復活節假，收到兄弟 WhatsApp (完)
Vien 聽到，即刻靜左一靜，目瞪口呆。
Barnes 再點點頭，強調多次：
「我地離婚。然後你同 Wallace，就終於可以有情人終成眷屬。」
「雖然過左咁多年，過往既時間已經追唔番，但係你地以後仲可以有美好既將來。至於樂兒的話，可以既，咪跟番我，你地可以探佢囉。」
Vien似乎亦對呢個條件，覺得相當吸引，進入左沉思當中。
我突然又諗番起Barnes係車上面同我既對話：
「記住，我會儘量去滿足Vien 既條件。你都儘量去滿足佢啦。因為我知道你咁多年都係鍾意Vien 既。」
「你對我咁多年既……咁多好事多為，雖然係咁，都算無功有勞既……依家都仲想要番個女既，好，好呀……」
Vien 直頭仰天咁慘笑左一下，把聲線可謂係有 D 難聽。
「我同樂兒會移民加拿大。你地得閒可以黎探我地。」Vien 都未及回答，我就睇準呢個時機，趁機踏前一步，發話：
「不如都俾我講幾句？」
我個電話呢個時候震左一震，顯示左有一個Message，但係我只係睇一睇就無再理。
「你地咁多年都係咁，自己係度決定晒所有野。你地究竟有無理過我感受？」
Barnes 同 Vien 好明顯無諗過我會係呢個重要時候提出一個咁樣既詰問，表情都顯得大為錯愕。
因為係佢地眼中，Wallace即係我，一向都對佢地如此咁Supportive。
「Barnes，你結婚咁多年，依家話離婚 OK，無問題。離婚係你地兩個人既問題。但係你點可以話將Vien 塞俾我就塞俾我？呢個世界邊有咁兒嬉？仲有，你話帶走樂兒就帶走樂兒？依家呢 D 叫交換條件？有無咁簡單？」
Barnes 嘗試努力做眼色叫我唔好再講，因為正如佢岩岩係車上講，應該要盡量滿足 Vien 既所有要求。但係我完全無理佢，惡向膽邊生：
「Vien 你亦都係一樣。話要我既，當初你就唔好同Barnes 一齊啦，你點解又要同佢一齊，生埋仔女，到依家先後悔到要爆發呢？我唔明囉！講到尾，你咪又係一樣當初因為Barnes 條件比較好，而最後都係係陰差陽錯既情況下揀左佢？」
「我覺得識著你地咁耐，真係倒左我二十幾三十世既霉。」我正式宣布：
「我諗人真係唔應該活係過去囉。我想講，Vien ，我一早就已經唔再鍾意你。請你唔好再誤會。」
「Wallace，你點解要咁講！」Barnes 更加無預料到我會突然間發射核彈，想衝過黎阻止我繼續講。但係我偏要繼續：
「Vien ，你果晚咁樣對我法，我想講，你已經唔再係我識既Vien ，你咁樣挑撥我同Barnes 咁多年之間既感情，你真係好下流，甚至令到我覺得你，有 D Cheap。」
「你地完全無諗過樂兒，亦都真係好自私。」
Vien 聽罷，接近一下子發狂，只見佢成個人好似猛獸獵殺敵人果陣一下子雙手亂舞撲起，然後身形一閃，就已經拎起身後果把生果刀。
「Wallace，我再俾你講多次，你究竟有無鍾意過我，你究竟依家仲鍾唔鍾意我……」
我向佢一步步進迫：
「大學既野，無謂再提。依家，我真係當你朋友。但發生今次既事以後，我地可能連朋友都唔再係囉。」
「面對現實啦，Vien。」我陰側側咁樣拋下一句。亦都絕對唔會理會佢究竟有幾心碎。對住一個咁樣既癲婆，我何必仲要同佢咁客氣？
我覺得我係呢一刻，已經受夠。
Vien 面上浮現左一種較旁人單靠紙筆都無法親歷其境想像到既絕望同埋灰，只見佢下一個動作，並唔係想拎起刀，對住我或者Barnes 猛刺，反而係將刀口向住自己。「既然係咁，Wallace，我已經諗唔到其他活著既理由。你唔鍾意我，即使我為你做左咁多野。咁樣，我唯有依家就同你講再見。」
Vien 突然之間萬念俱灰尋死，的確，發展至此，唔會係 D 咩人既意料之外。正當Vien 想用把刀向住自己個身一下子就插入去果陣。Barnes 亦都發出左一陣尤如老狼喪子既哀鳴，即刻衝向Vien 前面，希望能夠阻止今次既悲劇……
但係佢僅僅遲左一步，甚至更少，四分一步。Vien 既嬌嫩既身軀，就係把刀所中之處，鮮血狂噴，情況極為駭人。把刀仍然留左係Vien 個身體之上，而就係Barnes 趕到果陣，Vien 雙手，扶住左Barnes，唔俾再進一步行埋黎：
「Barnes，老公……」
「Vien，你無事，你唔會有事，我即刻送你去醫院……老婆……唔好……」
「俾我再一次叫你老公。然後，我地就結束所有野。」Barnes 亦都估唔到，Vien 係呢個時候，竟然用左人生生命最後一分力，向Barnes 大力一推。
Barnes 完全無諗過Vien 會到最後都咁樣對佢。一個企唔穩，佢往後便倒，後腦撞左落去幾步之遙後既一個玻璃櫃，然後佢就此，仆地不起。
Vien 流血既速度，慢慢咁樣緩慢落黎。但係好快大廳都彌漫住一種令人極之感到為之發毛既血腥味。係咁既情況下，我當然只可以第一時間報警。等警方黎處理呢一件事。
樂兒仲係上面，佢有可能一下子就痛失雙親。
我任由警方帶走我。開始接受一連串長時間既調查同埋問話。
Vien 送院之後，因為流血過多，證實死亡。
至於Barnes 既後腦受到強大撞擊，一直昏迷不醒，醫生係目前為止，難以判斷，究竟Barnes 幾時先會醒得番。
我係我既證供之中，對一切野都都接近並無遺漏，一五一十講出。Vien 同Barnes 感情唔好，今次Barnes 離家出走，到佢返黎，想搵我幫手，同Vien 調解，但因為調解不遂，Vien 自殺，而Barnes 係救佢既途中，出左意外，我係過程中，並無任何既動作。
警方係搜證中，發現中Vien 長時間服食精神科藥物。而警方亦一度有懷疑，我可能係意圖殺死Vien 同Barnes 既兇手。動機係向 Vien 求愛不遂同埋謀取Barnes 既家產。但係後來佢地發現左大廳既閉路電視片段，從中了解到成件事從畫面既來龍去脈，佢地最後無向我落控告令，就將我釋放。
我係被羈留其間，問到樂兒既情況。
警方話，佢依家被社會福利署看管，佢之後要邊個成為監護人，要由法庭決定。我諗我下一步，就係要申請我自己成為樂兒既監護人。我一定要承擔起照顧樂兒既責任。
後來我仲同張軍聯絡左一次。佢亦都係度忙於同Barnes 其他同事係度處理緊Barnes 公司既事。
我首先向佢道謝：「首先多謝你可以把家中的閉路電視重新開啟了。否則，我可能真係會被控謀殺。」
「唉。真是悲劇。但這個悲劇，不能波及更多無辜的人。」張軍倒抽一口涼氣之後，照例又點起香煙狂吸狂噴。
「我會打算在Barnes 昏迷的這段時間，申請我自己成為樂兒的臨時合法監護人。不知道你可不可以都幫忙一下。」
張軍點點頭。「這段時間也真的會辛苦你了。」
「這已經是我可以為Barnes 和Vien 做最後的事了。」
「唉。為甚麼會這樣子。我從閉路電視看，Vien 為甚麼突然就發狂起來了。真可怕。」
我無回答佢呢個問題。只係擺擺手。
「女人的想法，又或者是這樣說，人的想法，有時真的很可怕。」
「樂兒今年，多大了？」
「應該是五歲。」
「你呢？」
「我和Barnes 和Vien 同年，二十八歲。」
「不要緊。樂兒十八，廿八的時候，你還只是剛過四五十，你可以撐得來的。做個好爸爸吧。」
我笑左一下，跟他碰左碰杯，然後我同佢將杯上既啤酒一飲而盡。
我臨番屋企既時候去左社署既兒童託管中心。中心既姑娘話，樂兒既情況算係穩定，而且對於Vien 既離逝，無表現出太大既情緒失控，比想像中要好一D，可能同Vien 生前對佢唔太好有關。至於Barnes，樂兒對佢既感情仲要更加疏離。反而樂兒一直都問我究竟幾時先去探佢。
「咁佢依家點？」
「訓緊晏晝覺，但係你可以入去等佢醒，然後同佢傾下偈呀。」
房間入面，樂兒一個好似洋娃娃咁樣訓左係，大字型咁樣趴左係床。我拖一張凳坐低，慢慢端詳樂兒既面孔。佢有住空氣既留海，圓臉蛋，當然仍然相當稚氣，但輪廓上亦有Vien 既秀麗，同埋亦繼承左Barnes 既一份英氣。
我輕輕咁講左一聲：「樂兒，以後，就係我地相依為命啦。」
（復活節假，收到兄弟Whatsapp，全文完）
2019 再刊後記
呢篇野係一時興起係2017年既復活節連登講故台用左另一個筆名去寫。真係唔長，只係得大概三萬字。因為一開始已經諗到個流程點去，所以寫得非常輕鬆。
因為 阿擇 （Chaaak）操控粵典既加持之下，個故雖然短都結果俾人推爆左三千幾個 Post ，有過千個正評。點解一開始個 Setting 有啲似甜故呢？就係因為你係連登寫故想有人睇係一定要有啲野引人入坑先，只要佢地落左疊，之後任你擺布，有無甜佢地都只能夠硬住頭皮追落去。呢個就好似少年 Jump做連載要有啲引人入勝既要求，其實一樣。
如果要講呢個故事有咩中心思想，我諗都係最基本果啲「岩既人唔岩時間」果啲命題。最愛既人同結婚既人往往都唔係同一個，之類。但更重要我諗我想帶出既都係，唔好只係掛住賺錢係物質度滿足其他人甚至係終生伴侶既需要。情緒病真係好似城市既隱形炸彈一樣，隨時會爆炸。大家都應該多關心日常生活中情緒有啲不穩既身邊人。Vien 有病其實唔係一朝一夕，亦都係故事早段有描寫佢一啲焦慮既病徵。當然，可能太Subtle 或者自己功力太差所以你地睇唔到。（建議可以重睇多次架 LOL）
認真講一句，及早接受治療真係重要架。雖然小說就有啲戲劇化處理，但係日常生活因為情緒病而引起既慘劇亦都比比皆是。
至於到最後，連登人好多係度討論主角 Wallace 係咪處心積累其實想得到樂兒，而佢得到樂兒係想出於好意定係別有用心，呢個所謂既 Plot twist 就 Open end 算啦。有時都係為左故佈疑陣架唶。我寫果陣好似無諗過呢個問題……LOL
Anyway，大家睇過覺得都唔錯可以拍拍手。如果想睇更多我寫既散文或者小說就要 Follow 我啦！下次再見。
>> 覺得文章不錯請多多支持／分享
>> 到 Profile Page Follow 我
>> 去我 Facebook Page 交流