【教學】Tag & Go 消費券用淨尾數？一個仙都用埋佢！

2022年10月實測

話咁快又接近年尾，大家既2022年第一階段、第二階段……第N階段消費券係咪用剩無幾呢？選用Tap & Go 拍住賞收券既朋友仔，可能得返零頭係個apps入面唔知點使好。Tap & Go官方答案會叫你入錢然後再消費（佢收商戶手續費就梗係想你加碼啦）。不過用下腦都知呢個方法治標不治本，入完錢之後再買野，一樣好難買到剛剛好，總有幾蚊、幾毫、幾仙留返係度。

消費券既錢即係你平時納稅既錢，無理由由得佢過期，還返畀政府咁傻豬。西米係度簡單講下，點樣用盡佢：

一、超市 首先，你既Tap & Go消費券虛擬卡入左落Apple Pay / Google Pay。 然後照常買野，埋單果時唔用自助機，要排有收銀阿姐既隊。同佢講：「唔該，$1.23用Apple Pay / Google Pay畀，餘額用八達通啦。」 咁你就可以先拍乜乜Pay，清左消費券果$1.23，再跟阿姐指示拍八達通找埋餘數，完！如果你消費券尾數無仙屎、得豪子，例如$1.2。你可以同收銀阿姐講「……餘額用現金」都得。點解揀超市？因為超市收銀阿姐通常都好好人事，對你呢D麻煩要求唔黑面。其他鋪頭就……我未試過，你可以試下。

二、交費 水費電費消費券唔用得，我拎黎交CSL電話費。 1. 首先，登入CSL個apps。 2. 右下角「我的賬戶」。碌到中間「賬單及付款」。

3. 選擇MasterCard或銀聯（千祈唔好選擇拍住賞，因為拍住賞無得畀你自訂金額的），按「立即付款」。

4. 可以自訂銀碼，不能有仙（Sorry，我標題呃左你！我都唔想，你問李生點解嫌棄仙屎，唔收仙屎），然後按MasterCard或銀聯圖案。

5. 輸入消費券虛擬卡16個位卡號碼、到期日、CCV安全碼（唔知係咩？登入Tag & Go apps就搵到！），「提交」，完！

嫌太高科技？仲有另一個方法，就係去CSL / HKT門市用佢部自助繳費機。唔識用唔緊要，可以搵職員幫你。不過呢，你阻住人地sell野賺佣，小心畀人黑面。

所謂一理通百理明，其他電訊商既繳費模式應該咁上下，我估。

p.s. Tap & Go彷彿是為著消費券而存在；沒有陳茂波設計的消費券，李生的拍住賞什麼也不是。你認同嗎？

(2022–10–20)

下一篇著數教學：買英國超市禮品卡，送多5%面值

其他精彩文章： https://medium.com/westricego