【曼城周記】最強風暴 Eunice
2022年｜周記 W8
周記，記一周之大事、小事、心事、瑣事、無聊事。
今個星期嘅大事，係英國打大風！ 仲有返工返到病咗。 仲有，我不知不覺嚟咗一年。 仲有，我忽然接受當地一個機構訪問。
周記嘅嘢，水分偏多，營養欠奉，敬請慢用。
紅色警報．最強風暴
其實呢個星期中間已有一個風打嚟，天氣差，又大風又大雨。不過，一波未平，一波又起，前一個風嚟完，緊隨星期四、五有最強風暴 Eunice 打到嚟英國，風速最高達 122 mph，橫掃英國西南部，尤其重創南部城巿，倫敦、南威爾斯等地更加發出最高級別紅色天氣警報，而曼城都去到橙色警報，橫風橫雨，啲風大聲到令人有啲驚。
咩係紅色警報呢？
Red Warning: Dangerous weather is expected and, if you haven’t already done so, you should take action now to keep yourself and others safe from the impact of the severe weather. It is very likely that there will be a risk to life, with substantial disruption to travel, energy supplies and possibly widespread damage to property and infrastructure. You should avoid travelling, where possible, and follow the advice of the emergency services and local authorities.
簡單講就係：天氣差到會有生命危險。
再睇下以下英國新聞報導或英國人網上分享嘅片段同相片，你就會感受到 Storm Eunice 嘅威力，亦明白咩叫有生命危險。
打大風冧樹香港都有，而呢兩日英國亦冧咗好多好大棵嘅樹，唔單止咁，連貨櫃車喺馬路上行行下都吹反呢下就知幾大風，仲有啲屋吹住屋頂、教堂吹走頂尖等等。
呢次風暴死咗 3 個人，R.I.P. :(
本來星期六約咗 Warrington 嘅朋友一齊食飯，又約咗西班牙妹揸車載佢去醫院，不過基於安全理由，全部揸車活動取消，我真心唔想再有第二次撞車事故。
星期五係風暴最勁嗰日，呢度打風嘅風勢好強勁，但雨勢同香港仍然無得比，香港嘅黃紅黑雨贏晒。去到星期六就落雨，同埋落雨雪、落冰雹，天氣少少差，但唔算惡劣。成個 2 月都好似個個周末落雨咁。
打風都要返工？
究竟打風仲要唔要返工？呢個問題我想問喺香港嘅朋友先。
當隨時禁足 WFH 已咁習以為常，啲腦細們仲會唔會容許員工 8 號風球下抖一抖？定抑或叫大家在家繼續工作？
喺英國，竟然打風係無明文規定要放假！（搞錯）返工嘅照返工，返唔到工嘅唔一定有糧出，要睇腦細點喇。
而我呢兩日因為身子抱恙，所以星期四、五呢兩日都 WFH，碰啱天氣咁差就更加宅在家，唔想吹一吹病情更嚴重，幸好係我公司都好有彈性地容許員工 WFH。
淋病
病上加病，但真係淋病。
星期三，因為工作關係，我同各個供應商喺新 office 內內外外度睇下、傾下。當日打緊第一個風，天氣開始差，企喺室外傾傾下，又風又雨，初初微雨，然後越落越密、越落越大。
正常咁嘅情況，就梗係行返入室內避雨先再繼續傾。但眼前兩個鬼佬係英國人呀！曼城人呀！我眼見啲雨大粒大粒好密咁淋濕佢地全身，但佢地係面不改容咁繼續談笑風生。天，簡直係一種境界！
落雨對曼城人嚟講就好似足球對戴志偉咁，係好朋友！
而我呢個 Mancunian 新丁一嘗呢個境界後，本來已有兩聲咳嘅我當晚立時風寒入體。所以第二日眼見天氣又咁差，身體又咁差，立即舉手申請 WFH。
聽日坐飛機返港
漏咗兩個字：「本來」。 本來聽日飛返香港，2 月 21 日飛，2 月 22 日到港。
而家，molamola！
舊年，2021 年 2 月 22 日上機，2 月 23 日到英國，眨下眼就一年。當時出發買定來回程機票，我亦諗住自己都可能會返嚟香港探下媽咪、波波同其他朋友，無試到武肺竟然已兩年有多都仲唔肯走。
我真係已俾唔起 21 日 / 14 日嘅假期連酒店住宿費，加上返咗新工，都唔適合咁快請大假，又再加上香港而家好似打仗咁，總之唔係回港好時機。
由於一早都預咗張回程機票會泡湯，所以早已無諗住 2 月可以返香港，無希望就無失望。
不過，已離港一年，的確都想返下去見下媽咪，同食食食好西。
咁就一年
呢一年好似好快就過咗咁，我竟然已喺英國住咗一年，仲返緊第二份工，又買咗車。一切明明好實在，但感覺又有啲難以置信。
當初離開，「5＋1」 覺得話長唔長，但話短都唔短。不過，當好似唔覺唔覺就已嚟咗一年，又覺得 6 年可能都好快就會過去。
前日同香港嘅舊同事舊朋友 Video 見面，唔相信自己同佢哋已整整一年無實體見面，這麼近又那麼遠。
嚟緊 2022 年，預感應該會比 2021 年穩定啲啩？都叫 settle down，新工都叫返咗就快 2 個月。相比起舊年又辭職又 Pack 箱 又申請呢樣嗰樣咁一個人飛嚟英國，我估最煩最難嘅日子已過咗去。（Finger cross）
情人節 Momi-momi
「下定決心，回復單身都不覺荒涼⋯⋯」
「應該信我一表人才，上段情緣不過棋差一着，有信心迎接未來的誓約。」
繼上年生日無咩感覺後，今年過新年、情人節亦一樣無乜感覺。
究竟係踏入 40＋後人大咗對節日無咗嗰份興奮感，定抑或係喺英國無人無物無心慶祝任何節日呢？
或者兩者皆是。
至於情人節，有情人終成眷屬，無情人就如常生活。如常生活就係返工放工，不過呢個星期一，因為我想放工去按摩，同事妹妹於是心動不如行動，跟我一齊準時放工去按摩。
點知，度度都 Full 晒！之前我明明次次去按摩都係 walk-in 就得，點解情人節啲人唔去慶祝要去同我爭 Thai massage？！喺兩個人都充滿堅毅不屈嘅精神下，終於搵到一間話有位俾我哋去按摩！ GO GO GO！
黑店疑雲
當間間按摩店都 Full 晒，而有一間店熱烈地歡迎你，係咪 too good to be true？
去到間按摩店門口，條巷黑媽媽咁，然後間舖係地底，嗰條樓梯又長又斜又窄，暗紅色牆身，燈光昏暗，仲有陣味道，唔係香味，但又叫臭嘅，但感覺有點不良，入到去室內亦無乜裝修，有啲殘舊，係咪伏㗎？
入到去，兩位女士迎接我哋兩位女士，亦係佢兩位幫我哋按摩，全店無其他人，不論職員或客人都無。呢度按摩公價一般係 £40 一個鐘，但佢哋話有優惠，只收 £35。咁筍，係咪更伏？
話泰式按摩，但幫我按摩嗰個係白皮膚鬼妹，嚟自捷克，我心諗睇嚟都係伏㗎喇，但按按下，又覺得雖然唔泰式，但又正正路路幾舒服喎。捷克技師話原來佢哋換咗老闆，佢係第一日返工，另一個泰國女技師就第二日返工。
哦⋯⋯咁明晒點解仲有折頭了。
情人節晚餐
兩個女仔按摩完，一身鬆晒，時間尚早，於是搵咗間西班牙餐廳食 Tapas。呢間係我少有喺曼城食完覺得好味想再食嘅餐廳。
呢一晚，美酒、美食、良伴，最重要係呢度唔會話只有情人節套餐鋸你一頸血，都係正常餐單。
雖然我哋唔係情侶，但好朋友拍住拖咁去按摩再食飯，又投契地傾下偈傾下心事，我覺得呢個係個好圓滿嘅情人節呀！
接受訪問
上星期收到電話，係搞馬拉松嘅機構打嚟，話想同我做個視像訪問，於是今個星期就嚟個 20 分鐘嘅簡單 Video meeting，一位住喺倫敦嘅蘇格蘭女仔同我做訪問。
佢話睇到我舊年參加曼城半馬拉松比賽時寫嘅參賽理由覺得好有意思，所以想同我做個簡單訪問，用嚟做今年賽事宣傳嘅其中一個人物故事，而喺舊年嘅參賽者之中，佢哋揀咗 5 個人做訪問。噢？得 5 個我都中籤呀？
期待係咪真係會成為宣傳故事。
課金戰利品
說好要慳錢嘅 2022 年，1 月收支平衡失敗，2 月都好似都唔太樂觀，希望 freelance 快啲出糧，咁就有啲機會今個月唔會超支。
上星期買嘅戰利品，今個星期收到，兩樣都滿意。
新圍欄唔使自己砌，仲可以隨心整成唔同形狀，呢個欄可以喺我返工時俾雞蛋仔有個大啲嘅地方休息。
至於個專為有寵物家居而設嘅吸塵機，比起最初搬嚟嘅弱雞吸塵機，呢個吸到好多嘢咁，只係用咗兩次已見到好多驚人「成績」。
使咗錢而物有所值就無咁肉赤。
波波 10 歲生日
呢個星期，係我大仔波波 10 歲生日。
由佢 5 個半月返屋企，養到佢咁大，第一年佢生日我唔喺佢身邊（反而我無同過雞蛋仔過生日）。
波波 2 月生日，通常都係新正頭，呢幾年都習慣「波粉」嚟團拜燒嘢食加同波波切蛋糕賀壽。今年，我自己人不在香港，香港又疫情好嚴重咁，所以今年無咗呢個活動。
但多得波波 Grandma（即係我媽咪）仲會咁認真同波波慶祝生日。佢話唔點蠟燭係唔想波波生日嚟老貓燒鬚，而佢亦「自首」話個生日蛋糕只係影相道具，影完食蛋糕嗰個係佢本人，波波無份。
我就希望今年或出年可以返到香港一轉，親身抱下肥波。
（今集完）
新鮮出爐！呢期最新文章
原來今個星期都算勤力寫文喔⋯⋯
埋嚟睇，埋嚟揀！CLAP & LIKE！
以下目錄係介紹呢期最新文章同推介其他舊文，歡迎嚟慢慢坐、慢慢睇。
