【公司秘書Com Sec都有高登潮文？經典潮文告訴我們的二三事】

公司秘書Com Sec呢個咁「悶」嘅行業，幾年前竟然都有過一篇為人津津樂道嘅「潮文」。上開高登的朋友仔，可能以前有見過呢篇潮文：

「想通了，即將要和社會接軌，

就職後要拼盡全力 賺錢，拿取權力。

會首先經 香港公開大學BBA(C&G) FT. 進場,先拿Degree。

然後一邊工作一邊拿Master，以最快速度上位。

成功KO第一捅金後，我才能繼續實現夢想，理想。

(搞樂團，養孩子，父母，去幫有需要的人)

4年 Business Law, 將來就可以用法律監管公司各個部門。

又要負責幫公司和 港交所，稅務局聯繫。

更加可以有能力為公司制定未來政策。

表現好的話可以入董事會。

簡直是公司主力核心。

我迫不及待好想玩玩了」

學「好假的肥仔」咁講：「呢啲書、呢啲故事，雖然講唔出咩野大道理，但係我睇完之後覺得非常之有親切感！」

作為一個有求真精神的人，不如我哋一齊逐點去分析一下究竟呢篇199字的潮文講咗啲乜嘢關於公司秘書行業的「真相」俾大家知道。

論點一：會首先經香港公開大學BBA(C&G) FT.進場,先拿Degree

唔少Com Sec同業都係經OU BBA CG Degree作為晉身公司秘書的入場券。而家當然唔止OU(已改咗名做「都會大學」)，亦有恆管BBA CG、明愛BBA CG、BBA Accountancy、各類型文科，其他學科等等的朋友一齊「入坑」。

論點二：然後一邊工作一邊拿Master，以最快速度上位

讀完Master of Corporate Governance順利畢業，儲夠3至6年年資就可以拎到ACG/HKACG資格。然後再儲下PQE做埋Fellow亦無不可。拎個「Com Sec牌」都係上位的入場券。正確。

論點三：成功KO第一捅金後，我才能繼續實現夢想，理想。(搞樂團，養孩子，父母，去幫有需要的人)

做乜嘢行業都係咁，冇乜特別。Com Sec薪金「高不成、低不就」，餓你唔死但唔會發達。我相信年薪過百萬只佔5%至10%，而亦唔係個個都做到Named Com Sec，太多責任，2021年7月3日聯交所新修例生效，公司秘書被列為上市公司的「Senior Management」之一，有一定罰則(包括「Private reprimand」、「Public statement involving criticism」、「Public censure」等等)，做Named Com Sec風險只會越來越大。

論點四：4年 Business Law, 將來就可以用法律監管公司各個部門

少年，你太年經了，你嗰四年都真係讀晒Business Law？就算係，一個律師讀完一個LLB，還是再花一年Full-time/兩年Part-time讀PCLL和做Internship以及拎PQE之後先至叫做「學有所成」。

我淨係捉住「Business Law」呢個觀點嚟講，咁點解我唔搵律師「監管公司各個部門」，而要搵你一個Com Sec？除咗「Business Law」知識，你仲有乜其他知識？當然，公司秘書亦不要妄自菲薄，Com Sec和律師各有各專長。一個稱職的Com Sec應該具備出色Soft Skills和People Skills。

論點五：又要負責幫公司和 港交所，稅務局聯繫

呢個係公司秘書四大職責(i.e. Communication Bridge)之一，即成為董事會與Stakeholder之間的溝通橋樑。作為一個Com Sec，日常工作當然唔止得咁少Statutory Body/聯位單位要聯繫，仲有公司註冊處、銀行、律師、Financial Printer、Auditor、各個Internal Department等等。

論點六：更加可以有能力為公司制定未來政策

呢個係公司秘書四大職責(i.e. Governance)之一，整Diversity Policy、Whistleblowing Policy、Nomination Policy等等都係Com Sec負責制定及Table上董事會通過並落實政策。

論點七：表現好的話可以入董事會。簡直是公司主力核心

唔係冇可能，咁真係要表現好好，一個純Com Sec出身的朋友要入董事會，應該要係精英之中的精英，保守估計佔全個行業的5%，甚至更少。

論點八： 我迫不及待好想玩玩了

識得欣賞「企業管治」的美，其實成件事又真係「好好玩」。企業管治就係人的管治，即是讀「人性」。唔知道，呢位立志做Named Com Sec的朋友唔知邊而家走到幾遠呢？但作為一個Com Sec首要打字唔應該有咁多Typo。

「天空海闊我共你

再領略人生的美

雲外看新生趣」

多點訓練自己的觀察力，用多重維度思考，就能夠從身邊看似平平無奇的東西找到點樂子。