「奇人異事」狗男友（二）|香港Long D

經過上次狗男友話想阿寶喺某寶網買狗俾佢，阿寶覺得太匪夷所思，完全無同理心。感覺男友只係會諗自己，集運公司係不知情送遞貨品有生命嘅情況下，同其他千千萬萬件貨物一齊送來香港。完全唔可以保證動物嘅安全。而且完全唔知道寵物有無打過疫苗，人地賣家係無見面嘅情況下講到天花龍鳳都得，收咗你錢之後佢就再無責任。阿寶由始至終都覺得某寶啲嘢信唔過，仲講話買一隻狗？一條命喎？如果送到來香港，隻狗頂唔順死咗，打開係一個死狗屍體，會唔會太恐怖？負唔負擔得起？

狗男友故事系列：

男友個思維好似生活係外太空一樣，點解會有咁嘅人。雖然當初就唔係貪男友有絕頂聰明嘅頭腦先一齊，心諗就算你點可愛、點樣似寵物狗，點樣無辜嘅外表，都唔係咁無知同自私掛？

一怒之下。阿寶WhatsApp 男友：

「喂，我有啲嘢想講。」

男友傳來一個土黃色柴犬訓係到，肚皮朝上，好似等主人摸佢嘅sticker 。

阿寶睇到，無咁好氣。完全唔知點入手。但係諗深一層，價值觀唔夾，如果再拖落去只會哂時間，頂住又辛苦。同埋男友完全唔諗其他人的話。容咩易有一日阿寶自己有咩事，就算唔係男友造成的話，佢都會唔理阿寶，自己走咗去。搞唔掂喎師兄。

最後阿寶鼓起勇氣提出分手。狗男友就如預期中，思維在外太空一樣，對所有理由聽唔入耳。不斷試圖用各種方法聯繫阿寶。

作為一個普通女仔有幾個ig係好正常。一個要嚟post私人嘢，只係俾最熟嘅朋友follow；一個要嚟俾同事、家長、親戚follow；一個要嚟留黑言，講衰嘢攻擊人都唔想俾人起底，開一個帳號專係留黑言係最基本嘅自我保護動作；一個要嚟追星，現實生活認識嘅人，未必會想知道阿寶追個嗰星有咩動態值得出post討論。所以又要另一個帳號。到底仲有幾多個ig？應該阿寶自己先知。日日要睇幾個帳號都幾唔得閒。

而不幸地，狗男友竟然知道哂上述四個，所以逐個逐個DM，希望阿寶有日會回心轉意。

有見及此，阿寶所有嘅帳號都block哂狗男友DM嘅帳號。之後狗男友見再send唔到dm，又再開一個新帳號，輪流轟炸阿寶嘅ig。一block又開一block又開，好有恆心不斷搵。唔單止係ig，就連電話sms、whatsapp、Facebook、line、 kakaotalk、微信都有去dm。如果佢有咁好心機去讀書增值自己，得到嘅回報應該仲有成效。

另一邊廂，阿寶完全防不勝防，唔知道邊一個通訊app會突然間俾人轟炸，唯有見一個block一個。有諗過係咪應該搵一個機會，一次過講清講楚。但諗到一開始就唔係因為有志同道合嘅靈魂先會一齊，係純粹唔理性嘅荷爾蒙影響。

狗男友身高180，有大眼睛，挺直嘅鼻樑，面圓圓，笑起上嚟令人覺得人畜無害。而且天生骨架大，唔洗做gym都有一個大膊頭。乍看之下都係一個賞心悅目嘅靚仔。但係人邊有咁完美。有好睇嘅外表唔一定等於有好嘅內心。

男友想扭計要阿寶大陸淘隻狗，就好似普通買其他死物一樣，放入紙箱咁運來香港。都仲未計會鼓勵大陸惡劣嘅寵物產業鏈，為求大量生產初生寵物，未必會提供良好活動空間俾作為商品嘅動物。同埋運送途中唔好彩死咗，咁佢會唔會自責自己嘅決定？

諗到男友思維除咗佢自己之外，似乎無諗過其他問題。阿寶就疊埋心水，見一個block一個就算，唔想浪費心機同破壞自己情緒去解釋同說明。

直到睇到一個dm內容。

又用狗仔sticker。。。到底好唔好意思。。。

重點係你要求箍煲點解會係你定時間地點？

阿寶住屯門、狗男友住調景嶺、啱啱好就係成個地鐵版圖一頭一尾。

男友應該覺得：「你住咁遠，我哋打個和約係中間 – 旺角，咁好公平啊！」

好似住屯門嘅人同其他地區嘅人約出嚟，佢哋都會覺得係屯門人有問題。約中間唔叫你去觀塘或者過海已經係益左你。

本身個邏輯已經係錯，咁難委你咁不如唔好見面。你係屋企坐係到仲舒服啦。

但係依家你要求箍煲，仲要嫌人住得遠，要約中間。會唔會太搞笑？不如你係屋企訓下先。話唔定訓醒會有條女從天而降俾你呢？

阿寶見到之後笑一笑，好彩一早止蝕離場。果然無令人失望。男友從頭到尾都係諗自己。

• 故事純屬虛構，如有雷同實屬不幸。

歡迎拍手！likecoin！