抗疫放棄自救，就會打開暴政得逞嘅缺口
我有諗過，逃脫家居隔離（又或者懶係嘢嘅「家居檢疫」）嘅人唔係懦夫，而係自由鬥士。
「豁出去漫遊，不通知親友。那快感少有，哪管想去多久。」「原諒我這一生不羈放縱愛自由」。幾咁不屈嘅靈魂、幾咁不羈嘅自我。手帶再兒戲，都係政權嘅監控同限制。能夠擺脫，甚至輕易咁擺脫，只係對家真係太過白癡。若然逃離者白癡，咁對家一定仲加白癡。
（求其搵一樣就睇到有幾兒戲有幾白癡。冇耐禁經香港轉機，以為如夢初醒？一路扮瞓嘅人係叫唔醒嘅。）
（另外「居安抗疫」手帶應用程式亦有機會存在安全漏洞：）
家貧出孝子，國亂顯忠臣。疫情肆虐，就更加有呢班「遊俠」。邊個話佢哋唔愛香港㗎？寧犯通緝之險，拒做籠中之鳥，視規例刑責如無物，否定政權統治嘅正當性，正正身處抗爭最前線。多少豪傑，搞到柒婆（對眼）疑似濕咗，只係聞其作狀聲而不見一滴眼淚，人前戲流於表面。
13歲𡃁妹走去吉豚屋偷食，冇人會意此舉係身體力行恥笑港豚。少年英雌奈何敵唔過世俗眼光，落荒而逃，仲冇得飛的着草，局住鼠返上酒店。真係唔知駿洋邨準住戶苦啲吖，定係香港呢個準國家嘅下等公民苦啲嘞。不過話唔埋到時史書會再將流竄逃亡記載成長征呢。
留學生返到嚟忍唔到口，走去食車仔麵，一解鄉愁，唔係思鄉心切、愛港心重，咁係咩？食車仔麵撚狗，既係奇聞亦係奇計，燕雀安知鴻鵠之志哉？想當年喂阿哥當年單挑兩排犬陣，擴闊對一人非法集結嘅想像。呢舖走狗少好多，但距離十足，可見鎮得住。古有退避三舍，今有退避十米，是謂忠誠勇毅，成班契弟。
但係話晒事關公共衛生，係冇理由用生命作賭注。沙士經驗令「怕死」意識紮根，但同時助長某啲人嘅倖存心態，以為今次疫情會隨住入夏而減退。問題唔係意識唔到打緊持久戰又開始怠倦；你見大把人一早就已經一窩蜂行山亂拋垃圾，就知根本一開始就已經鬆懈。
怕死唔好咩？怕死係應份，怕死唔係自私。生死攸關，怕死即係愛己愛港。我寧願人人自重，戒慎恐懼，注意衛生，加強保健，繼而守望相助，共渡時艱。正因為今時今日，公民社會已經變成奢談，民間更加要有靭力同魄力。當前嘅兇險，正正係準備執政同錘鍊民族精神嘅考驗。當前嘅兇險，亦不限於中國病毒。
必須學識苟且偷生、苟延殘喘。唔只在於疫情，亦在於二、三百萬以外，甚或以內，會有「愚民樂」低賤到鬧好心商家而唔鬧政府，誤信蒸口罩呢啲流料跟住「唔驚」（又或者盲咗咁喺唔關事嘅post留言「兩盒thx」）；會有freerider；會有落力守護「基本」權益、「收成期」嘅黑藍血人；會有滿肛紅配合滿腹機心嘅奸民，效法所崇拜嘅強權。必須學識「消滅唔到就要包容」嘅應對之道，分而治之。
任何對付異見嘅手段都只有「壓迫、驅逐、包容」呢三招。壓迫帶來反抗，驅逐帶來分裂，包容就係對原則嘅捨棄。
必須警惕邪惡。包括荒謬滑稽嘅「禁酒令」。
理得柒婆係咪真係唔識真醉同借醉喺親密關係嘅分別啦，呢條現階段得個噏字嘅哎吔規例「粗暴干涉」個人自由以及自由經濟營商環境，已經係亂咁嚟。禁酒呀？學朋友引段《簡雍傳》先：
時天旱禁酒，釀者有刑。 吏於人家索得釀具，論者欲令與作酒者同罰。 雍與先主遊觀，見一男女行道，謂先主曰︰ 「彼人欲行淫，何以不縛？」 先主曰︰ 「卿何以知之？」 雍對曰︰ 「彼有其具，與欲釀者同。」 先主大笑，而原欲釀者。 雍之滑稽，皆此類也。
我都想知今日行會特別會議點砌啊。法律喎。
消息指特別會議仲談及立法限制社交人數。嗯，冇民意授權嘅傀儡。
「現在一般人對邪惡缺乏想像力，想像不到邪惡有多邪惡。」 — — 陳冠中
媚共政客提出，我唔意外。「十一哥」建議限制社交人數2至6人，4人內聚會最合適。禮義廉李慧琼認為禁止市民聚集，限制社交聚會不為過。林正財提倡10人以下。行會成員，「春江水暖鴨先知」。ExCo thx!
社會如今情境，專家咁講，亦恕難完全信服。
抗疫顧問之一許樹昌提倡切斷社區傳播鏈，限制社交人數。但係sorry，摻佢玩，難聽啲講就係收編佢。佢本人埋得堆，就要接受埋人格蒙污、名聲陪葬，更清白都變汪兆銘。沈旭煇都勸過學者愛惜羽毛啦。
港大感染及傳染病中心總監何栢良主張戒嚴級別措施，可以採納禁止2人以上聚會，或者頒布身處某啲地點屬於違法。但係就算佢埋唔到堆，之前有出「五戴要求」soundbite，我都好難唔諗起，08、12年兩度疑似受中聯辦青睞，又幫過保皇小丑女拉票，呢啲咁嘅事蹟。
公共衛生政策只係醫學，唔使「政治化」？我都好想係真，但咁嘅認識只係一廂情願。試下世衛咁講？做好心都好啦，Hayek嘅名句發人深省：
The road to hell is paved with good intentions.
論阻隔親密接觸，全面禁煙、禁打邊爐（字面又好，煲煙又好）點都有效過禁酒。但唔代表要不斷割讓，認可呢個不義、無能嘅政權。正如「全港社區抗疫連線」、23同盟、團結香港基金（顧問陳振彬咪係「連線」召集人囉）等保皇勢力及地區樁腳，政治化妝洗白，撈取政治本錢，對我都係徒然。而家仲想做埋援引緊急法嗰時冇做嘅戒嚴？
所以，即使我認定政權唔使「乘虛」都會大大力入長驅直進，一如肆意取消候選人及當選人資格，剝奪政治權利，踐踏民意授權，而冇黃醫生咁樂觀，我都始終贊同佢所講，要自律自救。民眾自律、自理、自救嘅意志同能力，係社會自治、自主嘅基石。抗疫放棄自救，就會打開暴政得逞嘅缺口。
