小男人周記３影評－－不含劇透

今日睇咗一套叫《小男人週記3之吾家有喜》嘅電影，想講返兩句。

按：原文寫於 2017年2月5號，係我第一次參加「傲嬌黨新年睇爛片」之後寫嘅

後生啲嘅觀眾未必知，其實《小男人周記》係三十幾年前嘅經典廣播劇（即係喺收音機定時播放嘅連續劇）。貼地得嚟不失故事感，紅到改篇咗做電視劇，出咗小說，拍咗兩套電影。本小說係袋裝書嘅代表，據講本本銷量過萬，係一代人嘅回憶嚟。

經典嘅故事隔咗咁長時間，再拍一套新戲效果會點呢？好多朋友係抱住睇爛片嘅心態入場：有一堆爛戲嘅元素：大胸女主角s（至少兩個，另外兩個唔知），上畫前幾段超爛gag短片，名作續集，蕭定一（大家仲記唔記得3D肉蒲團？）；我就多少有啲期待嘅。

撞正賀歳片檔期，網上宣傳嘅定位，將呢套戲包裝成一套金句式、狗屎垃圾斬埋一碟嘅喜鬧劇，又或者係《世界零距離》－方東昇＋詹瑞文×王晶。用「我要睇完笑到碌地」嘅心態入去睇，你一定會好失望，因為入面啲gag喺trailer度已經俾晒你睇咁滯。呢套根本唔係笑片，而係一套溫馨小品。如果要比喻嘅話，大概有啲似睇輕鬆日劇（例：逃恥 a.k.a. 月薪嬌妻）嘅感覺，你明知一切都會大團圓結局，但係睇嘅途中會覺得自己同主角有啲相似，入面遇到嘅人又好似自己啲朋友噉（性格，唔係身材），會有好強烈共鳴，會想為主角打氣噉。唔會睇到你喊，不過都會有種溫暖嘅感覺。當然，小品意味住唔一定係完整故事，主線唔會特別明顯，訊息、大道理都欠奉。睇開戲嘅朋友，未必接受到咁淡茂茂嘅情節；但係放低評戲嘅心態，睇完會有種舒暢嘅感覺。

如果係冇睇過之前兩集嘅話，睇完之後你好似覺得，喺Facebook／IG度follow咗啲角色，知道咗佢哋生活，見到佢哋開心自己都開心埋一份噉；如果你好熟原本嘅故事，呢套戲實在係必睇之作。因為佢係原本故事嘅外傳，好似一班老朋友廿幾年冇見，睇返佢哋近況噉，好親切，仲有啲感動添。

評價：★★★★1/2