【曼城周記】新正頭 X 情人節
2024｜W7
周記，顧名思義，即記貝星人一周之事：一切大事、小事、有事、無事、心事、瑣事、無聊事。
水分偏多，營養欠奉，多屬長文，敬請慢用。
本周摘要:
- 大年初三已啟巿
- 可疑情人節前夕
- 淡中有甜情人節
- 迷你演奏會之二
- 真正音樂演奏會
- 久別重逢的細佬
- 鬼妹鬼佬再重聚
- 懷疑有孕的憂慮
- 零運動的一星期大年初三已啟巿
呢個星期依然係新正頭，由於英國無農曆新年假期，所以我星期一大年初三已啟巿，未到初四已經「初四咁嘅樣」。
呢兩個星期，我個得力助手小妹妹請咗假，所以我算係一個人做兩個人嘅工作，照計理應好辛苦先係，不過幸好係，呢個星期難得地唔算忙，竟然可以半做半 hea 咁返工度日，完全配合新正頭「開爐」但個爐未熱嘅狀態。
可疑情人節前夕
情人節前夕，G 去咗同樂隊女主音屋企排練，預先講定我知可能會覆唔到 message / 聽唔到電話 / 遲回應等等，通常佢要上堂教琴或要夾 band 前都會咁預早揚聲，然後佢有佢嘅生活，我有我嘅忙碌，咁我就好好 enjoy 我嘅 me-time，呢種都算係我哋兩個人之間嘅生活日常。
但到咗夜晚 10 點幾，G 忽然俾咗個咁嘅短訊我……
G:「I love you」
我並無按鬼佬文化立即回應「I love you too」，而係用女人本能直覺提問﹕
B:「Are you drunk？」
然後電話響起，仲要係 video call，環境黑媽媽，而我見到佢個樣都唔夠 3 秒，佢就將個電話遞咗去俾隔離個鬼妹。Well，即興 social 兩句本來對我嚟講絕對唔係問題，問題係我當時已換晒睡衣瞓喺張床度，素顏之餘，個頭仲勁有凌亂美，場面其實有啲尷尬，兩個女人只能係咁易寒暄兩句，鬼妹講咗句「成晚聽咗好多關於你嘅嘢」。OK，飲醉咗都仲記得掛住我喺口邊。
翌日情人節，我同 G 講笑話尋晚佢相當可疑，疑點如下﹕
1. 當你嘅男人失驚無神無端端同你講 I love you 賣口乖，通常有古怪。
2. 突然 video call，環境漆黑，而佢身邊有個女人。
3. 叫咗佢嗰晚返到屋企話我知，但到第二朝起身都唔見有短訊。
4. 第二朝 6 點幾起身返工 text 佢，竟然又可以即刻覆我。
5. 第二日係咁話自己好攰 (3 個人飲咗 4 枝酒嘅後遺症)。
6. 事發喺情人節前夕，通常唔係正印都會前一日慶祝。
講完當然都係得啖笑。 愛人不疑，疑人不愛。否則，感情問題一律分手處理。
淡中有甜情人節
舊年情人節我哋兩個連見都無見，只係元宵一齊食下湯圓咁。今年我哋決定都慶祝下。
同舊年一樣，無花。
有又開心，無亦開心，送花嘅錢用嚟食咗去會更開心。人大咗，少咗虛榮，多咗現實，哈哈！
同事問我點慶祝，我話夜晚上 Huddersfield 食飯。佢哋問點解係我過去 Huddersfield，而唔係 G 嚟 Manchester。Well，又話現今世界倡議男女平等嘅 (雖然我一向覺得無可能絕對平等)。因為如果叫 G 閒日嚟曼城，即係佢要取消幾堂學生，再搭車嚟曼城，即係要俾錢搭車食飯之餘，仲要賺少咗錢。情人節之嘛，值得咁咩？
如上所述，人大咗，少咗虛榮，多咗現實，邊個去邊度唔係最重要，大家都係應下節，借節日儀式感氹下對方開心，我又唔計較係我去佢度食飯喎。
呢晚 7 點幾出車，由於高速公路交通擠塞，Google Maps 點咗我行山路。本來行山路問題都唔大，但夜晚有啲山路係可以全無街燈，伸手不見五指，開晒大燈都只係睇到短距離路程，而呢晚仲要好大霧兼有雨，能見度極低，我爭啲睇唔到前面條路係轉右，幸好我臨尾一刻望到地線係右轉！如果我扭唔切軚，架車就連人帶狗衝落山崖，差少少情人節就變咗我嘅死忌。
驚魂未定咁到達目的地，再接埋 G 出車去餐廳坐低先心定落嚟。
今年無花無朱古力，但有情人節晚飯同禮物收，好過收我唔識欣賞嘅鮮花同吉百利啦！G 係都要我睇張卡，原來佢嘗試用廣東話拼音寫卡俾我，真係「明就明，唔明就黎明」，哈哈！
我送咗一排巨形「三角朱古力」俾 G，無錯，只係「三角朱古力」，不過就印咗佢個大名咁。佢果然係個樂天知命嘅鬼佬，一係就傳承咗英國人好虛偽嘅紳士禮儀，因為見佢收排朱古力都表現得好開心咁。喺食完成餐晚飯後，我先再送第二份禮物俾佢，呢份我知佢實鍾意，靚靚酒杯，買俾佢即係我都「自肥」，YEAH！
呢個情人節俾 G 最大禮物，可能係我由星期三至星期日朝我都喺 Huddersfield。我哋繼續間中「半同居實驗」，今次我要付出就係返工放工時間長咗，架車用多咗油。而 G 要付出嘅係日頭要湊雞蛋仔，佢話無乜難度，反而雞蛋仔變咗「娛賓大使」，個個學生嚟到見到佢都好興奮、勁開心。
迷你演奏會之二
星期六朝，G 又再為應考學生喺屋企搞迷你演奏會，等佢哋習慣人前表演，練習壯膽。經歷咗上次「滑鐵爐」慘敗，我今次再接再厲，第二次挑戰。
結果……有進步，但又衰咗。
開頭彈得好好地，彈到大半都 ok，但就係去到最後兩行我「發台瘟」，同一節我彈極都錯，越錯越緊張，越緊張越錯，最後全首歌以爛尾收場。而喺我最緊張又表現最慘烈之際，唔知雞蛋仔係咪感應到我呢個「養母」嘅心理狀況有異常，佢竟然走過嚟舔我腳眼，呢種安慰方法當然安撫唔到我，但我事後都為着佢咁生性而感到安慰。女兒生性……
我會再挑戰，直接唔爛為止，下星期六又有第三次 mini concert，再戰！
今次迷你演奏會連同我總共有 6 位參加者，老中青幼齊晒，樂器仲好多元化﹕鋼琴、小提琴、結他、電子結他。我作為學生同時又係女友，覺得老師好叻，可以教咁多唔同樂器。
另一發現係見到唔同樂器嘅考試演奏方式唔同。鋼琴同結他都係自己有自己彈，小提琴就有鋼琴伴奏，我今日先知電子結他都有考試，而佢哋考試係播預錄好嘅指定音樂，音樂入面有人唱歌同有其他樂器伴奏，又長知識。
呢日 G 搞完迷你演奏會後，又繼續教琴，我就喺樓上練琴，唔敢相信自己竟然連續 3 個鐘練小提琴，真心好勤力！
真正音樂演奏會
我自己演奏失敗，但今個星期聽到真正專業嘅音樂家演奏音樂。
買唔到 Mirror 曼城演唱會平飛，我同咗 G 去聽宮崎駿動畫音樂嘅「Miyazaki's Dreams」演奏會，演奏久石讓大師為宮崎駿動畫《天空之城》、《龍貓》、《哈爾移動城堡》等創作嘅多首樂曲。好正！
好得意係唔少歌曲都耳熟能詳，陪伴我成長，但對於 G 嚟講就係陌生嘅音樂。不過，佢都好 enjoy 呢晚帶有東洋風嘅日本動畫音樂。
我就聽完之後，好想再努力啲練琴同練小提琴。（以前睇完《交響情人夢》都係咁，好想即刻練琴。）
久別重逢的細佬
上星期話今個星期再嚟曼城嘅細佬，喺我同契哥都無回應佢嘅情況下，到星期六晚 9 點幾，佢先出聲話星期日食 Lunch，問我同契哥有無時間。
我心裏面都好猶豫。又想見，又唔想見咁。好感受到「心淡」嘅感覺，只係爭啲就去到「哀莫大於心死」嘅程度。
最後我同契哥都有問佢幾點見、邊度見。佢話可以食個 Lunch，而我下晝約咗鬼妹，夜晚要聽演奏會，所以亦只能食個 Lunch。行程相當趕，朝日由哈城返曼城，原定 12–1 點食飯，再出巿中心 2 點會合鬼妹，但點知間餐廳 1 點先開，結果我都唯有同兩個靚女鬼妹講要 3 點先嚟到。
出乎意料之外，今日我以為係 4 人飯局（契哥、細佬、我同 G），結果變咗9 人飯局：我兩口子、契哥一家三口、細佬一家四口，好熱鬧。
好耐無見過啲姪仔姪女，或者我細佬終於聽到我講嘢，於是今次出動全家嚟新正頭見一見。弟婦都比以前識做咗，叫我哋去威爾斯探佢。雖然都係一大棚人，傾唔到啲咩偈，但至少我細佬同 G 都終於見面。
成餐飯廣東話為主，我要係咁做翻譯，G 就講佢今日學嘅新句子﹕「年生貴子」。
今日呢餐飯嘅新發現係我細佬唔單止同我哋疏離咗，同佢自己父母都好疏離。例子一﹕佢哋一家幾口上兩個月去泰國旅行，佢父母完全唔知道。例子二﹕佢阿媽（我伯娘）喺廣州跌親條頸要做手術，事發超過 10 日，佢竟然都無同自己阿媽通過電話。以上兩件事都令我相當驚訝！究竟我呢個細佬想點⋯⋯
失望還失望，見得返自己個細佬都仲係開心嘅。呢餐飯由於我哋約咗鬼妹，所以無奈早走，臨走我同 G 偷偷地埋咗張單，算係對契哥關照同對細佬一家小小心意。咁又飛走咗二百幾鎊！幸好 G 雖則係個窮音樂人，但都好大方慷慨，明白我既想搵機會報答契哥呢三年嚟照顧一個人喺英國嘅我，同時又想對細佬一家表達下關愛，並無覺得我哋俾呢餐飯錢好破費，反而話係好值得釋出善意嘅機會。
鬼妹鬼佬再重聚
無論約幾點，無論我哋已遲到半個鐘，兩個鬼妹依然比我哋更遲，犀飛利！
當我今日同西班牙妹、意大利妹呻我細佬無乜時間觀念時，佢兩個不約而同望住我又指住自己﹕「我哋都係呀！」我都一下子語塞，無言，笑。
呢日連埋 G 一人三鬼去咗巿中心玩 Pool，好似迷你桌球嘅玩意。四個人之中，得 G 係識玩，我哋三個女仔都係無乜經驗新手，偏偏我哋三個今日都有啲運仔，而 G 就頻頻失手。雙人隊制賽下，「西班牙 X 意大利隊」贏咗「英國 X 香港隊」。
完咗大家去 Cafe 飲下嘢，我哋上星期年初二見完，今日初八又見，跟住又講緊下星期不如再見，忽然密密見。
朋友係要見嘅。
西班牙妹今日再次同我講 Sorry，話上次俾西班牙仔連累遲大到，嚟唔到唐人街一齊睇舞龍。佢咁有誠意，今日又真係再出嚟，當然無嬲佢，嬲唔落西班牙美女。
懷疑有孕的憂慮
每當每個月應該探你嘅親戚無探你時，總會有啲憂慮，而今次親戚遲咗好多都無嚟，於是好憂慮。
新年賀詞「年生貴子」、「三年抱兩」完全唔適合我，我同 G 都十分清晰唔想一把年紀先玩育兒遊戲，仲要我哋兩個其實都仲係大細路，好多嘢想玩，無心力亦無財力做人父母，所以遲遲未見親戚到，我哋都擔心。
幸好應該係虛驚一場，唯有繼續等下。
我哋最初一齊時傾過嘅唔結婚、唔同居、唔生仔、唔管束嘅「四不」共識中，G 首先已提出想同居，而大家最近都不時試下兩邊走「半同居體驗」，雖然都覺得有一日會發生，但傾完都覺得可以慢慢一步步嚟，無嘢要急。至於結婚，一個對婚姻無憧憬，一個對婚姻已憧憬完畢，大家都覺得可結可不結，唔再覺得一定「不」，但亦唔覺一定「要」。但呢兩「不」嘅變動並無撼動到我哋對「唔生仔」同「唔管束」嘅堅持，呢兩樣真係好堅持！
所以，搞清楚係虛驚後，鬆一大口氣！
零運動的一星期
呢個星期因為情人節緣故，星期三開始已住喺哈城，所以無去曼城 Gym 跑步，星期日亦繼續缺席弓道，希望下星期可以重新振作！
今日喺香港嘅大仔 12 歲生日，希望佢年年有今日，歲歲有零食！最緊要健健康康！
(今集完)
新鮮出爐！呢期最新文章
埋嚟睇，埋嚟揀！CLAP多 49下！
多謝大家睇到最後，Medium 改制後，以「拍手」同「留言」去計算俾作者嘅稿費，如果篇文唔差，請幫忙多多拍手，可以拍足 50 下！
以下目錄係介紹呢期最新文章同推介其他舊文，歡迎嚟慢慢坐、慢慢睇。