【曼城周記】中秋夾 Band 開 Show
2023 ｜ W40
周記，顧名思義，即記貝星人一周之事：一切大事、小事、有事、無事、心事、瑣事、無聊事。
水分偏多，營養欠奉，多屬長文，敬請慢用。
This week’s highlight:
-一年容易中秋節
-夾Band女友陪出Show
-追月做節食湯圓
-辛者庫清屋一年容易又中秋
10 月 1 日生日嘅好友，生日快樂！
10 月 1 日呢個日子曾經係公眾假期、結婚周年紀念，如今只剩低好友生日呢個價值，呀仲有係我嘅「生日月」開鑼嘅日子！
啱啱嘅周末，喺英國第三次過中秋節，真係一年容易又中秋，求求大家唔好 send 葉劉。
中秋佳節，我喺香港嘅朋友喺群組到 send 出經典「葉劉嫦娥圖」嚟 fake G，同 G 講呢個係香港人嘅中秋女神⋯⋯結果我要由當初「掃把頭」同「23 條」講起，再三確定 G 唔會真係信 R. IP 係我哋嘅女神！
今年，G 再次挑戰中秋食月餅，都擺明唔會愛上，但至少無舊年咁抗拒。G 曾揚言月餅係佢食過最難食嘅食物，挑戰難度甚至高過鳯爪同皮蛋（有無搞錯？！），但都同佢講咗，一年一次啫，揀舊無蛋黃嘅月餅食啖應下節都要嘅。
各位，Belated 中秋節快樂！
夾 Band 女友
呢個星期最重大嘅活動就係 G 同我班香港 Band 友組成嘅樂隊喺星期六「追月」第一次出 show，於是我星期五晚又陪佢排練，星期六就去做觀眾。
今次個活動都搞得有少少混亂，場地本身由室外公園，到最後活動前幾日先決定喺一個 clubbing 場地舉行，但好彩轉咗場，一嚟當日落大雨，如果室外搞室一鑊粥（G 當初聽到話係 Outdoor show 即刻話搞手「太勇敢」）；二嚟咁遲先 confirm 場地，都好難有好多觀眾，室內細細地嘅場坐滿去，總好過喺空檔檔人影唔多隻嘅公園表演。
為處女 show 吹雞
我哋鼓手兼對外聯絡人當確定表演場地後，就叫大家「吹雞」搵多啲親朋戚友嚟撐場。由於 G 喺呢個夾 Band 群組度，所以我哋有時都要用下英文照顧下鬼佬，而鼓手朋友就打咗「Blow Chicken」叫大家「吹雞」call 人嚟睇 show。
G 見到「Blow Chicken」嘅反應係意料之內：
- 唔明咩意思。
- 諗咗去隔離（Blow Job）。
唔明，唔怪得佢，只怪我哋香港人太多呢啲充滿地方特色嘅英文。佢諗咗 Blow Job 我都唔怪得佢，不論人定鬼都好，男人係男人，而且「Cock」（公雞）喺英文俗語入面又有「小雞雞」（Penis）嘅意思，咁佢對「Blow Chicken」嘅聯想都好合理。於是 G 佢又將呢件事講俾佢啲鬼佬朋友聽笑一餐⋯⋯
見佢對「吹雞」笑得咁興高采烈，我順便贈興話埋佢知廣東話叫第一次出 show 做「處女 show」。好喇，咁即係 blow chicken for virgin show，成件事更加風光旑旎。XD
人鬼夾 Band 出 Show
今次呢個小型中秋音樂 Show 由香港人搞，搞俾香港人睇，搞手、表演樂隊、觀眾全部都係香港人，唱嘅全部都係廣東歌，G 係唯一一個喺台上嘅鬼。當主音介紹佢時，佢爆一句「大家好」即刻令全場歡呼，做鬼佬只要講到一句半句半鹹淡廣東話就可以輕易得到掌聲⋯⋯
今次並唔係我第一次睇 G 表演，但佢喺另一隊 Band 係彈 keyboard，而且係成隊鬼佬 Band 唱英文歌，今次呢隊 Band 係香港人樂隊，唱嘅係廣東歌，佢就變咗電子結他手，所以對我嚟講又感覺好唔同，除咗欣賞佢嘅音樂熱誠外，我估有另一份感動係佢融入喺香港人文化圈子中。
除咗講咗句「大家好」，G 仲練咗兩句廣東話歌詞幫其中一首歌唱和音，呢樣嘢係連樂隊嘅 Band 友都覺得好 impressive 佢嘅投入度。而當我見到佢喺台上拎住枝結他好忘我咁玩緊時，嗰一刻當然覺得佢好型，同時好欣賞一個人對某樣嘢好專注、好投入嗰種熱愛，就好似見到戴志偉對足球嗰種熱誠一樣咁熱血！
而另一位比較內向又不擅溝通（不論中英文）嘅結他手，喺台上同 G 嗰種互動都好觸動到我，見到音樂將唔同嘅人/鬼擺埋一齊，由雞同鴨講，甚至唔多溝通，到喺台上憑兩枝結他一齊交流，對我呢種唔識音樂又無對某樣嘢特別熱衷嘅人嚟講，感覺好神奇。完 Show 後，我約大家搵日嚟我屋企打邊爐慶功，結他手竟然主動用英文問 G 試過打邊爐未，經過呢個 show，真係覺得隊 Band 真正接納咗 G 呢隻鬼加入呢個香港人樂隊。
又，一講同 G 打邊爐，任何朋友嘅反應都係想玩佢，今次又話搵雞子俾佢試⋯⋯英國嚟㗎，咁易俾你買到雞子咩！
是日 Good Show！5 人樂隊開心，陪夾 Band 嘅女友們都開心！
追月做節
喺英國，呢一刻最 close 嘅朋友應該都係兩個工程師仔仔朋友，由於大家都係「異鄉人」，喺呢度嘅關係就好似親人咁。
中秋節，其中一個已為人夫人父嘅工程師仔仔想約埋一齊做節，但因為我要陪 G 出 show 前最後一次排練，所以約唔到，於是我哋就約八月十六「追月」嚟做節，喺個香港人音樂會之後，當晚去咗唐人街一間餐館度，4 人 1 鬼 1 BB 一齊食飯做節。
當然，我哋嘅做節餸菜都係隨意咁點下中餐，唔似香港屋企做節咁好餸，但可以咁樣坐埋一齊食餐飯已覺得好溫馨。
飯後，我哋再轉場去食糖水，本來話中秋要食湯圓應節，結果個個去到糖水店時又心郁郁叫埋啲窩夫、薄餐、棉棉冰⋯⋯我就叫咗碗紅豆沙加兩粒芝麻湯圓，同 G 一人一粒應下節「團團圓圓」。席間另一工程師小弟叫咗個榴槤棉棉冰，喺英國土生土長又無乜出國嘅 G 從來唔知榴槤為何物，俾佢試完一啖後，佢竟然話鍾意！佢嘅口味永遠出人意表。
媽咪一人過中秋
星期六朝，我同 G 打俾媽咪視像通話，G 又係一句鬼佬口音嘅「中秋節快樂」已經𠱁得我個靚媽咪好開心，語言障礙絕對係拉近咗我媽咪同 G 嘅距離。
媽咪話今年中秋一個人過，因為本來約咗食飯嘅朋友忽然放佢飛機。踏入移英第三年，我好似開始覺得媽咪有一份暗藏心底嘅寂寞，G 話如果去香港唔係咁貴咁遠，都好想探佢多啲。其實，以前喺香港過節都有一份咁嘅孤寂咁，我哋無好多親戚，僅有嘅親人關係亦好複雜同疏淡，自從祖父輩嘅人離世之後，已經唔會再有一齊做節呢回事，大時大節好多時都係我同媽咪兩個人過，媽咪亦好隨意，無話做節煮大餐，都係出街食餐飯，向來鍾意熱鬧嘅我都會覺得有種冷清，所以今年聽到媽咪一個人過中秋，心裏有種淡淡嘅憂愁。
辛者庫清屋
工作上，呢個星期又做「辛者庫」。
公司有個單位要完租，交吉自然要清屋，但無諗過個單位入面會有咁多嘢，並唔係普通少少私人物品，係有枱有櫈有煲有鑊有書有鞋⋯⋯由於物品太多，我架「汗血寶馬」走兩轉都搞唔掂，除咗帶埋公司 OA 上去清理，仲要搵埋清潔工，搵埋倉佬出貨車去清場兼清潔，搞咗 3 日。
對於呢種工作，我又無乜意見。
揸筆搵食曾經係我做咗十幾年嘅職業，但人離鄉賤係真嘅，去到外地，只要唔係錢多到夠使成世的話，返工賺錢自力更生係首要任務，唔偷唔搶唔賣身就已經天地良心，我覺得做咩工唔係好大問題，最緊要係自己做唔做得到。所以，由酒店 Reception 轉型到做 Office 大打雜我都係咁做，養到自己就好了。而人在其位自然就有其職責，每間公司嘅 Admin 都係大打雜，所以退租清屋呢啲嘢真係捨我其誰？做咪做囉！只不過，體力勞動嘅嘢原來真係好攰，老喇老喇！
移民之難
今日都有同朋友傾開移民適唔適應嘅問題。其實移民真係好大嘅決定，甚至係比結婚離婚更大嘅決定，雖然話有錢就乜都得，但其實有錢都唔一定適應移民生活，有啲人好放唔低香港嘅工作、收入、生活模式、家人、朋友、飲食、天氣等等等等，放唔低無錯㗎，唔適應亦唔出奇，所有嘢都無絕對，最緊要係對自己坦白，想留定想走，然後克服困難，盡力享受其中。
我自己算係適應英國生活，亦遇到好多貴人，令我更易融入呢度生活，但我都唔係所有嘢都習慣，冬天我都會覺得好凍好黑，呢排入秋我成日都好早眼瞓；返工對住啲英國工作文化都會好激心；件件傢俬都要自己砌都好頭痕；香港無層樓揸手，嚟到積蓄一直跌都會個心寒一寒；以前雙手滴水不沾，而家洗衫煮飯一腳踢，呢個星期仲剪埋草⋯⋯但我都係諗，既然做得嚟英國呢個決定，呢樣至今亦係我想繼續落去嘅事，咁就接受十隻手指有長短，無嘢係完美，只可以揀唔完美之中自己最想要又最能夠實現到嘅生活，其他嘢，可以克服就克服，可以將就就將就，最緊要做人開開心心、健健康康。
下星期日飛喇
開心預告，10 月生日月，下星期日我就飛喇！
每年生日都飛一飛都可以話係我個人嘅傳統習俗，前幾年嘅生日都係單拖去旅行，澳洲、意大利、法國尼斯、捷克⋯⋯今年我都有諗過繼續 Solo Birthday Trip，但 G 話希望同我過生日，作為女朋友又似乎無理由拒絕（咁都推佢又好「鬼」啦），加上 G 話好想從今以後可以去多啲地方，於是今年改變計劃，變成雙人生日旅行。
大家知唔知上圖係咩貨幣呢？（唔知的話，下星期開估）
今次旅行，兌換貨幣，一半用 Digital Wallet，一半用現金，而英國銀行有旅遊外幣現金送上門服務，不另收手續費，坐喺屋企第二日等 Royal Mail 拍門送錢上門等你簽收，我都係第一次用呢個服務，係好爽！舊年我仲要拎啲現金去超巿入面嘅兌換店換錢，今年試下銀行換錢服務，覺得很好！
話慳錢又使錢？
我其實每月都有為咗去玩而儲錢落一個「Happy Pot」玩樂基金度㗎，所以今次都係拎返儲起做旅行嘅錢嚟玩，人生得意須盡歡，生日唔係年年有。（無人講得埋嘅，係咪？）
Medium 收入再下跌
當然 Medium 收入只係零用啦，靠佢開飯我就死得，但零用少咗都係事實，8 月稅前收入由 7 月超過 $110 重挫至 $48.92，而 9 月再微跌至 $47.26。
不過，依然多謝大家鬆手俾 Clap 同積極留言先仲有呢少少零用錢，今日 10 月新開始，我會繼續努力寫文㗎，希望大家都繼續多多支持！
（今集完）
新鮮出爐！呢期最新文章
埋嚟睇，埋嚟揀！CLAP多 49下！
多謝大家睇到最後，Medium 改制後，以「拍手」同「留言」去計算俾作者嘅稿費，如果篇文唔差，請幫忙多多拍手，可以拍足 50 下！
以下目錄係介紹呢期最新文章同推介其他舊文，歡迎嚟慢慢坐、慢慢睇。
