「我在昨日為何遲未說出⋯⋯」

心中想告訴你那些話？

花紅季節 (簡稱「花季」) 過去，又係音樂椅遊戲開始嘅時候。有諸事八卦嘅同事，上咗公司御用嘅招聘求職網站度搵，發現公司突然刊登咗十個八個 openings ，對號入座之下，邊啲同事遞咗信、準備起身，真係一目了然。

良禽擇木而棲，邊棵樹大樹好遮蔭，又多啲好食啲嘅果實，有能力嘅同事自己蟬過別枝。不過都唔係人人主動搵工嘅，同事 Lily 就話，佢本身喺公司做得開開心心，好地地唔會搵工跳槽。佢遞信，係受咗刺激先至被動地開始搵工嘅結果。

Lily 算係公司「青訓產品」，由 entry level 做起，本身人工當然唔貴。佢喺公司做咗一段時間，不至於話光芒四射，但係表現四平八穩，都係一個相當不俗嘅 team player 。之前聽聞佢老細已經講過，話想升 Lily 職、加返佢人工一兩成，算係回饋 Lily 嘅肯學肯做。

殊不知，過年前後， Lily 同我講話公司冇預到 budget ，走數。咁我唔知道邊個位斷咗線、甩咗手啦，反正 Lily 失望之情溢於言表，差在未咇兩滴眼淚出嚟。咁我作為花生友，就梗係好客觀持平咁話：

「你出去搵下工，試下水溫，睇下其他地方畀咩價位你？」

條數係咁計嘅。原本做緊嗰份工，係咪都有得繼續做落去，公司亦對 Lily 坐定粒六，覺得唔加人工，你最多咪冇咁準時返工，但工作就仍然有人做。如果要打破呢個悶局， Lily 必須有其他籌碼在手，迫公司埋枱傾。

結果呢，有麝真係自然香。 Lily 未到復活節已經有外面嘅 offer 喺手，人工仲要加三成添。呢個時候，公司老細先至發現頭痕⋯⋯

如果唔 match offer 呢，喺街外請第二個人返嚟，淨係熟習公司內部系統同流程都要兩三個月先上手，而且請有幾年經驗嘅人返嚟，人工隨時比起加 Lily 三成更高。

如果 match offer 呢，表面上就叫留住 Lily ，但係本來加一兩成就可以做到嘅事，而家要「一成加兩成」先做到，豈不是荷蘭銀行支票 (holland bank cheque ，好撚笨柒) ？再者， Lily 離心已成，除非公司好狠地加入「鎖你一年」作為加薪嘅條件 (即係，一年內辭職要賠錢) ，否則，呢頭加完人工， Lily 轉身射個三分波，攞住新嘅月薪去搵份更好 pay 嘅工作，就真係為他人作嫁衣裳喇。

公司進退維谷，只因當初冇兌現承諾，為咗慳嗰少少員工薪水，而家要花額外嘅資源 (HR 出 Job Ad 、 Line Manager screen CV 、安排面試、 Handover) 去補鑊，可謂得不嘗失。不過如果公司唔改變本身對於人才嘅睇法，覺得任何基層員工都係可以取代的話，呢啲賺頭蝕尾嘅情況只會繼續發生。