「唔辛苦邊得世間財」

呢排書店有本黑色封面嘅書叫“Principles”，聽聞係top-seller。查實呢本書嘅作者叫Ray Dalio，佢係當今世上規模最大嘅對沖基金BridgeWater嘅創辦人，公司管理資產超過一千五百億美元，折合約一萬億港元有多。Ray曾經準確預測2008年美國次按危機及2011年歐洲債務問題。有別於「股神」巴菲特嘅「價值投資」，Ray堅信知古鑒今，利用數據同原則去判斷經濟前景及資產價值走向。

呢本《原則》講嘅，首先係做人處世嘅，以及工作上嘅原則。關於經濟同理財嘅原則，Ray會喺佢第二本著作先講。都啱嘅，正如《嚦咕嚦咕新年財》劉德華成日話齋，「人品好自然牌品好」，反之亦然，如果要講投資創富嘅原則，首要嘅基本都係掌握做人嘅是非對錯先。否則，縱然畀你忽發橫財中個六合彩頭獎八千八百萬，唔識待人接物，橫財來得快亦可以去得快。

坦白講，Ray Dalio呢本書講嘅好多嘢都十分之基本，例如話敢於夢想之前亦要面對現實並且堅持到底，如果冇了解Ray嘅心路歷程，冇細味文字中嘅Context，呢本書講嘅嘢好易淪為兩毫子一公升嘅乜乜心靈雞湯系列。但正因為Ray白手興家，經歷過高低起跌，佢所學到並堅守嘅原則先至別具價值。

今日想同大家分享嘅，係一句老生常談：“No pain, no gain”。或者大家返工都係想「無驚無險、又到三點」，或者「行行企企，食飯幾味」。畢竟工作只係人生嘅一部份，冇人要求你貢獻整個人生畀公司，之不過工作係暫時嘅，職業生涯係長遠嘅，喺21世紀仲可以一成不變嘅工種同公司實在絕無僅有，於是無可避免地，大家一日未退休，大家一日都需要成長同進化，先不致於被時代淘汰。

借用容祖兒一首舊歌《舊日回憶的山丘索》，「沒有起跌痛楚，成長怎麼過？」大家嘅成長，少不免遇過苛刻嘅上司同刻薄嘅客人。有時上天對大家仁慈少少，洗牌之後派著一手好牌畀你，上司又友善，客人又易話為。不過問心嗰句，大家喺邊一個情況之下學到比較多嘢？以置記自己為例，多年嚟學到最多職場竅門同心法嘅時候，都係跟緊同一個既嚴謹又率直嘅老闆。當年雖則唔需要帶備娘親返工，但面皮必須有返幾尺厚先可以捱過每一日嘅質問、批評同挖苦。相反，置記從屬於絕頂好人嘅上司嘅時候，Learning Curve先係最平坦。

老闆如是，客戶亦如是。或者每個銷售人員嘅願望都係啲客人懵盛盛自動波游埋嚟畀佣你賺，每個Sales嘅惡夢都係客人要求多多又態度惡劣，仲要搞一大輪都係搞搞陣、冇幫襯。但係置記都有做過Customer Servicing，遇過嘅客戶奄尖腥悶有之；凡事“Okay!”、“Great!”、“Nice!”又有之；甚至遇過有啲客人問都唔問、二話不說、價都唔講就簽約科水。概括地講，「衰客」未必難湊，「好客」未必等如好結果，係我嘅體會。

點解咁講？有要求嘅客人意味住佢哋好清楚自己要啲乜嘢，佢哋亦勇於表達自己嘅需要，如果你火喉未夠，尚有機會畀老闆“Show Quali”安撫客人，反正合理又理性嘅老闆會知道你已經盡咗人事，要佢出手實在情非得已。如果老闆唔理解你嘅，咁又返返去早兩段苦你身心、磨你體膚嘅Learning Curve課題。及至日後呢啲「衰客」被馴服之後，你大概會有種“Mission Completed”或者“Achievement Unlocked”嘅感覺，呢種體驗，即使最終未必換來直接、金錢上嘅打賞，他朝你去下一個工作崗位亦肯定受用：再差嘅情況你都已經遇過，新嘅挑戰可能只係小菜一碟。

掉返轉，置記有遇過友善又隨和嘅客人。佢哋可能願意配合你嘅時間表，唔會強你所難、迫你優先處理佢哋嘅要求並且短時間內交貨。不過，客戶關係實屬明買明賣，客人平日喺非金錢及非物質方面與你為善，多少係賣咗人情畀你。到客人真係有急事或者難題嘅時候，你根本唔好意思推搪或者耍太極，事關你先前多多少少欠咗佢。同埋呢，如果有個客人咁善解人意、聰明伶俐同埋平易近人，點解佢仲要畀錢你(或者你公司)賺呢？事出必有因，受得人錢財，你就預咗總有一日要替佢消災。

更加大鑊嘅情況，可能係你個客根本唔知自己需要啲乜，所以先至無論你畀咖喱味嘅屎，抑或屎味嘅咖喱畀佢，佢都會讚好食。因為佢冇嗅覺、冇味覺丫嘛。到客人真係有咩頭患身㷫要搵你幫手，佢可能都講唔出自己需要啲咩協助。咁你先前賺來嘅舒適寫意，咪又係一次過嘔凸？

再老套嘅說話，都有其價值。「唔辛苦邊得世間財」，我係真心相信嘅。畢竟，以經濟供求理論嚟講，長遠而言不論供應商亦或係客戶，都始終係理性嘅。有咩財富係唔使你出汗出力就到手？邊有咁大隻蛤乸隨街跳架。