又淺談「毒撚溝女」：一成不變對人生有咩影響？

呢排又無啦啦推番 #毒撚溝女 嘅問題。有關呢個話題我以前有講過，(順路一推： https://medium.com/waveshum/%E6%AF%92%E6%92%9A%E6%BA%9D%E5%A5%B3-79539d149d6b)，但事隔都有一段日子，顯然觀點係有可以更新嘅地方。以我單身接近三十年嘅經驗嚟講，心態同環境（主要係生活圈子）係至為緊要。

有人表示外表唔取決所以唔駛執，我覺得係 right and not right 啦，最主要係我認為「唔重要所以咩都唔駛做」呢個心態好攞命：你以為係外表問題咩，其實係心態問題。因為你以為咩都唔駛做，唔駛改變就可以「碰運氣」得到。

亦有人主張唔駛因應潮流改變自己。有人講到要改變，就等於好似狗咁奉承人(詳見：https://www.facebook.com/permalink.php?story_fbid=208086228419853&id=100076554320014)——而好多人唔記得咗重點：你以為你肯做狗就有人要？咪玩啦。

講到「以為改變就等於做狗」、「以為只要做狗就溝到女」，呢啲資訊落差都係源於忽略咗情侶市場間嘅供求 — — 簡單啲講即係：你連女仔想要乜都唔知。

我唔知寫嘅人遇過啲咩事而得出如此結論啦，但好多嘢都係講「供求」。難聽啲講，可以得出「改變自己溝女就等於做狗」嘅結論，好大程度上就係因為佢喺啲女心目中，佢只係做到「狗」嘅角色，即係只有做狗你先做得稱職。咁點解人哋會當你係狗？好大程度上就係你對啲女嘅表現係點。見到女就fing晒尾？定係搖尾乞憐？我想講嘅係：人點睇你，好大程度上只係你點睇自己嘅投射。當你喺兩性關係上睇唔到平等，可能係你自己本身就唔想見到平等、唔想睇到平等機會嘅社會下你係點樣輸咗呢場比賽。

再講就離題。一句總括：供求，就係對方睇中你啲乜，反之亦然。所以現實啲講，我唔否認 “Money is King” 架，我唔排除有唔少人心目中講錢係最實際。但深層一啲睇，錢同物質嘅渴求，其實都係源於安全感。

你俾到安全感對方，喺你嘅眼裡面睇到對方，知道對方鍾意乜、要啲乜，對方如果做到相對嘅回應，好大程度上就已經建立到一段唔錯嘅關係。（當然過程中都要觀察對方值唔值得你咁做啦，而且好老土都係咁話：人同人嘅關係唔只愛情或者扑嘢，有時一段友誼或者嚟得更加自然）

而最重要嘅係，呢個講法最大嘅問題喺邊？就係令班本來無方向改、或者攪錯方向嘅人更加安於現狀、不作改變。咁落去其實只會令本來退縮嘅人更加縮，更加唔願意接受改變。

其實只要將「點解溝唔到女」個問題稍為改改，變做「點解識唔到朋友」、甚至「點解成日得罪人」，你會慢慢搵到個問題核心喺邊：就係你想改善同其他人之間嘅關係，首要嘅都係由自己出發。有好多嘢講白啲，基本上都係待人接物嘅問題：例如毒到小巴都唔敢叫落唔係問題，但如果延伸到平時人哋打招呼都唔識應，又或者好多小動作令人覺得你只係顧自己唔顧人（呢樣我都學緊），咁好明顯呢樣就係一樣，你唔作出改變就會持續令自己同身邊人關係惡化嘅問題。

而且無人能夠否認嘅一點係，不斷轉變就係呢個世界嘅基本運作模式。個世界變，而你選擇依然固我，咁被社會淘汰係必然嘅事，一點不由人。

總結一下：我前文提及嘅重點，係平等。你睇低自己做狗、或者睇低別人嘅人格，長遠嚟講都唔會建立到一段健康嘅關係。呢篇文嘅重點係轉變：你今日唔變、聽日唔變，變咗一座古老石山不突止，你仲會錯判呢個社會嘅運作、錯估呢個世界嘅所有人際關係。

如果你話所有女人都係雞係公廁、所有港女都係貪錢見錢眼開，你唔止侮辱自己人格，你係侮辱緊我老婆同我所有女性朋友。