【哈佛認證 9大廢柴特徵，改好就能成功？】
唔知點解，網絡上面特別多心靈雞湯式正能量潮文，D人好鍾意拎各界知名人士「面果浸」故仔，試圖搵出「成功之道」，好似巴菲特「有耐性」、霍金「堅毅不放棄」、馬丁路德金就「有夢想」……一黎，sample size太細喇。二黎，世事邊得黎咁簡單，人根暗啞底做左野唔通又話你知咩。仲有，我成日都話，成功從來都要特定客觀環境配合，根本就唔可以複製，李嘉誠出世遲十年，就遇唔到六七暴動，佢執唔到平地，十年後亦借唔到錢買英資洋行，只要miss左一個關鍵時刻，然後？就沒有然後！
不過，掉返轉黎睇，失敗者通常都有路捉，佢地有共通點。好似近排，有人loop一篇唔知幾多年前既文章，聲稱係哈佛大學研究（但google唔到source喎），話一條廢柴有九大特徵，我地即管睇睇佢講咩：
一、猶豫不決（Indecision）
同深思熟慮好似只差一線。相比魯莽衝動，停一停諗一諗咪仲好。不過我支持諗好左、細心分析過，就應該開始去做，千里之行，始於足下。齋諗係無用既。
二、拖延 （Procrastination）
拖延，很多時源於逃避同懶惰。法國諾貝爾文學獎得主Romain Rolland話：「懶惰是很奇怪的東西，它讓你以為那是安逸，是休息，是福氣；但實際上它所給你的是無聊，是倦怠，是消沉。」 The famous thinker Romain Rolland said, “Laziness is a strange thing, it makes you feel that your situation is comfort, is a rest, is a blessing; but in fact it is boring, tired, depressed.”
三、三分鐘熱度（ Brief period of enthusiasm）
三分鐘熱度就肯定做唔成事，但係盲目堅持，唔識止蝕，一樣會搞到你泥足深陷，唔單止浪費精力，仲令你錯失其他機會。
娛樂版成日見到D明星話自己唔放棄、等機會，終於紅。其實同賭博無分別，機會既野，好多時都係靠彩數，唔係你肯等就會黎。大把二打六做一世都係二打六。
四、害怕拒絕（Fear of rejection）
被拒絕，自尊心受損。下次就會啟動自我保護機制，避免自己再次受傷害。我認同呢個需要克服，因為唔同古時農村，個個互相熟識，現代社會太多人，個個三唔識七，除左你阿爸阿媽之外，根本就無人care你既自尊心，唔會畀面你。同時你都唔會畀面人，仲攬住自尊心做咩喎！
五、自我設限（Self-handicapping）
而家後生仔興講博盡無悔。做野唔好局限自己係岩，但都要睇萬一衰左自己輸唔輸得起至好。
六、逃避現實（Escape from reality）
我地唔係高官，佢地逃避現實拖到任期結束就可以退休咬糧，乜都唔關佢地事。我地遇到既問題一日唔解決一日都唔會消失架！
七、搵藉口（Excuses）
對自己幾時都要誠實，面對人地既提點，有則改之，無則加勉。咁人先有進步。
八、恐懼（Fear）
人通常有兩個情況會恐懼：一、面對未知、陌生果陣；二，面對強大對手，自己搞唔掂果陣。前者，可以透過裝備自己、認識新環境去克服。後者，諗過度過都搞唔掂，一係逃跑一係投降啦。
九、拒絕學習（Refuse to learn）
老海鮮既通病。成日以為以前果套而家都work。時代唔同架啦。仲攬住舊屎把鬼咩。
其實，除左客觀環境要「就」，一個人成功與否，好在乎佢有無眼光同有無能力。有眼光，但無能力把握機會，叫眼高手低。有能力，但缺乏眼光，叫捉到鹿唔識脫角。
(2019–9–5)
傳送門：西米Go短評 #001–100，#101–200，#201–300
傳送門：做個精明消費者，請睇「選擇」月刊