「前瞻了，也要後顧」

移山，填海，求兩腳著地。大家打份工，無論係返置地抑或係量地 (真係做測量嗰個量) ，無非都係為咗三餐一宿、家人溫飽。點樣喺職場上安身立命、搵到適合自己嘅最佳位置，幾乎係置記每日都思考嘅問題。

或者你會覺得，打份工啫，唔使咁上心、咁多嘢諗喎。咁都好視乎每個人嘅危機感同埋心中歸屬何處。如果你冇咩負擔，人生目標就係學似電視節目《Trip精》嗰幾個主持話齋，「橫掂喺香港儲錢都買唔到樓，不如飛多轉啦」，咁真係唔需要定時定候為自己嘅仕途把把脈嘅。

之但係，置記人到中年，事業都係比上十分不足，比下所餘無幾，連半天吊都講唔上。如果職涯流流長三十幾年，置記都行咗三分一路。再唔著力思想去向同埋付諸實行，真係可以準備轉化成職場老海鮮 (Old Seafood) ，飾演當初自己最唔想做嘅角色。

對於出道幾年嘅小朋友嚟講，學似揸車咁擰頭望下隔離左右、望下倒後鏡、再望前方遠少少，再衡量下自己應該踩油、煞車定係轉線、掉頭走，都差唔多係時候。唔通要等到自己做咗十年嘢，先發現入錯行、浪費咗整整一個年代嘅時間？

有冇意識要咁自我檢討係一件事，識唔識諗又係一件事。套用舊舖前前任大大大老闆嘅模式，置記簡單歸類為以下幾招：內觀、外望、前瞻、後顧。

內觀：你懂得以後掌握心中節奏

有冇試過遇到心儀嘅對象，個心卜卜、卜卜咁跳？有冇試過收到公司電話出 Offer ，嗰下心花怒放、巴不得去廚房攞支香檳開咗佢？楊千嬅話齋，「難道心動還會假」，自己嘅感覺永遠最誠實，亦最無可批判。你覺得熱，人哋覺得凍，大家各自體質唔同、著嘅衫有厚有薄，冇人可以話對方唔啱。

同樣地，返一份工開唔開心，做呢個工種自唔自在，喺呢間公司融唔融入到，投身呢一行後唔後悔，真係只有自己和藥知。置記做過好多份工，對於金融行業由最初嘅「搵食啫」到而家嘅「搵食啫」，感受其實好唔同。當初捨棄所學所讀嘅專業而向錢看，係出現現實考慮，唔想渾渾噩噩咁行禮如儀又一日。而家喺金融行業打咗幾個白鴿轉，仍然覺得返工係為咗搵食，但係喺行內見天地、見眾生，從中累積做人嘅智慧，同埋寫稿嘅靈感，算係額外獎賞。

至於喺一間唔啱自己嘅公司入面忍辱負重搵兩餐，代價有時都可以幾沉重。詳情可以留意返舊文「情願明天從頭做起」，唔再重複。風境通常不轉，除非心境可以 180 度轉變，否則路不轉就人轉，轉工個轉。

外望：來讓我上星際亦永不捨棄

香港，亞洲國際都會。但唔係話落多幾次老蘭、聽返幾首外語歌，就叫有國際視野。香港官員近年鼓勵年輕人把握「一帶一路」帶來嘅機會，甚至留意返「粵港澳大灣區」發展，撇除任何政治動機，其實都值得考慮一下。咁你話，政治任命官員，講嘅嘢唔從政治角度分析，仲有咩意義？咁我又話，香港嘅政治走向早已經唔喺香港人嘅手中掌握，除非乘勢加入建制，否則喺政治以外嘅層面抽取官員建議嘅剩餘價值，總算食得唔好嘥丫？

置記錯過咗中學畢業之後升學外國嘅機會 (原來沒有、從來都沒有) ，大學亦冇讀好書去唔到 Exchange ，畢業之後又一直專心返工，冇 take gap year 去嘗試工作假期，人到中年先至發覺自己真係好地、好 Local ，同留學英美澳加回流嘅同事或者舊同學相比，真係好原汁原味香港仔，要同外國接軌就要搏老命追趕。

如果工作咗幾年嘅你，未至於一家七口等你一份糧開飯，男女朋友又唔係迫婚迫到明年今日就要嫁給你啦，遇上職涯平台期，事業停滯不前，嘗試出走一下，或長或短，清空個人思緒、雜念、負能量，都不失為一個 reset 嘅方法。

咁當然，行唔開嘅朋友仲有大把。冇得咁奢侈離開香港住，咪望下隔離左右，隔離部門有冇啲咩吸引到你？第二條 Business Line 有冇發圍？某個曾經同你共事嘅老闆有冇機會畀機會你發揮？如果有，咪嘗試探討下合作機會囉。嗱，係合作，唔係單方面嘅追求，係要人哋都有咁嘅空缺、用得著你嘅技能或者人脈，先有得達至雙贏嘅。畢竟 Internal Transfer 要花一輪功夫，說服 HR 、說服老闆、說服其他同事點解係你唔係其他人⋯⋯除非你帶來嘅價值可以令一切成本、心血都值得，否則好難有 deal 。

亦因為咁，更多人外望嘅方法係轉工，甚或轉行。套用嘅思路其實差無幾，都係你尋佢開心，佢尋你開心，能夠互利互惠，先至有戲唱。

前瞻：十年之後，我不屬於你，你不屬於我

早前同小學同學飲嘢敘舊，大家講起而家小朋友要做嘅功課，先發覺以前自己最初純粹抄寫係最簡單嘅習作。但係當年抄寫緊嘅時候，人係會嚮往做補充練習唔使一味抄抄抄嘅。到埋首做補充練習嘅時候，人又情願做 Project ，同同學仔一邊玩、一邊做。直到有得做 Project ，人又覺得返工有錢收開心啲。

人生就係咁樣一路勇往直前，期望下一站嘅生活比現在豐盛美好。但係期待嘅同時，又通常冇做好心理準備，到轉變殺到埋身嘅時候，唯有兵來將擋、整到埋嚟就食。

咁講真， 25 歲嘅你都冇經歷過 30 歲嘅日子，唔知道到時應該點樣做、可以點樣做。煲劇、睇小說都少不免有戲劇化元素，即使係睇職場文章或者飲嗰啲「10 件你會希望 30 歲前學會嘅事」心靈雞湯，亦不過係聽別人故事，如何的春風得意 (或失魂落魄) 也是人故事。冇話保證適用喺自己身上。

話雖如此，未來還未來，以有限嘅知識，展望日後嘅歲月，至少對自己盡責。人無遠慮，必有近憂。嘗試設想世界、社會、家庭五年後或十年後嘅模樣，諗下到時仲有咩工種有需求，然後跟住嚟調較自己嘅航道，再定時定候 (可能係每個月甚或每個星期) 重複檢視一下，睇下自己嘅進度，同埋原本嘅預測有冇需要修訂。一步一步，你自自然然就會發現自己已經 30 歲，然後可以同 25 歲嘅自己講四個字⋯⋯

後顧：回頭便知，我心只有你

25 歲嘅置記，其實並唔存在。我 25 歲嗰時都未有 Medium 呢個平台啦。或者咁講，十年八載之前嘅自己，印象其實都有啲依稀。你呢？你有冇定期搵返當年嗰個你出嚟，問下自己有冇忘記初衷？

職場路途越走越遠，距離最初嘅起點可能相差十萬八千里。求學時期嘅抱負、初出茅廬嘅宏願，隨住時代推進、年月消磨，或者都會變咗形、走咗樣。呢個係理想同現實發生衝突嘅時候，必然出現嘅結果。

回望過去嘅，就好似搵返隻船個錨咁，幫你重新定位，搵返自己。如果一路上太多可能性、太多顧慮、太多引誘，回首問返自己最初想要啲乜、而家做緊嘅嘢又有冇相沖牴觸、背道而馳，你會得到答案。

回頭仲有一個意義：睇清楚喺你背後，有邊個默默支持緊你，喺你有需要嘅時候拔刀相助。時間係人際關係嘅試管，係變淡、變色或者始終如一，時光穿過透明嘅玻璃，都會畀你見得一清二楚。

然後你就可以寫返封信畀十年前嘅你，或者幫其他人前瞻未來。