【曼城周記】英國食大閘蟹
2022年｜周記 W48
周記，係記貝星人一周之事，包括大事，小事、有事、無事、瑣事、心事、無聊事。
水分充足，營養欠奉，例牌長文，敬請慢用。
今個星期，無乜大事發生，但又好多瑣事分享。
- 最新病情報告
- 睇戲：《不作浮塵》、《飯戲攻心》
- 陪人睇樓租樓一波三折
- 公私飯局，食大閘蟹
- 染咗個髮準備過聖誕
- 飛行里數換機票上回提要：
揸夜車，又整車
星期一夜晚 8 點幾，但條街黑到似凌晨時分，高速公路上竟然有一半路程係無路燈，只靠地上嘅貓眼石同車頭燈嘅燈光照明，加埋時大時細嘅雨水，仲有眼瞓加腸痛，以將近時速 80 里（128 km）飛馳的話，能見度全靠有幾集中精神揸車而定。而我身邊無人，只有雞蛋仔，一隻平時無乜 manner，但坐車好有 manner 嘅法虎狗仔，都真係要讚下佢乖女。
經過上周末獨自揸車長征威爾斯一役，兼夜車雨中返曼城呢段路，我正式宣佈技能解鎖成功，應付到 2.5 小時嘅高速公路行程。我相信以一個人揸車計已近乎我個人極限，再長時間就一定要中途抖抖或去個廁所。
呢一晚，細佬係咁叫我星期二請多日病假留多晚，佢話我的而且確真係病，面青青。其實唔只面青，仲痾到腳軟兼條腸刺刺痛，但屋企始終都要返，我亦唔想返到工嘅情況下請病假。契哥本來叫佢老婆跟我車傍住我，我斷言拒絕咗，自己揸車有咩事都係自己嘅事（雖然我一路揸車都諗住雞蛋仔安全第一），但如果阿嫂坐埋落嚟，我壓力實大咗，仲會緊張咗，最重點係阿嫂車牌都無，完全唔識揸車。
契哥同阿嫂呢就無如期同我一齊返曼城，因為佢哋架車爆咗軚，而「英國梅窩」亦並非浪得虛名，唔係想補軚換軚就即刻有，所以佢哋被迫滯留多一晚。
最後我成功「技能解鎖」，第二日朝揸車返工車頭燈突然壞咗，好彩咋，如果係前一晚喺高速公路雨中摸黑返嚟時壞燈，又未整好 airbag，咁有事我就 GG 喇！
以為今個星期又要破財整車，點知換車頭燈無收我錢，兼搞返好個 Airbag，安全第一！而攞車又盡顯呢度啲人做嘢嘅隨意，我遲咗過去車房，佢哋已收咗工，將我條車匙收埋喺另一架車嘅車轆度，原來咁都得。
病情
有好轉，未好晒，始終未清，所以周記依然要講下病情。
以為今篇周記可以大大隻字講我已經病好，但結果星期五又開始流鼻水，然後鼻水倒流又開始咳返，本來已好返 99% 諗住星期六可以上弓道，點知我又要請假，我就嚟點拉弓都忘記，而星期六康復指數又跌至 79%。
而之前收到 NHS 通知我可以預約做身體檢查，明明已打去約好日子時間，今個星期忽然收到 SMS 話個 Health Check 取消咗，叫我再重新預約過，但連點解取消都無話我知，原因都唔俾一個！再預約又即係叫我再拎住個電話係咁等等等啦？我未得閒處理呢件事。
我諗我真係要認真考慮轉 GP！
女廁有 M 巾？
今個星期嘅公事分享係特別啲，話說公司多咗女同事，女廁自然多咗人用，垃圾桶仔亦多咗好多 M 巾。
清潔叔叔表示感覺唔良好，於是希望呢樣工作可以外判處理。真係長知識，原來喺呢度做清潔可以咁樣唔包清理 M 巾，又原來有啲清潔公司係專門提供 M 巾垃圾桶同 M 巾回收服務，真係一日唔死一日都有新嘢學。
不過，呢件工作小事嘅亮點唔係以上嘅長知識，係我同個小弟弟同事分享呢件事時佢嘅反應。
佢：「吓？點解女廁會有 M 巾呀？！」
我呆咗。
我：「點解無？咁要換㗎嘛！」
到佢呆一呆。
佢：「我點知啫，我以為好似 BB 尿片咁一日一次。」
又輪返我呆一呆，尿片都唔會一日換一次啩？你一日去一次廁所？
我：「呀⋯係咁嘅，咁 M come 就會流血啦，咁 M 巾就會濕咗喇⋯」
同個廿幾歲仔上性教育咁。
佢：「哦，咁就會焗住唔舒服喇？」
我：「係呀，其一啦！另外係塊 M 巾唔會無限吸收力㗎嘛，吸滿咗又再有血咪會漏囉，咁點可以返一日工都唔換 M 巾呢？會流啲血出嚟㗎噃，一日至少換幾次啦！」
就係咁，我哋兩條友喺公司進行咗呢場奇怪嘅對話。由於呢個對話令我工作上增添色彩（一定係紅色）與趣味，所以無無聊都想記低喺今個星期周記，哇哈哈！
租樓波折
同朋友睇樓租樓，看似順利，但又一波三折。
Agent 朋友有個盤，好啱我朋友，於是就促成咗呢個交易。我朋友當然開心，佢嚟到發覺租屋好難，新移民無收入同信用火證明，本身租屋已預咗要一炮過交半年至一年租，呢樣佢都預咗，但網上好似好多盤放出嚟，不過好多都約唔到睇樓，一係無人覆，一係就話唔租俾有小朋友家庭，而我朋友就有個 BB。
Agent 朋友個盤舊租客原定 23 號搬走，於是安排我朋友 25 號入住，中間一日半就等 Agent 公司安排清潔。咁由月頭開始就講話安排睇樓，但一直拖住都無約到日子，終於約到某個星期五話下晝去睇睇，但到嗰日個租客又話自己要 WFH，唔方便，最終拖到 23 號等佢搬走先睇得。
好喇，到 23 號下晝去到，Agent 自己遲大到，上到樓，門鎖實，入唔到，個 agent 手上條匙又竟然唔係大門匙，最正係個鬼妹惡女租客原來過咗中午都仲未搬走，佢仲喺度搬緊嘢，佢仲理直氣壯咁話自己已講咗要多一日先搬得走，兼態度強硬又惡劣話唔會俾我哋入屋睇樓，話我哋無 24 小時前通知。
個惡女講大話唔眨眼，業主話佢先無收到通知惡女要多一日時間搬走，而我哋早好多星期已提出想睇樓，個惡女事後仲老屈我哋喺佢單位外大呼小叫。呢個世界乜人都有，希望佢小心地滑，英國多雨。
最後，24 號終於上到去睇樓，正正常常，總算惡女態度衰還衰，住得間屋算企理。而 Agent 就話 25 號簽交匙。正當以為已入直路只爭臨門一腳，25 號當日成朝都搵唔到個 Agent，到中午終於搵到，佢話佢病，要傍晚 5 點半先簽約交匙，好啦，都唯有等，但最後我哋由 5:30 等到食埋晚飯 9:30 都搵唔到個 Agent，佢後尾成 10 點終於浦頭，話食咗藥瞓咗大昏迷，聲稱第二朝 10 點一定會去交匙，好彩朋友本身 Airbnb 租多咗兩晚，如果唔係一家三口點算？
到 26 號朝早 9 點半打俾我話要 10 點半先嚟到，不過佢最後 11 點半先現身，終於交到匙，但合約都未準備好⋯⋯
呢壇嘢真係睇到英國生活嘅人點做嘢。
新加入小成員
因為上文個朋友，我哋日常生活多咗個 BB，本身我對小人類無乜興趣，兼有少少抗拒，但唔知係咪因為佢同我一樣都係「雙十節」出世嘅天秤女，我對佢又唔抗拒喎。
期待睇 BB 同雞蛋仔點相處互動。
一星期入兩次戲院
今個星期入咗兩次戲院睇戲：
- 《不作浮塵》
- 《飯戲攻心》
入戲院入得咁密係因為呢度係英國，呢類關於香港嘅紀錄片同港產片唔會好多場次，想睇就要快睇，而《不作浮塵》更加係只上映一日，嗰日唔睇就無。
本來鍾意睇戲的話就一星期睇兩套戲都無大問題，但喺度搵得少就要慳啲使，所以咁樣係好奢侈㗎喇！
兩套戲都好睇。 一套真實，一套寫實；一套好悲，一套好笑。
兩套都推介，但前者我推咗你哋又未必有機會睇，後者我推時你哋想睇嘅應該都睇晒。
世界盃分組賽
除咗睇戲，今個星期當然唔少得繼續睇波，世界盃喎，四年一次，當然要睇！
日本贏德國嗰場好熱血，作為《足球小將》迷，感覺到高橋陽一無呃我！日本真係贏到德國！戴志偉真係贏到卡爾軒斯史奈達！
我咁開心除咗係支持日本隊外，亦因為 8 年前德國 7:1 大炒過我最愛嘅巴西隊，唔係講笑，嗰場波我睇到喊。
不過公道啲講，睇完今晚西班牙對德國後，場波算係精彩，明顯兩隊都實力好高！
至於巴西，今時唔及往日，當年朗拿度、朗拿甸奴、李華度「 3R 」組合已無得輸，仲要加埋最強後衛卡路士同隊長卡富，真係是但一個都可以個人表演扭到前場入球或嚟個超遠距離勁射入網。雖然今場巴西有李察利辰個人勁射兩球，第二球仲要超靚，但整體踢法都唔再好似當年嘅「森巴兵團」咁好睇。
希望巴西繼續越踢越好！
高層飯局
對，又高層飯局，最近一星期一次咁。
食物美味嘅，但係呢⋯⋯今次飯腳組合有啲奇怪，獲邀請嘅同事基本上都唔熟，所以無乜話題。講真，放假就唔想傾公事，唔熟亦唔想講私事，你懂我懂。
但有啲對話令我覺得唔知點搭嘴：
「足球比賽係幾多分滿分？」
「見到啲球員跌低覺得佢哋好痛！」（其實係「插水」）
「生蠔係咪死咗先食得？」
「片糖咩嚟㗎？係咪同冰糖一樣？」
「好想帶埋阿媽嚟煮飯俾我食。」
但我有個男同事話有啲女人扮無知的確會令一啲男人好受。 我無嘢講。
英國食大閘蟹
星期日，我俾自己好好休息，因為帶病去飯局後好攰，所以第二日俾自己瞓到 10 點先起身。
一起身就收到好消息：有大閘蟹！
喺英國係無大閘蟹賣，我係好鍾意食，但兩年無得食，於是問開餐館嘅朋友邊度可以買到大閘蟹，答案係無地方賣呢種蟹。
但係我朋友搵咗個漁夫朋友幫手，喺威爾斯北面活捉咗 9 隻俾我！估唔到可以願望成真！啲蟹仲要好生猛，係咁郁，第一次見無被綁住嘅大閘蟹！亦都係第一次食野生大閘蟹！
講俾住喺北威爾斯嘅細佬知，聞說個漁夫佢都識，但佢好大盆冷水淋落嚟：
「勁！以為南部先有。不過呢啲野生嘅應該無膏，要餵避孕藥先谷到膏出嚟。」
食大閘蟹就係為咗食膏。
但最後我哋覺得有少少膏都好滿足呀，畢竟呢度係英國唔係香港呀！
細佬話咁多隻先 £42 仲要揸埋車落曼城送貨俾我好抵啦！咁同香港比仲抵𠻹！同事喺英國住咗好耐嘅朋友即刻問喺邊度買到，無㗎，真係碌人情卡咋！
同場加映我下廚
同場加映下我今晚都有親自下廚，仲一次煮兩樣：
- 秘製燜鎮江骨
- 醉蝦
男同事食完話碟鎮江骨係可以冧到仔嘅（邊有咁易吖），而鬼佬睇完相就咁講：
「You CAN cook 😏 I bet it tastes lovely x」
但我相信呢兩道菜都未必啱鬼佬口味，始終「人鬼殊途」，不過做人嘅嘢，你𠱁下我，我𠱁下你，都係求開心啫！唔使太認真。
新髮色
係新髮色，唔係新髮型。
距離上次染髮都已接近 3 個月喇，換色唔換髮型係一個自相矛盾嘅決定。
保持髮型：因為越簡單嘅髮型越慳錢，可以留長又剪短再留長，太多層次嘅短髮就會似男仔頭咁成日要剪，菇菇頭就可以剪少啲，3 個月先至剪都得，咁就慳咗錢。
染髮：但染髮其實又係使多咗錢，仲要染髮一定係貴過淨剪髮，所以我慳得嚟其實又使多咗咁。
但我盡力慳咗啲㗎喇，譬如幫襯當地鬼婆髮型屋，唔搵香港人剪的話，淨剪都貴一倍。而前面流海長咗我都係自己修，都係慳錢表現吖！不過鬼婆髮型師叫我下次唔好自己剪，同佢講聲就得，佢會免費幫我修下啲流海，人真好！
今次染咗紫加粉紅，但好似紫多過粉紅。
飛行里數
我發現我有 116854 Asia Miles，人在英國用唔到乜滯，但過幾日到 11 月尾就夠期，點算好？
我靈機一觸打俾媽咪：
「我換張機票俾你嚟英國探下我好無呀？」
就係咁，忽然就安排咗媽咪出年 2 月尾嚟一轉英國。我心情亦突然變得複雜又激動，畢竟差不多兩年無見媽咪，平時唔覺，一諗到就快可以重聚就覺得掛住佢！
佢嚟的話，我當然要請假陪佢，但假期就係得咁多，咁就意味住我歸港無期，又會再推遲我返香港嘅日子，我都好掛住波波（我隻貓，我大仔）。
我：「你叫波波要等我！」
媽： 「波波長命百歲！ 」
唉，係咩人要我哋香港人各散東西？
又同場加映
我：「我發現我有 116854 Asia Miles！」
伊死：「點儲番嚟……」
我：「（以前）亂使錢。」（我而家真係有儲錢）
（今集完）
新鮮出爐！呢期最新文章
我今個星期咁勤力寫文，大家有無睇呀？
埋嚟睇，埋嚟揀！CLAP & LIKE！
以下目錄係介紹呢期最新文章同推介其他舊文，歡迎嚟慢慢坐、慢慢睇。