國際合規新聞報道@規佬筆記(11)
2020 年 8 月 16日 — 2020 年 8 月 22日
2020 年 8 月 16 日
來自馬來西亞嘅消息。
豐隆銀行推出 “HLB Pocket Connect” 手機 App ，話係當地首個親子理財暨零用錢手機應用程式咁話。
其實香港都有啲銀行推出過啲咩「智多 Kid 」之類嘅兒童戶口，前提係父母幫小朋友開。
咁豐隆呢個小朋友戶口本身都係大同小異，但係就加入咗 Visa Debit Card 畀小朋友，等小朋友唔使帶現金喺身，而父母亦可以透過手機 Top-up balance ，亦可以規範佢哋消費嘅範疇。
另一個特點，係父母同小朋友可以協定有啲咩任務，例如執拾睡房或者掃地之類，完成任務就有額外零用錢。 (雖然咁樣真係好咩？)
咁當然，手機 App 會有儲蓄提示功能，培養小朋友理財同累積財富嘅觀念啦。呢啲特色都幾以人為本，值得香港啲 FinTech 公司借鏡。
Source:
2020 年 8 月 17 日
星期一，大家有冇準時返工？
嚟到八月中，規佬本身最期待嘅 VB mox (渣打、電盈同攜程一齊玩嗰間) 終於話月內開業。
問題係，定期存款同借錢有 ZA 同 AirStar (雖然 AirStar UX 真係好一般) ，消費卡 (Debit Card) 亦有 WeLab 同 Livi 進駐。第五間入場嘅 Mox ，仲有咩賣點呢？
你話回贈直接入帳， okay 但回贈率幾高先？ WeLab 推廣期內 8% (capped at $240) 喎。呀又，規佬終於收到 WeLab 張卡喇，手感冇想像中咁差， packing 算有誠意。 Mox 要急起直追喇。 (有冇人想睇開箱文？)
又或者， Mox 嘅殺手鐧始終係同渣打合作，尤其是專攻投資理財業務，畢竟渣打目前喺呢方面都麻麻地， cannibalization 嘅情況冇咁嚴重。
大家唔係等緊規佬講嗰單「銀行界人士表示」、關於中港高官受制裁用唔到信用卡、 e-Banking 同 FPS 嘅新聞吖嘛？有咩好講啫，之前都講過啦。學劉兆佳話齋，「咁大個國家，點會照顧唔到自己啲官員？」
嚟，睇遠少少。英國脫歐過渡期至年底屆滿，但係英國金融機構同歐盟之間一直都未傾掂數。歐盟委員會就話，未來幾個月都自顧不暇，叫倫敦再等下，或者同個別歐盟國家自己傾住先。
歸根究柢，英國金融界面對嘅尷尬處境，源於歐盟金融體系本身，係單向承認一個國家係咪「相等」 (equivalent) 嘅。於是，歐盟同英國嘅脫歐談判，根本冇處理過呢個問題。
而英國想以非歐盟成員國身份，重新進入歐盟單一市場，就要布魯塞爾審批。但咁啱咁橋，歐盟內部都有關於投資公司嘅新法規落實緊，各成員國自己都仲落實相關條文，所以英國嘅申請就要再等一會。
雖然歐盟委員會話英國同每個成員國逐一討論，但其實歐盟 27 國每個國家嘅金融體系都各有不同，英國嘅銀行同基金經理要繼續喺其他歐盟國家營運，面臨相當大嘅挑戰。
Source:
2020 年 8 月 18 日
[春風拂檻露華濃]
你有冇試過轉帳入錯戶口號碼，嚿錢畀錯咗第二個？
花旗表示，我試過，我真係試過。日前佢哋誤將九億美元嘅款項匯出，喺華爾街引起一場軒然大波。
呢個錯誤係點樣發生嘅呢？暫時都未有確實答案。但故事嘅背景就總算有啲眉目喇。
事緣 Citi 喺 2016 年幫化妝品牌 Revlon (露華濃，出自李白《清平調》，當年啲改中文譯名嗰位人兄文采真好) 安排銀團貸款，作為收購同業 Elizabeth Arden 嘅資金，交易作價 8.7 億美元。
但係露華濃近年生意認真麻麻，加上疫情衝擊，令呢筆貸款喺市場上嘅報價由 77 跌到得返 26 ，一班債主想收返本金睇嚟凍過水。
呢班債主包括對沖基金 Brigade Capital 同 Symphony 。令佢哋更加嬲豬嘅係 Revlon 以公司嘅知識產權作為抵押品，喺舊年同今年另行獲得貸款。債主認為 Revlon 偷取 2016 年嗰筆貸款嘅抵押品，向 Revlon 及 Citi 興訟。
尷尬嘅係，喺債主提出起訴嘅同時， Citi 就神推鬼恐咁將貸款連本帶息咁原銀奉還。由於 Revlon 並未還錢， Citi 呢九億美金係自己錢嚟嘅。
Citi 原本只係想向債權人畀利息，但唔知內部點樣批下批下就批咗本利歸還。其中 Brigade Capital 理應收係收 150 萬美元利息，但就收咗 1.75 億美元嘅本金。
報道話， Brigade 覺得自己係債主兼原告，所以收咗錢就奉旨唔還。 Citi 就話 Brigade 路邊拾遺，損害銀行系統嘅信任，向 Brigade 作出起訴。呢粒露華濃花生，認真惹味。
Sources:
Softbank 有份投資嘅美國網上借貸平台 Kabbage (同椰菜諧音) 宣布賣盤，買家係 American Express (Amex) 。呢單係肺炎疫情爆發以來，第二單網上中小企借貸平台併購交易。
Kabbage 本身集中向中小企借貸，並且將貸款打包 (證券化， securitization) 賣出去，單計 2019 年就借咗 28 億美金。由於呢啲貸款組合已經賣走咗，就唔關呢單併購事喇。
受疫情影響，美國啲中小企哀鴻遍野，連借錢都免問，因此 Kabbage 今年四月中止貸款業務，改為協助聯邦政府處理中小企 Paycheck Protection Program (類似保就業資助計劃) ，處理咗超過 30 萬宗申請，涉及款項達 70 億美元。
Amex 本身喺中小型公司嘅 corporate card 佔四成市場，而家同 online platform 融合，相信有助為商戶提供貸款、資金周轉、現金流管理等服務。不過股民似乎麻麻地朋落， Amex 上日股價跌近 3% 。
Source:
今晚半夜打風，大家係咪諗住追風，盼待聽日唔使返工？ (Work from home 之下仲有咩分別啫？)
咁呀，又畀多單 FinTech 新聞大家望望。
疫境之下，除咗企業自身難保，個人生計都大受影響。咁大家或者會諗：網上貸款平台，尤其是做 P2P (peer-to-peer) 嘅，會唔會寧舍多爛帳？
調查發現，係唔會嘅。雖然行內不良貸款比率由 6% 一度升至 16% ，但最近已經回落到 9.7% 。呢個增幅，其實比起信用卡或按揭低。
想知點解？又或者，想知多啲咩叫 P2P ，背後點運作，點賺錢？唔想一味聽大陸啲 P2P 平台爆煲？留個言畀規佬，多人想睇我就寫多篇啦。
(更新：文已寫，今晚九點半見)
Source:
說好的九點半出文呢？
是咁的，我喺 Patreon 較咗時間掣，但係冇留意佢 set 咗聽日⋯⋯所以遲咗， sor~
講返正題，傍晚 share marketplace loans impairment ratio 增幅低過預期，唔少讀者都想知點解，甚至想知道究竟乜撚嘢係 P2P 借貸平台。
既然係咁，我做多少少 research ，喺 Patreon 同大家分享啦。
//
[點解外國 P2P Lending 喺疫境下居然冇爆煲？]
Link: https://www.patreon.com/posts/40586739
P2P ，全名係 Peer-to-Peer 。 P2P leaning platform 同 Amazon 、 Google 一樣，都係互聯網時代嘅產物。梗係啦，如果冇 internet ，去邊度搵中間人幫手配對借貸同出資嘅需要？
其實又唔係冇嘅，嗰個地方大家都好熟，叫銀行。銀行，咪就係接受大家嘅存款，然後將啲錢借出去畀有需要嘅人或者公司囉。傳統上，銀行就係靠賺取息差維生嘅。
不過，大家近年都知道銀行嘅存款利息可以有幾低。就算做定期，喺銀行唔等錢使嗰期，真係隨時一厘息都冇 (年利率，下同) 。另一方面，需要資金周轉嘅人，要搵銀行或者財仔借 P-Loan (Personal Loan) ，息口通常都唔多 friendly ，郁啲就十幾廿厘息咁，你都咪話唔頭痕。
- — -
直入式廣告：《中環攻略》電子書，五萬字帶你遊遍銀行金融界
#hk #hongkong #blogger #penana
2020 年 8 月 19 日
早前舉行「恒馳」電動車發佈會而成為股壇焦點嘅恒大健康 (其實聽日過埋股東會就改名做恒大新能源汽車) ，再次被 SFC 點名股權高度集中。
之前規佬約略講過 (https://www.facebook.com/110926477308079/posts/158243309243062/?extid=BK4C2LNX63Mg7y07&d=n) ， 2015年嘅時候，恒大同 18 名股東合共揸住超過 93% 嘅股份。
嚟到今年八月五日，原來街貨仲乾咗，得返 5.18% ！證監就提提大家，少少交投已經足以令股價大起大落，請小心行事。
Source:
https://www.sfc.hk/web/TC/files/ENF/HighCon/c00708200819.pdf
2020 年 8 月 20 日
因為涉嫌造假帳而股價蒸發超過九成而面臨成為首隻倒閉嘅德國 DAX 指數成份股 Wirecard (簡稱「因卡」) ⋯⋯咪住。以上呢個簡介，由下星期 ( 8 月 24 日) 開始可能唔再適用。
因為 Deutsche Borse (你當係恒指公司嘅德國版啦) 宣布，下星期一起更換 DAX 指數成份股， Wirecard 正式被踢走。即係，雖然 Wirecard file 咗 insolvency ，但係即使日後佢摺埋都好，身份都唔會係 DAX 指數成份股咯。
其實由公司喺六月開始爆鑊以嚟， Wirecard 仍然可以留喺 DAX 指數兩個幾月，聽落都覺得奇怪。但係德國嗰邊本身就只會季度檢討，下次係九月 (真係好有紀律性) 。
直到最近， Deutsche Borse 先至向壓力屈服，破例提早換馬 (辛苦晒) ，日後亦會檢討有冇需要修訂規則，將申請清盤嘅公司喺兩日內踢出指數。
咁有出就有入啦。獲納入 DAX 指數嘅係 Delivery Hero 。冇錯，呢間公司係做外賣速遞嘅，喺香港經營嘅品牌就係 FoodPanther ⋯⋯ sorry 係 foodpanda 。
得意嘅係， Delivery Hero 業務遍佈歐非中東、亞洲及拉丁美洲，但偏偏德國嘅業務就喺舊年賣咗畀一間荷蘭公司。咁你唔好問我有冇收到張荷蘭銀行支票啦。可以講畀大家聽嘅，係 Delivery Hero 自 2017 年成立以來，至今未曾錄得年度純利，但今年生意就超好囉。 #Pandeminomics 嘛。
睇返香港，都唔係冇試過有指數成份股被恒指公司拿拿臨踢走嘅。 2015 年，曾經炒到飛天、市值近 4,000 億溯元嘅漢能薄膜發電，就因為被證監會勒令停牌而從恒生綜合指數等三個指數剔除。所以話，「指數成份股」真係唔係啲咩免死金牌嚟嘅。
Source:
[開箱文] 第一張 Virtual Bank 嘅 Debit Card
老證今日出版第二季季報，疫情之下，其實就冇乜特別嘢好講。比較得意嘅，有兩樣嘢：
首先，關於上市事宜及利益申報嘅投資超過一千宗，同上季及 2019 年第二季相比，分別都多咗兩倍及一倍半。但報告冇特別交代咩事幹啦下。
另外，久違了嘅 product disclosure 都有 74 宗，往常每季都未必有十宗。都係唔知點解嘅。
或者大家會諗，係咪因為今年四月原油期貨價格跌到見咗負數，所以有啲產品 (例如原油 ETF) 被投訴？ 有可能。
如果參考返 2008 年金融海嘯期間，雷曼迷你債券爆煲，當年 SFC 季報係將相閞投訴納入中介人操守問題，因為涉及不當銷售 (mis-selling) 嘛。但 2020 年第二季涉及操守問題嘅投訴就冇乜大變動， ETF 本身係投資者自己去股市買賣，中介人參與程度好低，所以冇舐嘢，啩？
對於做 in-house compliance 嘅朋友嚟講，或者都會想知官府最近興抽秤啲乜嘢。其實季報都有講嘅，主要都係 internal control weakness 同埋 breach of Code of Conduct 。
咁 SFC 都有補充一下兩者嘅定義嘅，其中 internal control 範圍包括 management review & supervision (MIC?) 、 handling of client accounts (客戶嘅錢同貨) 、 segregation of duties (竟然仲有咁嘅問題？) 、 information management (access rights 同 record keeping?) 、audit trail 等等。
至於 Code of Conduct 多人違反嘅，就包括風險管理、客戶協議、 safeguarding of client assets 同 information for/about clients 等等。都係一啲好 fundamental 嘅嘢，大家睇路。
//
更多深度分析，請訂閱 Patreon: https://www.patreon.com/shuklai
Source:
[I wonder how, I wonder why…]
聽到 #有聲 嘅朋友應該都有返咁上下年紀。 Westlife 喎。
是咁的， SFC 發出新聞稿，表示向一位女士展開刑事起訴程序，佢涉嫌喺證監會搜查一間辦事處，調查一宗某上市公司股份涉及 market manipulation 嘅案件期間，妨礙 SFC 僱員執行搜查令及行使權力。
證監喺新聞稿入面同時感謝警方及消防協助。
「由於案件已經進入司法程序」，所以規佬係唔會亦唔可以評論呢單案件嘅。 (事實上都冇咩好評論)
純粹講下 Obstruction of SFC investigation (中文名係咪阻官辦公？) 。規佬翻查紀錄，喺 2003 至 2004 年期間，曾經有四名人士因為未能與證監調查人員合作而被判罪成，刑罰由社會服務令到罰款一兩萬港元到入獄兩星期不等。當時佢哋主要係「未有協助」或者缺席調查會議。
法官判刑時強調，妨礙證監人員並非輕微罪行，違者最高可判罰十萬元及入獄六個月。
補充多句，證監會喺 2017 年出咗份 Guidance Note on Cooperation with the SFC ，大家有興趣可以望下。
Guidance Note:
Enforcement Action:
2020 年 8 月 21 日
一個忙到甩撚晒碌嘅 happy Friday 可以有幾 happy ？
有嘅，當你見到其他更加蝦碌嘅事發生，就會覺得自己經歷緊嘅，都唔算真係咁荒誕離奇，啫。
英國公開考試受到肺炎疫情影響而要改變評核方式，由校內老師評估學生喺公開試應該攞到咩 grade 。
但又由於要控制情況，避免水漲船高而變咗「人人有 U 讀」，當局唔知點樣班咗條 algo 返嚟運算，按照學校往績調整返呢啲 grading 。
考試結果一出，就梗係有人快樂有人愁。呢條 algo 對於傳統名校嚟講好著數，來自山卡啦 (sorry 唔識正字) 嘅地區小校學生就會 worse-off 。
喺媽聲四起之下，當局決定嚟個 U-turn ，抆走條 algo ，還原返學生嘅成績。然後又衍生另一個問題：太多學生可以入讀心儀學科，輪到大學叫救命，要求增撥資源。
所以話，遊戲規則真係唔好亂改，要改，都唔好立亂搵條驗證唔到嘅 algo 出嚟誤人子弟。
Oh by the way ， Tim Harford 啲文有時幾好睇，呢篇嘅第一段就睇到我會心微笑。送條 free link 畀大家睇下，手快有手慢冇。
FT friend link:
收工先嚟講呢啲。。。
Chapter 37 bonds ，有冇邊位細細個就聽過佢嘅名？我就冇喇，都係近年 SFC 罰咗幾間經紀行，見多啲先至知道係咩嚟。最簡單咁講，喺港交所上市嘅債券啦，但唔一定畀公眾認購嘅。
除非大家係 PI (專業投資者) ，否則都應該冇乜機會買到 Ch37 bonds 㗎喇。港交所都收緊規則，從發行人到投資者嘅資格，以至發行規模，都從嚴處理。
SFC 此前就因為 Ch37 bond 嘅 suitability (合適性) 問題執法，其中某中字頭嘅投行就被罰十球港紙。
事實上， suitability 亦都係近年證監執法重點。 Subscribe 定規佬 Patreon ，過兩日有文睇。
Source:
2020 年 8 月 22 日
因為涉嫌造假數而股票蒸發晒咁滯兼且被剔除出德國法蘭克福 DAX 指數嘅 FinTech 企業 Wirecard (終於有新朵，但都係簡稱「因卡」) ，正式開始拆骨。
集團喺英國嘅子公司 Wirecard Card Solutions，將會由 Railsbank 收歸旗下。交易尚待英國監管當局 FCA 批准。 Railsbank 好生面口？都係㗎，一間有 Visa 參股嘅英國 start-up 囉。
Wirecard Card Solutions (WCS) 喺英國發行預付卡，同時為其他冇牌照嘅 start-up 提供交易處理服務。當年 Monzo 同 Revolut 開波嘅時候，都係幫襯 WCS 嘅。
交易完成後， Railsbank 會接收晒 WCS 嘅支付卡技術、客戶同員工。不過其實 WCS 好多客戶喺因卡爆煲之後都已經轉用其他公司，例如 Morses Club 、 Curve 同 Anna Money 都已經或者喺未來幾星期內轉台。
另外，因卡喺巴西嘅業務都已經賣出。至於喺美國嘅業務，賣盤嘅談判都進入最後直路。唯獨是 Wirecard Bank 就因為監管已經介入同埋將銀行嘅資產 ring-fence 咗，所以唔喺賣盤嘅範圍之內。
Source: