【曼城周記】Black Friday 血拼 Outlet
2023｜W48
周記，顧名思義，即記貝星人一周之事：一切大事、小事、有事、無事、心事、瑣事、無聊事。
水分偏多，營養欠奉，多屬長文，敬請慢用。
本周提要:
-移民考慮與憂慮
-日日對住班「智將」
-一棵聖誕樹見人心
-嚟多轉打機夜繽紛
-Black Friday Outlet
-耍廢與自律之間仍未完嘅移民潮
呢個星期，不約而同有幾個朋友提出同移民有關嘅話題:
- 有移民後，自己要放下身段做勞力工作亦有心理關口，家人唔適應新生活，事業型女性忽然日日坐喺屋企煮飯做家務，覺得唔及香港生活好。
- 有唔捨得香港好親密嘅屋企人、有份好工好人工、有好多朋友嘅多姿多采生活，嚟到一個照顧三代幾口，情緒低落。
- 有舊同事嘅朋友移民曼城，話如果有工介紹就介紹下，都想有份收入咁。
- 有朋友嘅舊同事嘅朋友 (係...好多重) 嚟咗曼城，話一個女人嚟到，又好似有啲抑鬱，問我可唔可以照顧下。(「照顧」呢兩個字責任好大，何得何能，我都係喺英國學習做個真正成年人照顧自己，但你話當交個朋友，有嘢佢想知佢想問的話，我答下當然無妨)
- 有人寡佬一個嚟到 (60+退休警) 話嚟到搵唔到好工做，只能去超巿做執貨。(但呢個年紀喺香港都只能搵看更、的士司機嗰類？去到新地方，又有啲年紀，應該要有心理準備搵工有限制？)
- 有香港嘅朋友話諗緊走，不過未決定去咩城巿，但就話一定唔係去曼城，亦話唔想做返老本行 Account，想試下搵新工，開展新生活。
All the above topics, 全部都係呢個星期內發生，好感受到移民潮未過，而移民亦係超大決定，事前準備工夫要做足外，心理調整同決心都好緊要，諗清諗楚想要啲咩生活，有現實啲諗下移民係咪真係俾到你想要嘅生活。
移英近 3 年心聲
最近喺社交媒體不時睇到以下呢類新聞，講緊香港人移英後財政轉差，一半人無工做*，少咗錢又少咗朋友，但大部份人都認為值得走，唔打算返香港。
*關於「無工做」呢項，SCMP 用嘅英文字眼係「Jobless」，我唔知佢呢個講法係咪包括埋啲「已退休唔使做」或因為無工人而要留喺屋企全職湊細路嘅「家庭主婦/夫」。我認識嘅移英港人又都搵到嘢做，唔搵真係上述原因，夠錢退休、有多間屋收租維持生計、專職留喺屋企湊仔，甚至係讀下書先。但當然，學歷高、人工低、工作性質唔理想呢啲一街都係，但做得「新移民」，呢啲情況又似乎應該係意料中事？尤其香港人英文雖然算係咁，但好多亦同「英文好」有一段距離，呢樣都會窒礙咗搵工嘅機遇。
睇 post 梗係睇留言，留言唔少都負面，網絡世界就係咁架啦……
「走咗梗係話值得走，話唔值得即係認自己走錯咗。」
「無人會肯認自己走錯咗。」
「即使佢哋喺英國捱，佢哋都唔可以認，佢哋一定要講大話，話自己喺英國有好嘅生活，否則即係話俾人知佢哋做錯決定移民英國，咁就尷尬喇！」
「以我嘅觀察，佢哋只係自我洗腦，大部分香港人喺英國呢度都搵唔到工做。」
「個人喺英國生活同讀書第二年，覺得唔值得留喺英國，你唔會搵到歸屬感，因為你嘅種族，你唔會覺得係呢度嘅一分子。」
「唔該還返香港身分證同香港人身分。」
「支持暴力嘅唔好返嚟，唔該！」
「返嚟就會俾警察拉，返唔到。」
諸如此類，千奇百趣。
其實人生做每個決定都無得寫包單知道後果係點，如果可以百分百預知結果，人生就好簡單，但亦好沒趣。移民同結婚一樣，都係人生好大決定，就算結婚嗰刻發晒誓話呢世會點好點好，全球離婚率都一樣高企，證明其實真係無咩決定係必勝，有時都要睇命水、睇際遇、睇性格。
我自己覺得「認衰」話走錯難唔過如果係一家幾口喺英國而生活唔到，如果一個人擔起頭家，老婆喺屋企湊住兩個細路，搵唔到工，又無錢買屋，積蓄總會燒完，而 BNO Visa 係唔可以攞公共福利，咁試問點生活？一家四口一齊乞食？去到呢個地步，認衰回流難？定為面子留喺英國等餓死難？
就算搵到工，都唔代表生活一定順利，有人可能好怕英國成日落雨又天氣凍; 有人食唔慣西餐又唔鍾意煮，好掛住香港美食; 有人可能放唔低身段，以前做阿頭，而家做打雜，仲要體力勞動，周身骨痛; 有人可能好思念香港嘅父母、親人、朋友。
如果因為政治因素而無得返轉頭嘅就更加無得講啲乜，都人在漿糊了。
我會話，每個人都有自己人生嘅路，又每個人都要為自己嘅抉擇負責，有時人生係會揀錯路，咁咪睇下前面可以揀返條咩路繼續行囉！移民生活比以前好，咁就恭喜，但如果移民後生活唔理想，相信亦唔係孤單一個，好多人都面對唔同困難，咁就重新問自己，當初點解走，而家再揀會點揀。
至於啲人對走咗嘅人好酸好敵對係無必要，走咗嘅人生活好，你又叫人唔好返嚟、放棄香港人身分，講真，成個故鄉都放棄咗啦……走咗生活過得唔好嘅人，你又笑人走錯咗、衰咗唔肯認，咁其實係咪「憎人富貴嫌人窮」？不論人哋生活好壞你都唔滿意？但最重點係，啲人走咗生活好與壞，其實同你無關架，不如去或留嘅人都努力勇敢地活好每一天，走同留都有好多好多因素喺背後，每個人都可能有不為人知嘅故事，自己安於自己揀嘅生活就好了。
係，唔知做乜，忽然感慨。
我生活很好，我有工做嘅，但收入比香港少好多，積蓄一路下跌係真嘅; 強積金未拎到又係咁跌都真嘅; 天氣好凍，但我開暖氣時個心都會肉赤啲錢; 由香港唔使做家務，嚟到乜都要自己做，唔識煮返都要學煮; 出街食飯會覺得好貴，但又覺得唔係好味; 入冬天黑得快，我會好易就攰，好早就眼瞓，一個人的話，夜晚仲可能有啲 Down; 朋友少咗好多，香港嘅朋友亦會漸漸遠咗; 媽咪年紀漸大，自己無俾家用又無陪喺佢身邊，有時都會內疚 (間中不孝女); 生日唔再有一大班朋友慶祝; 英國交通係好 shit，同英國人共事都好多 shit……
生活總有難題同高低，但總括嚟講，我嚟咗就快 3 年，我又生活得幾開心。搵工過程順利 (我好彩啩); 有識到少少新朋友 (人大咗，朋友唔使多，真就夠); 居住環境覺得比香港濶落舒適好多，於是鍾意做宅女，出少啲街唔係問題; 生活作息好平衡，早返工又準時早收工，放工做下家務之餘，想耍廢又得，勤力練琴溫書亦得; 無好豐富嘅物質享受，但日常生活需要嘅嘢我都有，可以一年去一次旅行已覺得係好奢侈嘅幸福。
知足常樂，又或者我好易滿足，我又覺得喺英國生活幾快樂。當然都有憂心下將來，但至少眼下生活還好。
講到英國嘅衰嘢都有好多架，除咗交通同天氣，做有返工嘅同事。詳情請睇上文，總之日日返工一要同啲「智將」交手就嘔血。
上回講到我哋個清潔工受傷休養一個月後，逃得過唔使被炒嘅厄運，但都逃唔過俾人警告，總之嚟緊三個月都唔可以再有病假。
本來以為事情就咁告一段落，但呢個星期竟然收到之前嘅清潔替工搵我，話人事部老狐狸同佢講我哋唔想要自己個清潔工，話星期三會通知佢請唔請佢做長工，但之後一直無回音，而 Agent 公司可能又誤會咗佢有長工唔使炒散，唔覆佢亦唔安排工作俾佢。
噢，頓變 Condom 清潔工。
我唔係好明我哋位英國人事部狐狸先生點解做嘢咁唔專業又咁無交帶。首先，你自己公司炒唔炒你個清潔工係唔需要同外人交代嘅，一日未有定案，講咁多做乜？第二，你應承咗星期三俾個答覆人，就唔該你星期三打個電話俾人啦，做嘢有少少交帶得唔得？
一棵聖誕樹見人心
都 11 月尾，曼城 Christmas Market 都開咗十日有多，作為公司大打雜，都係時候佈置下 Office，今年就買咗棵聲稱有 6 尺嘅假聖誕樹返嚟，然後某日一朝早，我同印度妹妹、羅馬尼亞大隻仔三個「外族人」一齊佈置迎聖誕。
起完棵聖誕樹出嚟，一地都係紙碎，仲要蘇格蘭人清潔工幫手清潔(係呀，成個過程又真係無英格蘭人 / 英國人喎)。但棵樹搞掂後，仲要裝飾，呢個過程就漫長喇，因為買咗盒掛飾返嚟，百幾二百件掛飾，要逐件自己穿線再掛上樹，玩咗我一個鐘都唔止。
喺呢一個鐘入面，當然好多同事返工時路過大堂都見緊我忙緊呢壇嘢，但英國同事嘅反應係令人無言嘅﹕
「做乜咁早整聖誕樹？12 月都未到。」(聖誕巿集開咗又唔見你話早？)
「聖誕前 12 日先整聖誕樹吖嘛！太早喇！」(咁下年 12 月中先整囉！)
「點解棵樹咁矮？點解唔買大棵啲？」(HULK 咁高好唔好？)
「做乜唔買棵真樹？真樹好香。」(聖誕完咗係咪你幫手處理棵樹？
「我屋企仲有棵假樹，拎埋返嚟俾你放 canteen 吖！」(即係要我做多一倍工作？)
「會唔會整埋燈飾。」(不如你嚟佈置啦！」
以前喺香港咁多年，見親公司有聖誕樹，都只會打下卡開心下，靚就讚靚，唔靚又私下 gossip 下舊年嗰棵靚啲咁，從來無聽過有人對個 admin 同事咁多意見。
反而非洲同時平日「膠」到暈，但見到棵樹竟然有話好靚，多謝我一聲。
一個二個，唔使佢做，又咁多聲氣。
打機夜繽紛 2
啱啱個星期五又打機，同事仔趁老婆同個女返咗香港，最後一個星期過「假單身」日子，又邀請我、G、工程師仔仔一齊上去佢屋企打機夜繽紛，今次我哋大部分時間都係玩俄羅斯方塊同 Bomber Man。
我就好渣，玩炸彈人好緊張，完全唔入流，堅持「逃避可恥但有用」政策，一味左閃右避都有贏過一兩 round，玩俄羅斯方法就好啲，啱我玩啲。
喺英國朋友唔多，難得可以同埋 G 一齊玩嘅朋友亦少，所以都珍惜呢啲朋友同打機時間。
Black Friday 血拼 Outlet
“Black Friday” 唔係「黑色星期五」，係美國感恩節後嘅星期五大減價日，英國雖然無美國咁流行 Black Friday，但一樣好多店鋪借呢個日子成為商機，除咗正日外，成個星期都玩下大減價咁。
今年 Black Friday 係 11月24日，我同 G 就揀咗接住嘅星期日去咗 Cheshire Outlet 濕平下，等佢搵下有無聖誕禮物啱買，下個月南下探親過聖誕時可以送禮，而我就可以帶埋雞蛋仔去逛一日，拍拖兼放狗。
結果我發現我有個「Shopaholic 男友」，上次去香港時已發覺佢有呢鋪癮，平時好慳好儉樸，但一啟動咗買嘢模式就忽然好鬆手，唔諗咁多買咗先，仲會好魔鬼咁慫恿我一齊買，結果佢就買買買買買，我都買買買，大家都大出血。
逛咗 7 個鐘有多，終於回程返曼城。
我問佢﹕「說好的 11 月要慳錢呢？」
G﹕「我哋提早過聖誕同新年。」
我竟然喺慳慳地大半個月之後，11 月最尾幾日嚟一鋪清袋！
不過，我哋買嘅嘢都係抵買又實用嘅，本身 Outlet 價已平咗，Black Friday 再多 7 折或 8 折，又真係好吸引！
過幾日到月頭埋數，我就知死。
一年一度 MOT
MOT，即車檢，一年一次，無得慳。
一般公價 £40-£50 左右，今次搵咗間屋企附近嘅車房，口碑唔錯咁，但又只收 £35，係我三年嚟最平一次。
但我個 MOT 肥咗，fail，因為後轆兩條軚啲紋都蝕晒，換二手軚，每條 £40，換咗就合格返喇！咁又可以等下年再驗車。
呢轉 MOT，最後盛惠 £115，已比想像中少，萬幸。舊年嗰間燒咗我五百幾鎊！
(今集完)
新鮮出爐！呢期最新文章
埋嚟睇，埋嚟揀！CLAP多 49下！
多謝大家睇到最後，Medium 改制後，以「拍手」同「留言」去計算俾作者嘅稿費，如果篇文唔差，請幫忙多多拍手，可以拍足 50 下！
以下目錄係介紹呢期最新文章同推介其他舊文，歡迎嚟慢慢坐、慢慢睇。