【曼城周記】英國生活三年誌
2024｜W8
周記，顧名思義，即記貝星人一周之事：一切大事、小事、有事、無事、心事、瑣事、無聊事。
水分偏多，營養欠奉，多屬長文，敬請慢用。
本周摘要：
- 轉眼移英三周年
- 英國驗眼初體驗
- 想見醫生可以點
- Hamilton歌舞劇
- 元宵佳節煎湯圓
- 鬼仔鬼妹齊飯聚轉眼移英三周年
2021 年 2 月 22 日，凌晨一個人喺香港赤鱲角機場上機。
當時正值「武肺」，機場只俾登機乘客進入，所以無親朋戚友送機環節，只得一個朋友仗義車我去機場，另一個喺機場返工嘅朋友就喺入閘前見一見。就係咁，孤身上路。
同日夜晚就到咗倫敦，一個人喺倫敦希斯路機場捱咗一晚通宵，第二朝轉機去曼城，堂細佬嚟接機，安頓好我喺我伯父伯娘間屋度自我隔離兩星期。之後上北威爾斯細佬屋企團聚、到返曼城時「被逐」無地方住，展開咗我移居英國嘅生活。
初嚟英國時，BNO Visa 申請咗，不過未批。倫敦機場個海關就好好，即批個 LOTR 俾我。到 4 月收到 BNO Visa、5 月同人一齊夾份租到屋住，個心先開始安定落嚟，於是 6 月開始搵工，一搵就搵到份酒店 Reception 工。一開頭除咗係伯父伯娘忽然唔俾我一齊住之外，租屋、搵工、買車等都算係好順利，有唔少貴人。
轉眼就喺英國住咗三年，5＋1 政策己身過咗一半。
呢三年，做過兩份工、租過兩間屋、買過一架車、多咗一個男朋友，當初喺香港帶嚟嘅積蓄無咗一截，但而家亦未乾塘，人生無嘢盡如人意，大部分時間喜多於悲、順多於逆，咁已經好好，對於知足常樂嘅我嚟講，心裏感恩、平安、快樂。
呢三年，隨住離開香港嘅決定，隨住嚟度英國呢個新環境定居，我當然都有失去咗一啲嘢。以前嘅工作同人工當然無必要再懷緬，做得走呢個決定，有啲嘢係必然嘅取捨。除咗錢同工作，舊嘅朋友點樣都會疏淡咗，有一啲人亦喺人生入面消失咗，留得低仲會聯繫嘅自然係真朋友，同時亦喺英國認識咗貴精不貴多嘅新朋友。難得係同媽咪距離遠咗，但身遠心不遠，每星期通下電話，可能溝通質同量都仲比喺香港一齊住時高。最唔捨得並唔係香港嘅方便、美食、節奏，而係年紀漸大嘅大仔波波（貓），但有佢陪住我媽咪，佢哋兩個都叫互有依靠。
移居英國係我人生中最大嘅決定，比結婚、離婚更重大。暫時過咗三年，我都無後悔做呢個決定。香港當然永遠都係我嘅故鄉我嘅家，世上無任何一個地方可以取代成長地嘅位置，可惜係如嘅香港對我嚟講好陌生，已無咗嗰份熟悉嘅舒適感。英國嘅生活有辣有唔辣，但都係自己選擇。我自己都鍾意喺外國生活，居住環境、生活節奏等等都輕鬆啲咁，唔好嘅地方亦有好多，一樣係各種取捨與妥協。
感激三年嚟或遠或近幫助過我、陪伴過我、支持過我嘅人，亦多謝嗰啲喺呢三年嚟對我媽咪同波波付出時間、愛心去關心佢哋、照顧佢哋嘅人，我會一直記喺心。
以下呢篇文結集咗呢三年嚟移英嘅重要足跡：
英國驗初眼體驗
呢個星期，去咗驗眼，睇下我 2006 年 laser 落嘅「高清眼」狀態如何，睇下要唔要配過副眼鏡，仲有係睇下有老花未。
臨飛英國前，都有去普通眼鏡店搵視光師驗眼，同配咗副近乎無度數嘅眼鏡。我對眼喺近視唔深嘅情況下做完 laser，十幾年過去，保養得算 OK，當時英國視光師話我只係其中一邊眼有返 50 度左右近視，其餘都正常。
今次忽然想驗眼，原因有兩個。一、公司員工福利，我個職級驗眼有得 claim 返錢，有福利當然要用，而呢度嘅福利跟稅務年度，去到 3 月尾完，所以我呢兩星期又驗眼又洗牙。二、因為夜晚揸車同睇電視時，覺得啲街燈光同字幕比以前散渙咗，所以想 check 下睇下度數有無深到。
私家驗眼因為係要俾錢，所以驗嘅嘢比喺香港配眼鏡嘅免費驗眼多，驗完視光師嘅解釋亦詳盡好多，喺電腦俾我睇晒啲掃描圖、數據等等，提問同解釋都好仔細。
驗完結果係對眼視力仍然相當好，只係左眼有 50 度散光，兩隻眼都無近視或老花，唔需要長期戴眼鏡，但如果我揸車同睇電視覺得啲光好散，或睇電腦睇得耐想戴眼鏡時可以戴下。
不過，佢話我本身副眼鏡度數唔 match 我而家對眼嘅度數，所以都建議我配過另一副。
Sph、Cyl、Axis...睇驗眼報告？
- Sph = Sphere，負數係近視，正數係遠視。e.g. -1.50 = 150度近視。
- Cyl = Cylinder，即散光。e.g. -1.50 = 150度散光。
- Axis = 即散光角度。e.g. 170 = 散光角度為170度。
- Add = 同「老花」有關。
- Prism = 同斜視有關。張單合共盛惠 £290，對…三千蚊港紙！！！
- £55 驗眼
- £130 眼鏡框
- £50 防反光鏡片
- £55 防藍光鏡片
俾錢嗰刻覺得好肉赤，直至返屋企交單 claim 員工福利嗰下，見到寫住可以最多 claim 到 £115，人生即刻又有返曙光！
G 話如果有啲咁好嘅福利，應該等下個年度 (其實即係 4 月) 配返副太陽眼鏡用嚟揸車用，好好提議！
想見醫生可以點
上回講到嘅大肚疑雲，雖然自行驗咗無中獎，但由於要嚟嘅親戚遲遲唔出現，令我依然有啲隱憂，於是就諗到不如睇下 GP (醫生)。
第一年嚟英國時都有分享過，喺英國睇醫生好難，尤其當時仲係 COVID 尾段時期，醫生唔見人，只能網上或打電話問診，然後自己去藥房配藥。上一個 GP 診所，病到死死下，上網又無得 book，打電話去又話唔接受電話預約，叫我朝早 8 點去診所度預約 (約咋！唔係有得 walk-in 睇醫生！)，結果我都係靠食成藥同慢慢熬到病好為止。呢間 GP 除咗幫我做咗個 NHS 免費提供俾女士嘅子宮頸抹片檢查外，根本係無俾過任何醫療支援俾我。
舊年搬咗屋後，換咗新 GP，最先享有嘅服務係有個新病人 Health Check，見姑娘答問題、抽血驗下等嘅基本健康檢查，唔使額外俾錢 (申請 BNO VISA 時已俾咗三千幾鎊 IHS 費用，所以亦唔叫免費)。驗血後，無消息就係好消息，代表一切正常。不過，只要你喺 NHS 網頁嘅個人帳戶連結返自己 GP 戶口，原來所有之前打針紀錄、驗血報告都可以上網睇返，呢個我又覺得非常好，仲方便過喺香港 (百中無一的事)，我都係今次想預約醫生而先發現到 NHS 都有佢嘅好。
講返正題，咁打電話去呢間診所，都係無得預約嘅，叫我上網提出自己嘅問題，再等 GP 回答需唔需要見醫生。GP 亦唔係網上即時答你，基本上即係上網留個言，然後等消息。
好消息係，似乎我呢個新 GP 真係好膪舊嗰個，雖然要先玩網上留言，但我留言後唔夠半個鐘，診所已打俾我同我預約，但就要約到十幾日之後先有得見醫生。點都好，有得見好過無得見，依然期待呢個喺英國三年嚟第一次面診嘅機會。估唔到我喺英國三年嚟第一次 book 到睇醫生係驗孕。
Hamilton 歌舞劇
同工程師弟弟朋友呢個星期去咗睇歌舞劇 Hamilton，放工去咗佢屋企，佢煮飯我食，食完就一齊去睇 Hamilton。
原來呢套歌舞劇係 2015 年嘅作品，所以排舞同曲風都好現代化，Hip Hop style，唔少歌係 Rap 住嚟唱，幾有新鮮感，雖然唔係我喜愛嘅風格。套劇講美國總統華盛頓時期嘅政要 Hamilton 嘅一生，將沉悶嘅歷史化作輕鬆激昂嘅歌舞，其中有個有趣位係有個角色扮演當時嘅英王，美國人寫嘅劇提到英國皇室時多少都有啲揶揄味道，而呢個場在場大部分嘅都係英國人，佢哋邊睇都邊哈哈大笑，一齊笑返自己國家嘅國王。
呢晚坐喺山頂位，個位好窄，我唔高都覺得頂腳，坐 3 個鐘係有啲辛苦，不過，喺英國生活有下呢啲娛樂已開心，睇返份人工，坐山頂位就啱㗎喇！
元宵佳節煎湯圓
星期六，正月十五，元宵佳節。
舊年我同 G 無慶祝情人節，但就有元宵見面喺屋企食個飯咁。今年 G 同我就出去食飯慶祝咗西方情人節，於是元宵亦一切從簡，喺屋企煎兩塊牛扒、食幾粒湯圓，應下節就算。
除咗食飯，我哋仲安排咗一連兩晚「宮崎駿動畫之夜」，同元宵佳節完全無關，純粹係上星期聽完宮崎駿音樂會後，發現 G 從來未睇過宮崎駿動畫，於是呢個星期一連睇咗《天空之城》同《哈爾移動城堡》，俾佢感受下東洋動畫嘅魅力。
鬼仔鬼妹齊飯聚
呢幾個星期好似成日見意大利妹同西班牙妹咁，上星期一齊篤完波，今個星期又見。
今次我哋約食飯，飯腳係 Table for 6 咁，我同 G「港英組合」，西班牙妹同我哋另一個舊同事就「西班牙組合」，另外意大利妹就同佢男友組成「意大利組合」，一枱飯腳，三種國籍、四種語言，好國際化。
約咗 2 點食飯，臨時臨急 G 話想去買件外套，於是搞到遲到差唔多半個鐘，已經好晏嘅午飯飯局，仲要遲到，我最憎自己遲到。G 一邊道歉，一邊話啲鬼實遲，結果又俾佢講中，我哋 6 個人喺餐廳附近路口撞見，全部人都遲半粒鐘先到。
西班牙妹本想俾我哋試下正宗嘅西班牙雜燴飯 Paella，但佢食完話覺得唔好，話下次要俾我哋試真正嘅 Paella。
餐飯每人 £20，都係例牌英國外餐價錢同質素咁啦，唔難食亦唔好食，唔會 Encore 再去。
然後跟鬼仔鬼妹嘅習慣，食完飯又走下場，下一場去咗 Twenty Stories，一間樓高 20 層嘅「空中餐廳」度飲下咖啡。我上一次嚟都已係兩年前，當時都係同幾個鬼妹嚟。
對我嚟講，同香港比，呢間嘢當然又唔特別高又唔特別靚咁啦，但喺曼城又算幾 fancy 㗎喇。
之後再轉場去咗酒吧 Albert's Schloss，邊飲邊聽下 Live band 唱歌。
G 話鬼係好興咁，不斷轉場飲一杯又再轉場。佢話同我嘅歐洲朋友一齊佢會好適應，因為都係鬼，同我嘅香港朋友一齊就會好唔同 style。唔同朋友圈有時係好唔同，更何況係唔同國籍嘅朋友，我覺得兩個人肯互相融入對方生活圈子就夠。
最後，今個星期 G 搞俾學生嘅第三場迷你演奏會取消咗，我無機會連續第三星期挑戰。不過，呢個星期有好好上堂，會繼續好好練習。
（今集完）
新鮮出爐！呢期最新文章
埋嚟睇，埋嚟揀！CLAP多 49下！
多謝大家睇到最後，Medium 改制後，以「拍手」同「留言」去計算俾作者嘅稿費，如果篇文唔差，請幫忙多多拍手，可以拍足 50 下！
以下目錄係介紹呢期最新文章同推介其他舊文，歡迎嚟慢慢坐、慢慢睇。