抗爭形式變化：下一步會係點？

先講明：而家我個人好嬲。除咗天水圍性侵事件外，頭先睇新聞仲發現一位友人喺觀塘揸車被捕。

本身我寫咗篇文，講前晚黃大仙發生咩事，但幾個鐘前臨 publish 嘅時候，警察又再喺黃大仙接近同一位置射催淚彈。加埋將軍澳亂扑途人同埋頭先嘅天水圍性侵事件，我成晚都瞓唔著。由於成晚個腦都不停空轉，我突然諗到，抗爭喺呢幾日應該又進入咗個新階段，一個市民會每晚落街去圍堵就近警署/警察宿舍嘅階段。

雖然呢幾個月以嚟，反送中民主抗爭嘅兩個陣營，都仲係市民同埋由警察代表嘅港共、支共政權（現已進入軍政府狀態）對立，但兩邊對抗嘅形式已經好快咁變化咗幾次。喺六月中，除咗大遊行之外，肢體衝突都集中喺政總同立法會附近嘅金鐘一帶，但六月下旬大家已經轉場去包圍港島北嘅其他政府建築。

而喺七一攻破咗政府建築入面最具象徵性嘅立法會、同時用物理方法令到會議無法繼續之後，抗爭形式就改為喺唔同區排隊搞遊行，屯門、尖沙咀、上水、沙田等。直至七二一回歸港島場之後嘅元朗黑夜，警察放任甚至與黑社會合作，令到唔少市民對警察體系嘅不滿，成為咗原先對政權不滿以外嘅新火頭。而七二七、七二八嘅濫捕，更加同七二一之後 hea 捉白衫佬嘅態度形成鮮明對比，怒火中燒嘅市民於是開始包圍被捕者所在嘅警署。

而呢幾晚嘅警署 hit and run，令唔少人發現喺街坊協助下圍警署呢件事，其實幾本小利大。警察對 T 裇短褲踢拖嘅街坊動粗、亂咁打亂咁拉（特別係無辜受罪嘅老人），好易被鏡頭捕捉，令人睇唔過眼。而好似呢兩晚黃大仙咁，令警察喺住宅區入面射催淚彈更加係 Bonus。而喺黃大仙，而唔喺觀塘、將軍澳（明明三區群情差唔多）迅速升級射過期催淚彈嘅其中一個原因，亦可能係發彈位置後面就係紀律部隊宿舍（多數俾警察）。可能喺佢哋嘅 mindset 裡面，阻止唔到宿舍被圍就即係 #老豆搵仔 所講嘅「禍必及妻兒」必會成真，所以一定要壓制啲街坊啩。

陣間嘅罷工集會，可能亦會出現有市民出於義憤，而前往包圍尋晚被捕義士所在嘅警署嘅情況。而呢種情況，短期內亦應該會持續。不過根據上述嘅觀察——即係每半個至一個月，軍政府同市民對抗嘅方式就會轉變——咁嘅情況睇起嚟，八月尾隨時已經唔只係包圍警署，連登仔吹咗大半個月風嘅 #麻包袋 亦可能成真。據聞而家警察已經連行孖咇都嫌唔安全，而要成隊人一齊巡。除咗義士每個周末作客練兵，各區街坊每晚唔停咁主場撚狗，應該亦能夠折磨警察嘅精力同士氣。亦因此除咗警署之外，警察宿舍亦隨時成為第二甚至主要戰場。

但呢兩晚嘅結果似乎亦話俾我哋聽，呢啲街坊落樓式嘅撚狗行動，唔係太適合仲係著住成套 gear 嘅 black bloc 手足參加。「你唔係叫啲鄰居街坊直接食蛋咁仆街啩？」我嘅意思係，警察呢幾日除咗自己畜舍被圍之外，會用得著 full gear 嘅情況仲係唔常見。多數人都係街坊裝加返副護目鏡同口罩就算，black bloc 只起到遮樣嘅效果，做唔到模糊身分同規模嘅效用。

而且呢類撚狗活動，亦比較適合本身熟習地形、可以隨時上樓消失嘅街坊參與，作為展示群情洶湧同分散警力之用。義士由主線走入其他地區，同警察一樣欠缺主場優勢，隨時「英雄被困筲箕灣，不知何日到中環」。（尋晚黃大仙好似就係有義士行咗入龍趣園結界被捕 :( ）

不過咁，雖然上面講落好似幾荒誕，但喺香港呢個真係需要警察時佢哋就永遠笠水、但近日治安都仲好好嘅地方，會出現唔同區街坊都去圍警署投訴嘅情況，亦暗示住香港正進入一場由軍政府策動嘅人道災難。喺元朗黑夜之後，警察已經越嚟越肆無忌憚去犯下各種罪行：攞槍瞄市民、警車想輾過市民（葵涌）、對民居射過期催淚彈（黃大仙、西環）、警察家屬高空擲物甚至掟爆竹（黃大仙）、搵車對示威者射煙花、性侵女被捕人士（天水圍）、無視被捕人士嘅法律權益。上次我話香港係警察國家，而家直頭進入埋人道災難添呀，第日唔開個紐倫堡去審判佢哋都唔得呀。

謹願今日過後，更多大眾明白現時警察已直接介入司法，成立獨立調查委員會亦難以達到本來目的，繼而將訴求集中回追究警隊暴行、爭取雙普選。當更多人了解到雙普選亦只係個限期至 2047 而中共未必乖乖遵守嘅承諾後，將會有更多人明白獨立的意義。

P.S. 打咗格都好，希望大家唔好再轉發女事主嘅相了！亦唔好帶啲佢日後睇到反而會諗起件事嘅物品去聲援，避免二次傷害。