多人都係嚟外賣自取。
我覺得好味呀！我鍾意個咖喱汁！仲有久違嘅雞蛋仔！呢間我應該會再食！
（今集完）
新鮮出爐！呢期最新文章
埋嚟睇，埋嚟揀！CLAP & LIKE！
以下目錄係介紹呢期最新文章同推介其他舊文，歡迎嚟慢慢坐、慢慢睇。