【實測：究竟Medium一個月抽幾多水？】& 【美國新玩法「和你交稅」又打擊作者】
一、美國新玩法：「和你交稅」
相信大家呢排都收到Medium官方email：
In order to comply with US royalty tax requirements, starting in 2020, we will withhold a fixed percentage of future earnings from all non-US-based, non-resident alien writers.
（從2020年開始，Medium要從稿費中扣起一部份，作為美國版權稅。）
首先，作為一個寫手，我地就係文章「版權持有人」。一個「版權持有人」靠版權賺錢，理論上需要交稅。至於大家會唔會主動向稅局申報，話你係Medium賣文賺錢，就係另一回事。
問題係，我地應該繳交邊個國家既稅呢？呢一點，個個國家既稅制唔同：（1）有D國家認為，果件作品係邊度生產，就要交邊度既稅；（2）有D國家依據果件作品賣去邊，黎決定交果度既稅；（3）有D國家以「版權持有人」既國籍為考量；（4）有D就以幾個因素mix埋一齊pro rata去計……總之各處鄉村各處例。
美國行「全球稅」政策，只要你係一個美國人，就算去火星做生意/打工賺錢，都要向美國政府交稅。一直以黎，佢地只會向美籍Medium寫手收版權稅。而家，進一步向非美籍人士埋手。首先營運Medium既「A Medium Corp.」係一間美國公司，所以呢個網上平台，都等同美國領土。任何人靠Medium賺錢，等於係美國領土搵食。所以，美國政府就有權問你拎「過路費」喇。
至於要交幾多稅？係跟作者國籍而定。香港人要畀30%！三成！
台灣朋友一樣都係30%，中國人就10%。至於持有其他國家護照既朋友，請自行睇返Medium個Partner Program dashboard確定。
由2020年開始，Medium會預先扣起稿費既30%，代你交畀美國政府。剩底70%就如常入落你地Stripe戶口。以我所知，香港/台灣都無同美國簽稅務互相括免協議，所以呢30%畀左，無得申請退還。
Well，Medium既華文讀者已經唔算多，稿費自從11月開始轉新制 已經水瓜打狗，唔見一截！（新制係讀者reading time vs 舊制「拍掌」次數）而家美國政府仲要叉隻腳埋黎，個個七折收錢……
唔知大家仲係咪咁有熱誠同意欲，繼續留係呢度寫落去呢？我誠邀大家留個comment，畀個意見。另外，請問前輩，有無其他平台係專攻華文讀者可以介紹返呢？
二、Medium新稿費演算法，違背文明
講起新稿費計算方法，打個比喻先：
- Medium每個月固定地派一百個金幣畀每一個付費會員去獎勵寫手。
- 以前讀者主動打賞，拍得掌多就分到多D金幣。
- 而家跟閱讀時間去計稿費。假設篇篇長短一樣（理論上閱讀時間都一樣），（a）一個會員每月讀十篇文，不論佢覺得文章寫得好唔好，每篇文可平均分到十個金幣；（b）如果佢讀一百篇文，每篇不論好壞都只可以分到一個金幣。
細心諗下，新機制都幾唔文明、違反人性。一個寫作平台唔係應該鼓勵讀者睇多D、讀多D既咩？但係，而家閱讀興趣越廣泛、係Medium睇既野越多既會員。每一篇文可以從佢身上賺到既錢就會越少。咁對佢跟開/心儀既作者好不利。會唔會令佢跌入兩難既處境呢？
以前，佢就算周圍click，佢識得拍多D掌畀心儀寫手就OK。而家Medium「公平」左，會員無得偏心獎勵呢個、唔獎勵果個。粉絲們周圍click肯定會令「偶像」賺少左。會唔會令粉絲為撐偶像而減少閱讀？從而阻住廣泛閱讀既風氣？
有前輩寫手話，新制度係「劫富濟貧」，令資源更加平均分配，避免會員只clap一小撮出名既作家。但唔知點解，我呢D入門級都無受害。本身已經少得可憐既稿費，上個月更加少。原先都無諗過可以靠Medium維生，估唔到想買個豬柳強都咁難。
三、最後，大家最關心既題目：「究竟Medium一個月抽幾多水？」
上個月，我做左個測試，測試一個付費會員一個月有幾多錢可以分畀寫手。方法如下：
- 特登開一個新account，畀$50年費（美元，下同）。
- 分身account每日睇五篇我既舊文章。每篇計時，大約睇一分鐘，只睇不拍掌。唔睇其他野。
- 總結十一月，分身account睇左80篇文。Medium付出稿費每篇$0.01–0.09不等，總共獎勵左$3.40出黎。
- 十二月頭十日，分身account睇左35篇文。Medium總共畀左$1.02出黎。
分析：
- 縱使閱讀時數控制住每篇大約一分鐘（+/ — 5秒），但我發覺每篇文章所得之稿費並唔一樣，由$0.01至$0.09不等，唔會超過$0.10。
- 深入分析返，少D錢既文章，字數都係比較少既，但字數差別又未至於同稿費成正比。相信Medium演算稿費果陣，會考慮埋文章字數。
- 以Medium年費$50計，平均每月會費$4.17。測試結果顯示，Medium一個月分$3.40出黎，大約81.6%。即係話，Medium抽水18.4%。
為左收集多D數據，呢個測試會繼續。不日update大家。
(2019–12–10)
傳送門：西米Go短評 #001–100，#101–200，#201–300
傳送門：左膠/右翼，亦曾經投下唯一反對票