因為在一起所以美好的我們

今晚，大概係無挑fans最傷心嘅一日。

無限挑戰係韓國第一個實況綜藝，內容無定向，幾個平均以下嘅大叔主持，每星期都出盡力想擊中觀眾嘅笑穴。由初初無謀的挑戰純粹好笑無理頭嘅綜藝，慢慢變成對國民負責嘅國民綜藝，出咗名連搞笑都要小心翼翼。記得300期逗號特輯，各成員透露因為無挑而承受巨大壓力，怕俾網民攻擊怕做得唔夠好。隨住洪哲同吉出事下車、再到亨敦因焦慮症離開，好多fans 都意識到無挑終有一日會完。雖然年頭金PD已宣佈離開，但到今日確認全員下車，作為fans 依然難以接受。08年無意中係J2睇到佢播無限挑戰嘅月曆特輯，呢十年都無停過追，雖然久唔久會罷下工，但等復播時會攞舊集數回顧。諗深一層有無限挑戰陪住成長真係好好彩，除咗歡笑仲學到好多唔同嘅知識、處事嘅態度。到我而家再忙，無挑仍然係唯一會追嘅綜藝節目。

要講13年嚟嘅經典，當然唔少得創先河嘅無限追擊戰：攞住錢箱走、搶尾巴、越獄吧青春豆等等等等，真係緊張刺激好好睇。雖然明秀每次都唔明規則但勁落力、騙子洪哲點呃人，結局往往有出人意表嘅反轉，什至連釜山警察都要搵無挑一齊做追擊戰做宣傳。

除咗追擊戰，各種體育競技都好熱血，見佢哋每次都用心練習，aeorbic 、國際標準舞、MMA、F1 體能唔係好嘅大叔用生命硬接，當然當中都有唔少遺憾。無挑勁到係當國際巨星訪問韓國都會上無挑演出，由亨利到加里仔，製作組都會特製環節，又係經典生成器！

綜藝好多時會加啲短劇小品，無限商社同同其他狀況劇都由小品不知不覺越搞越大。無限商社出完musical 再出埋電影版先收到尾...

除咗搞笑仲好有社會性，無挑每年都會出月曆同周邊產品，仲有歌謠祭嘅音源，全部收益捐去做善事。金PD示範咗如何用創意回應同關心社會，點樣將一啲艱深嘅題目變得有趣、點樣引導社會向好又唔會硬蹦蹦教育電視咁，我有啲社區活動諗法都係係無挑到嚟。

七個大叔做咗13年結咗婚生埋仔都係被PD搵笨，去無人島、落稻田、玩鬼屋，次次話去旅行都係流嘅，再唔係就係極限打工辛苦過平日拍攝。正因為經歷過咁多，成員感情深厚有默契，就算一齊做無聊野都變得好好笑，就好似亨敦24小時唔離開間屋嘅生活都好好笑。仲有瘋狂嘅愛做不做系列，每每令人笑唔停。

唔少得每個無挑fans 都想去現場睇一次每兩年嘅歌謠祭。由江邊北路歌謠祭無人睇到2015歌謠大排長龍，越做越華麗，連歌手都要避開唔同期出歌。只有無挑可以超越無挑，2013年隻合唱歌今晚大家loop 咗幾多次？

連續13年要無間斷拍攝大叔們都攰啦，終於逗號之後嚟到句號。因為在一起所以美好的我們，相信金泰浩同大叔們一定會再聚，就當係長時間一點的罷工吧。

#寫呢篇好亂因為好多野想加 #331死守本放 #倒數四集 #挑戰是無限的 #多謝湯丸神