因仍空想超短篇：《寵物展》（上）

鼠王同阿謀兩個戴住接收器，博曬命咁留意住下面嘅情況。

事關下面正準備舉行一場盛大嘅展覽，而響展覽入面嘅純一將會決定人類今後嘅命運。

「收唔收到訊號？」鼠王不斷響度催。

「唔⋯⋯等陣，我仲試緊⋯⋯」阿謀係咁轉動佢手上嘅接收器轉盤。兩個人而家響展覽場地嘅天花板上面嘅暗格，因為樓底相當矮所以只可以趴響度。「上次跟蹤嗰兩個魯魯都仲成功破解到佢哋講乜㗎喎⋯⋯」

「如果真係破解到，就真係我哋人類反擊嘅一個轉捩點喇！」鼠王好似好有感觸。

「咦，咪嘈住⋯⋯」阿謀都老實唔客氣，「好似得得哋喇，聽到小小。」

「佢哋講乜？快啲話我聽！」

「俾啲時間我，收緊音喇⋯⋯」

事實上，響佢哋兩個嘅正下方係一個非常繁忙嘅室內會場。

「廿蚊一串哥什！十五蚊三個比郎⋯⋯」

「⋯⋯最新出品防水衣⋯⋯」

「今年秋冬系寵物小屋八折開售⋯⋯」

「嘩！鼠王，下面真係一如之前打聽到嘅情報一樣，衣食住行乜都有得賣呀！」阿謀將現場情況轉達出嚟。1212

「你而家咁開心做乜啫，」鼠王打了阿謀一下頭，「唔記得我哋今日嘅目標喇？」

阿謀覺痛，但更怕鼠王威嚴而不敢發作：「梗係記得啦，就係要停止呢個咁荒唐嘅展覽⋯⋯」

「仲有一樣！」未等阿謀講完，鼠王即刻補充，「就係做低目標人物！純一嗰邊點？」

「佢未有聲氣喎⋯⋯」

「快啲call吓佢！」鼠王唔耐煩咁喝。

「純一、純一⋯⋯你收到後就搵機會俾signal我啦⋯⋯」

X X X X X X

另一邊廂，響展覽場地59號攤位，純一經歷前所未有嘅緊張。因為佢從來都未見過咁多魯魯。

魯魯係一種有人好鍾意亦有人好討厭嘅生物，而能夠見到最多魯魯嘅地方，就一定係呢啲寵物展喇。一隻典型嘅魯魯有倒三角形嘅頭部，講嘢時會伸出好似蛇一樣嘅分叉脷，仲有強壯嘅腳同尾，簡單來講外形就係人類以前見到嘅蜥蝪。

人類鍾唔鍾意魯魯呢個命題，絕對係跨越種族、性別、宗教嘅。鍾意魯魯嘅人，就係覺得同佢地一齊時係自己嘅好伴侶，一隻好嘅魯魯會同你一世。

至於純一就係另一類極端。同好多人一樣，唔鍾意魯魯嘅原因只有一個 — — 唔想俾佢哋將自己當成係寵物。魯魯嘅壽命 — — 或者應該講係人類嘅壽命只係魯魯嘅幾分之一。

將人類當做寵物嘅魯魯，就係傲慢嘅來源。純一已經發誓要將佢哋全數消滅，就算唔係全部，都要響自己能力內殺最多隻。

就算殺唔哂佢地全部，都要殺最重要嗰隻。佢就係咁先加入咗鼠王嘅組織。

「⋯⋯你收到後就搵機會俾signal我啦⋯⋯」呢把聲響純一植入咗接收器嘅左耳響起。但佢未有機會覆，因為賣家魯魯睇到佢實一實。

「!@#$%^⋯⋯&*()*&^%$#@!」

純一聽唔明身邊隻賣家魯魯講緊乜，但應該十居其九都係讚緊佢點好，好似 「埋嚟睇下！呢隻係純種東洋人，皮膚夠白淨，響出面唔係咁易有㗎！」 咁，先會有人來買佢。有隻魯魯 — — 應該係女魯魯 — — 走咗埋純一身邊彎低腰，望咗幾下後就走咗去。

純一皮膚白淨的確毋容置疑，赤裸嘅佢一直坐響地上，露出雪白胸膛。頸部被頸圈綁住，連住一條繩，繩嘅呢一邊連住牆上嘅鈎。

雖然話係女魯魯，但純一唔擔心佢會被侵犯。因為正如一個正常人類唔會對隻狗有性慾一樣，當然凡事非必然啦。

趁女魯魯同個賣家傾緊計嗰陣，純一對住阿謀同鼠王方向眨一眨眼，表示佢收到訊息。

「再唔快啲出現呢⋯⋯我就捱唔住㗎喇⋯⋯」佢響心入面嘆氣。

就響呢個時間，好多隻會場嘅魯魯都向同一個方向望去。

「咦，嚟喇喎應該⋯⋯」純一都望過去，但因為佢坐咗響度，望唔得遠。但係純一嘅直覺話佢聽，九成係大統領現身展覽會場喇。

（待續）