我所希望嘅「最後派對」

其實一直都想探討吓「死」呢個俾人話係禁忌嘅話題，但一直都的唔起心肝。直到最近有親人過身，先令我決心寫好呢一篇「我心目中嘅葬禮係點嘅」。

鄒凱光曾經講過一句令我印象深刻︰「婚禮你可以睇到，但係唔係屬於你自己嘅；只有喪禮先係屬於自己，但係自己就睇唔到。」

雖然睇唔到，但唔代表可以求求其其。所謂求求其其，並唔係要啲咩風光大葬，反而係每當我經歷每一次親人嘅離世，種響自己心中嘅疑問就會加深一分︰我係咪真係要好似佢哋咁，一定要啲我識嘅人去殯儀館喊住睇我嘅臭皮囊，跟住殯儀館嘅A餐搞一大壇龍鳳，然後舉家去和合石撳掣，食英雄飯，完，咁樣呢？（我冇咁奢侈要去土葬，要揀都揀對大自然最環保嘅骨灰撒花園，如果有更環保嘅請話我聽。）

喂真係好老土，雖然我作為一個無神論者，相信死後係乜都冇，我係唔會有感覺（我都想有天堂地獄有afterlife，但係真係冇吖嘛，有嘅麻煩話我知點醒我）；但核突老土就係核突老土，唔會因為我睇唔到而變得好睇。

撇開少少講，早前響Facebook見到呢個「紀念帳戶代理人」同埋「過世後刪除帳戶」選項，其實諗咗好耐，到呢一刻都仲諗緊死後應該係keep住帳戶定係剷咗佢好。

講真生前已經透過Facebook煩咗咁多人，死後仲煩住人咩？而且死後歸無係自己不過。真係要keep，又可以keep幾耐？Keep到Facebook執笠？人類滅絕？宇宙崩塌？但係……如果剷咗，萬一真係有人想睇，又真係會睇唔到。唔係話自己咩，但難保有人會想懷念，都要顧及佢哋嘅感受。所以未有定案。

我理想嘅葬禮其實應該係點呢？首先呢個完全唔係一個葬禮，呢個係我人生嘅告別式，應該係懷念﹑係去評價我嘅時候，而唔係去喊，因為喊係解決唔到問題，我亦都唔會聽到。懷念﹑評價我係為咗在世嘅一班認識我嘅人，響大家嘅心目中有一個完滿嘅收尾。

所以，響我死後應該有人搞一個派對，呢個「最後派對」同你搞生日party冇乜大分別。party係開心嘅，可以玩可以影相，因為我希望大家開開心心去迎接我嘅結束，祈求一吓希望我可以有另一個新嘅開始（咁雖然我唔信有afterlife，我都係人都希望有嘅）。有一個環節，所有人可以響度發表佢對我嘅感想﹑諗法﹑無論係正定負都冇所謂，最緊要夠真。而我都會響死前錄一段錄音，去主持呢個派對，令大家覺得我好似未死咁，雖然來賓都應該會俾我嚇死……雖然唔係想有啲咩教育意義，但都希望大家透過呢個party感受到要珍惜生命，活在當下。最後大家嚟一個大合照，完滿結束。最後火化嗰啲可以搵最親嗰幾個撳掣撒灰就得，一切從簡。但如果我仲後生嘅就心肝脾肺腎眼角膜捐得就捐唔好嘥。

不過同而家坊間嗰啲「最後派對」唔同，呢個party唔係我生前搞嘅，要係真係我死咗先搞得。原因係一來我覺得人都未死就講拜拜，咁搞完之後我有排都未死咪好怪？中間仲見唔見好？唔係死後搞都唔知幾時搞先啱timing？二來查實係我面皮唔係好厚，唔敢面對大家嘅真心話。

最後利申︰我怕死，非常珍惜生命，而家完全唔想死，寫呢篇嘢只係想表達我嘅睇法。