如何有系統地玩 Wordle

近期大家都見到好多人無端端Post一啲黃色綠色黑色格仔，加埋一個數字，一個分數咁，我諗大家都知，呢個係一隻叫做Wordle嘅每日拼字遊戲。

呢隻Game乜都唔使裝，只需要撳入條Link度就有得玩，要玩嘅嘢係你估一個五個字母嘅英文字，如果唔中就係灰色，中左就綠色，齋中字母唔中位置就係黃色。

非常簡單嘅一隻Game，但係好多人都對呢隻Game有啲誤會，以為係一隻拼字嘅遊戲。

但玩左大約一個星期之後（佢每日有一個新嘅字），我就明白，呢個係一個邏輯加數學嘅遊戲，理論上，你唔需要識任何一個英文字，都可以喺六個機會之內估得到。

首先，生字入面英文字母嘅出現次數係極度唔平均嘅，呢個世界有一隻叫做Scrabble嘅拼字遊戲，佢比每個字母都有一個分數，越高分，就代表越少出現喺生字嗰度。

1 point — A E I O U L N S T R 2 points — D G 3 points — B C M P 4 points — F H V W Y 5 points — K 8 points — J X 10 points — Q Z

但呢個得分表有個問題，就係佢係計晒所有生字長度。由兩個字母嘅 TO，到OXYPHENBUTAZONE，全部計晒，咁我地玩Wordle呢，只係需要理五個字母長嘅生字，所以直接用Scrabble嘅計分法係唔準確嘅。

我想有一個準確嘅機會率，無論係一個字母出現喺任何位置嘅機會率，同一個字母出現喺特定位置嘅機會率，我都想知道。

我上Google Search咗幾個"5 letter word list"，由幾百個字到幾千個字不等，最後，我發現GitHub有人直頭放咗所謂Wordle Word List出嚟，大概係啲Geek喺Chrome撳F12（？）做嘅。

咁人類同猿猴嘅分別係乜呢？就係人類識得用工具，所以作為人類，我將個List貼落Google spreadsheet （用Excel都得，一樣㗎啫），然後開始拆字。

咁成2315個字，人手拆梗係唔掂啦，用Excel Formula拆

=MID($A2,B$1,1)

MID 係專用嚟拆字嘅Function，$A2係我要拆嘅字，B$1係開始嘅字母，而1係我要拆出嚟嘅總長度。

即係如果拎走晒D座標，條Formula係咁嘅：

=MID("aback”,1,1)

咁拉落去之後，一秒間，抬頭望過，就已經拆好晒啦。

然後要得出每個字母出現嘅機會率，首先，就係數下究竟啲字母出現咗幾多次。

你可以用Pivot Table 做，亦可以好似我咁，用CountIF 嚟做：

=COUNTIF(Words!$B$2:$F$2316,$A2)

$A2係A，咁上面呢條Formula就可以計到喺拆好嘅Words入面（不計位置，睇晒五個Column，Words!$B$2:$F$2316），A出現左幾多次。

而要計佢喺唔同位置嘅次數，只需要收窄個範圍到一個Column，就搞掂。

=COUNTIF(Words!B2:B$2316,$A2)

之後用數到嘅數除返2315，就可以有個比較 ，知道每個生字入面，任何字母出現嘅機率啦。

用總出現機率嚟排列呢堆字母，我發現，頭九個字，即係EAROTLISN，對於其他字母係有一個壓倒性嘅優勢喺度。

喺呢度就出現同直覺違背嘅情況，我一開始都覺得，一定要試晒AEIOU先，因為每個字都一定要有Vowel嘛，如果唔係就只能讀到食麵咁嘅聲一直SHZHHSHH，但原來，U嘅出現率，係比C更低，所以如果要搵幾個開頭嘅字，U字係可以放埋一邊唔考慮住。

而家有晒啲字母出現嘅機會率，我地可以開始真正去玩個Game啦。

除非你玩Hardmode，否則，我覺得呢個遊戲係分為兩個階段，第一個階段，目的係獲取最多嘅資訊；第二階段，當你覺得資訊足夠之後，你嘗試去解答。

第一個輸入嘅生字，一定係第一階段，因為我地乜都唔知，所以策略上，我地應該用一個有齊EAROT嘅字，而呢個Word list上有齊EAROT嘅有四個，分別係 ERATO、OATER、ORATE仲有ROATE。

唔好問我呢四個字點解，頭先我已經講咗一次我唔識英文。

由於E字喺最尾嘅生字有18.23%，係五個字母入面最高，所以第一個生字嘅選擇得返ORATE同ROATE。

O喺第1係1.77%， R喺第2係11.53%； R喺第1係4.54%，O喺第2係12.05%。

結論係ROATE比較好，而且用ROATE呢個字，第一行全黑嘅機率，只有： （1–53.26%）*（1–42.29%）*（1–38.83%）*（1–32.57%）*（1–31.49%）＝7.62%

咁正常嚟講，估完第一個字，我地平均只會得到1.98個黃/綠色，好彩嘅話，有三四個黃/綠色，直接進入第二階段，但如果只係得一至兩個黃/綠色（大部份情況），咁就應該要試多另一個字，以獲取更多嘅資訊。

而試嘅呢隻字，係**唔應該**有ROATE入面任何一個字母（除非你玩Hardmode），因為每個試嘅字母都係資源，唔可以浪費資源喺一啲已知嘅事實上面。

咁排名向下有LISNCUYDHPMGB，LISNC係無字砌到出嚟嘅，而LYSIN或者SULCI都係唔錯嘅選擇，可以跟據第一個生字得到嘅Hints嚟調節，甚至乎可以下試到PMGB，但LIS一定要有，因為佢地全部都有超過20%嘅出現率。

然後要記得，試咗十個唔同字母，除咗知道邊啲字會出現喺答案之外，知道邊啲字**唔會**出現喺答案亦都係非常重要嘅資訊，而且經過再五個字母之後，我地得到嘅黃/綠色平均值已經嚟到3.28（SULCI）至3.31（LYSIN），所以到左第三個生字，我地基本上一定可以進入第二個階段，嘗試去作出解答。

咁用而家我地有嘅黃/綠/黑字資訊，去砌生字，坊間有好多工具幫到手，好多原本都係字典或者Scrabble工具嚟，但其實我地呢個Google spreadsheet （or Excel），其實都可以做到。

今次就真係要用Pivot Table啦，嚴格嚟講，我係要用盡佢Pivot Table個Filter功能。

加之前，去Word list度加多一個Column，都係Word，Data同Word一模一樣，用嚟Display嘅；之後加Pivot Table，揀返我地嘅Word list做Data Range，然後會出現下面嘅畫面：

將 Word 放落 Row嗰度，然後將 1 2 3 4 5 同另一個 Word 都放落Filters度。

咁個Pivot Table就已經Set好，可以用，例如你知道第二個字母係O，第三個字係I，而第五個字母係T，咁就喺Filters度2㨂O，3揀I，5揀T，之後個Pivot Table就會出現以下結果。

Boom，所有-OI-T嘅字全部出晒嚟，而右邊嗰行，係因為有傳聞話出過嘅字唔會再出，所以我入咗2022年所有答案入去，再Vlookup睇下有無撞嘅。

如果你得一堆黃色，就可以用Word嗰個Filter，入啲Combination落去試，佢係可以Contain any letter嘅。

然後，如果答案多過一個，例如上面個例子咁，我地S/N一定試過，所以唔係綠，都一定係黃，而機率低嘅FHJMP，如果用返上面個機率表嘅次序去撞，有三次機會，加埋仲有Past Appearance用嚟過濾咗個P，理論上都仲有機會撞唔到，都仲有機會X/6。

咁呢啲情況，我地就要返去第一階段，例如上面個例子，FOIST、HOIST、JOIST同MOIST，咁有三次，即係我可以整任何一個有HMFJ其中兩個字母嘅字嚟獲取資訊，咁無論中同唔中，都Foul走咗一半字母，然後就可以避免咗X/6呢件事嘅發生。

最後，我前排先喺Facebook講，如果我生個仔，我保證佢聽到「打機」呢兩個字就驚！我諗大家睇完我呢篇可能就會明點解。

「個普攻用咗你個GCD，點解你覺得偷嗰一下DPS會高咗！」

「攻速慢武器高爆擊點解比攻速快武器低爆擊效益高？」