「如果唔想做記者，讀新聞系」

同樣地，如果想做記者，唔好讀新聞系。 ​ I’m not trying to be funny ，至少，香港第一大電視台無線電視已經更有趣地回絕本港各大專院校嘅實習生申請。無論中大、浸大、樹仁定珠海，今年都唔會有人去無線實習。原因？好似係留返啲位畀大陸實習生喎。

曾經，喺香港讀新聞系都算係一種值得炫耀嘅成就。女仔入新聞系，將來有望做「新聞之花」，男仔入新聞系，大把機會食未來新聞之花。講笑啫。但往日新聞系人材輩出，魏綺珊、黃德如、方東昇等響噹噹名字，盡皆新聞系出品。

喺無線新聞仲好有公信力嘅時代，新聞系學生對於去無線做實習生都趨之若鶩。「無線電視記者 (把聲撚高半度，停頓半秒) 乜乜乜報道。」呢句 sign-off 喺五六百萬人前出現，簡直光宗耀祖啦。直至走在新聞最前線嘅有線新聞出現，情況先開始有改變。讀新聞系同做記者之間嘅關係，亦隨住趙海珠、林燕玲 (以至何守信、朱慧珊) 等成為新聞主播而開始脫勾。

報新聞唔使讀新聞系，其實係回歸「識人好過識字」嘅香港社會基本步。當然，樣靚靚又識人更佳。有朋友做過新聞機構實習，置身於煙霧彌漫、粗口橫飛嘅 newsroom ，大學實習生嘅身份就好似溫室小花標記咁，負責湊你嘅 senior 交差了事，唔使湊你嘅就嫌你阻訂。做 intern ，與其話係學習做記者採訪實況，倒不如話學做人，試下同行家相處係咩一回事，唔對路就趁早止蝕。

講真，讀新聞系嘅生活，大部份教你點樣批判思考，上堂尤其是 tutorial 都 critical 到喊，好似 present 嗰條友係吳克儉咁，令你好有衝動 Q 爆佢。入得新聞系嘅，成績都有返咁上下，自尊心有之，競爭性有之，個個獨當一面，交朋結友邊有咁易。但偏偏出到去採訪嘅世界對人情世故要求最高，不論同受訪者嘅互動抑或同行家嘅互相配合，統統都係待人接物。再講，新聞系教嘅理論喺臨場實戰唔多用得著，採訪技巧或製作訓練亦止於入門級，除非自行深造，否則行出嚟同凡人比較，其實唔見得技高一籌。如果本行對於財經或時事一知半解，隨時比政治、行政甚至 BBA 同學仔比下去。

And that’s why I say ，想做記者，唔好讀新聞系。已經加入政府嘅無線前主播吳璟㒞，其實係讀中大 GPA (政治及行政學系) 。新聞系畢業生做記者嘅比例唔高 (起碼低過讀社工讀 Nursing 之後做社工或做護士嘅比例一大截) ，即使有十零廿個入行，過三五年後仲留喺行內嘅又有幾多個？自己數下。

講到咁，新聞系不如好似亞視新聞咁執柒咗佢？又唔係嘅。先前都講過，新聞系讀嘅理論同製作技巧都係其他學系少有嘅，透過課堂同討論，學生經歷思想嘅衝擊同學得思考嘅方法，又順便涉獵一下香港社會時事政經，畢業嗰陣難聽就「周身刀冇張利」，好聽啲就叫「通材」。呢種畢業生，同 BBA 學生有啲唔同 (詳見舊文《要是甘於平庸，那就讀 BBA 吧》，見諸輔仁) ，但又有 BBA 學生嘅 Talk 得同自信，好多行業都適合，冇指定嘅出路，可以話不受限制 (亦有說註定乞米) 。

講返實習，東家唔打打西家，無線今時今日咁樣樣，要受君之祿、擔君之周⋯⋯係擔君之憂，需要過良心一關。市面上選擇仲有 Cable 、 Now 、港台、商台同少量紙媒，如果真係咁堅決要做過記者先心息嘅，一試無妨。但記住青春有限，錯定要離手。