日本人嘅自肅

自肅呢個詞語，響日本會係咁發水自我放大。

新型冠狀病毒疫情持續，雖然香港好似有逐步回落嘅勢，但係當然唔希望香港人掉以輕心。雖然而家香港係啲關係封得七七八八（貨運唔計，但一日有人出入，都唔係全面封關），但個氣氛似乎同日本嘅「自肅」（自粛／じしゅく／ji shu ku）相反，大家一趁放假就出嚟冇帶罩咁遊山玩水。

當然，日本嘅確診數係持續上升緊，而政府都宣佈咗東京大阪加另外五個縣進入緊急狀態。北海道同東京知事都叫咗民眾要自肅，咁究竟係咩一回事呢？

我哋先查吓呢個字係咩意思先——根據goo辞書，係解︰

自分から進んで、行いや態度を慎むこと。

拙譯︰由自身出發，慎重（自己嘅）言行同態度。我查過有啲字典會加上「再次」，即係之前做得唔啱，要再次謹言慎行，自我反省。原本嘅意思係︰例如響傳媒出咗太過火露骨嘅廣告，就叫廣告界自肅咁。歷史上每當有大事發生例如311大地震，政府都有叫過民眾自肅。不過原因就同今次好唔同，311係想叫日本人同情災民，唔好咁多娛樂消費，雖然其實對災區嘅消費自係對災民嘅最大幫助。

今次嘅自肅，自然就係希望叫大家減少外出，似乎已經有效用，街上行人急減，週末山手線少咗七成乘客等；但呢個字響香港人心目中，係廢嘅——因為唔同限聚令，係冇法律效力，純粹自己睇路，自己判斷。要自肅，香港人晨早做咗啦，經過沙士一役，人人一早已經戴哂口罩，唔使你叫到，我哋自己已經肅咗啦。但又咁講，香港人肅得快縮得仲快，而家每日確診人數只係稍為平復，啲人就開始出沒行山行腦場。

自肅嘅效果係點？例如響東京，小池知事一出聲，好多百貨公司同居酒屋都冇開門，加上好多企業都實行home office，似乎都有成效。而民眾方而，日本人無錯係自律，但係今次如果只係叫人自肅，而無一啲基本嘅guidelines或配套（緊急事態宣言都係好vague，即係點？），人人解讀可能唔同，其實係會削弱咗防疫嘅預期效果。

除咗日本人天性嘅曖昧外，呢度有個問題，就係自肅呢個詞語，響日本會係咁發水自我放大。睇過日経COMEMO有一篇本当の「自粛」の話をしよう。 〜3つの誤った日本的「自」縛について講到，亂咁嗌自肅除咗會造成有鋪頭閂但有concert照開嘅人人解讀不同嘅問題外，更加令日本人響精神上有作繭自縛無限想像，引伸到「自己責任」問題。係，日本人好鍾意咩都追究一餐，當一染咗病就係染病者嘅責任。呢樣嘢令日本人有一種無形嘅壓力，認為一感染咗就一定係自己問題——因為佢哋嘅諗法係無論係工作上定生活上，永遠都唔可以帶麻煩俾人，認為咁係好失禮嘅。

呢樣嘢同階段觀念一樣，響好耐好耐以前響日本已經存在，引伸出嚟嘅文化行為，莫講話大陸，香港人都唔會一時三刻跟到。唔同國家因應自己文化，會有唔同嘅做法，有強制有自律，各施各法。但日本最奇怪嘅係正因為好多根深蒂固嘅文化，佢哋好想改變，但往往唔係靠自發做到。

例如職場OT已經係長年問題，近年日本推廣早歸日「Premium Friday」勸人哋早點歸去，於是就有公司採取輪班，例如今日到咗我早返，就插枝旗響寫字檯頭話我「今日我六點走」，仲一到時間就趕人走。喂你要早走，都要啲嘢做哂先得架？做完咪準時走先囉，但係佢哋就永遠都當自己係學校，咩都死牛一面頸，點會有意義呢？

作為永遠識得自己走位嘅香港人，係永遠都唔會明；日本人都永遠都唔會明我哋點解唔明。