《全民造星IV總決賽》Live Report
全民造星IV開播嘅時候，阿唯就率先寫過60強心水名單，而家睇返，覺得自己眼光都算幾準，除咗燒賣因為學業同家庭問題要提早走之外，其餘8個有5個(Marf、Day、Ivy、Yoyo、WinWin)都殺入20強，剩低嘅何佩、Ash，仲有我單推嘅Sica，即使中途被foul，都成為遺珠中嘅人氣成員，話題一直無停過。
原本Sica被foul果陣都好㷫，但後來睇通咗一切都係劇本，女團人選基本上已定，就學識咗抽離，之後嘅集數當普通show，喺電視睇吓就算。點知咁好彩，竟然畀我抽中咗《造星》決賽飛喎！可能連個天都註定我要跟到最後一刻，所以就算出面炒到4000蚊張飛，都完全無諗過賣出去。
當日(即係12月25日聖誕節)喺九展食完飯之後，就去到三樓Star Hall出面兜個圈，因為20強嘅Fans已經喺出面佈陣晒馬，場面相當熱鬧！當中氣勢最勁嘅，一定係Marf同Day兩個頂頭大熱，繼而係人氣極高嘅Ivy。不過Day嘅應援物，啲設計同用色真係有待改善……
其他參賽者嘅應援物都各有特色，好似榛綦同埋Alice嘅fans就整咗氣球公仔，輸人不輸陣，Winka同埋Yoyo fans就周圍派應援物，想拉多啲fans認識佢地。就算係支持者唔多嘅暐翹，至少都有幾個易拉架助陣。
當然唔係個個都有fans喺出面擺陣應援，好似WinWin同Ada仔咁，現場就只係見到由Day Admin整嘅20強易拉架有佢地份，Ada仔果款仲好特別，上面貼滿晒星星同圓圈，總算無咁似墓碑。場外一角，仲可以發現最愛鑫鑫嘅UST南亞仔應援Poster，真係有心思喇。
現場唔單止有20強成員嘅應援物，就連遺珠都有，好似Ash同咖喱就巴閉到有人即場播MV。
咁但係都唔夠Sica主席嘅fans(即係艾倫)咁搶鏡，人多之餘，應援物亦多，貼滿一條柱(叫瑤柱？)之餘仲要鋪埋落地下。艾倫仲要拎住banner周圍遊街唱聖詩，無睇開嘅又點會估到佢40強已經出局？
臨入場前見到有人講fb有viu直播，原來主席一早已經坐咗喺會場最前頭，隔嚟仲有Ash同埋阿妹添！直覺話我知主席一定有特別待遇，所以臨入場前就問現場嘅艾倫有無手牌剩，等我可以幫主席打吓氣。雖然啲主席手牌要book先有，不過艾倫sss都好好人，肯借一個畀我，睇完show之後先還。
入場之後嘅見聞有啲散，我逐點講吓啦。
．入到去先知Section 4即係地下層最後面嘅區域，好在係果區嘅正中間位(由左到右、前到後都係中間)，可以好清楚咁睇晒成個場。如果坐高層，就未必睇得清楚喇。
．每個坐位上都放咗兩條打氣棒，上面印咗Viu logo。一拎上手輕飄飄，原來係海棉嚟，中間通窿，裡面放咗幾個細燈膽。開關同電池喺底部，一開咗就著燈，你地喺電視睇到嘅燈海畫面就係咁嚟。呢舊嘢都幾有Viu特色，慳皮得來又令到個畫面靚啲，所以完場之後都拎咗返屋企留念。
．大家喺電視度，當然可以睇清楚每個參賽者嘅演繹，但原來坐現場嘅後排，所有參賽者真係變咗芝麻咁細粒。個人表演還好，Dance Battle真係唔知邊個打邊個。就算右上角有大電視直出電視畫面，都幫唔到好多，亦都睇唔到畫面裡面嘅字幕。我諗坐前一個Section，效果會好好多。
．但現場有樣好，就係氣氛真係一流，尤其是係去到有勁舞嘅表演環節，成班Dancer圍住參賽者一齊跳舞，加埋五光十色嘅Video Wall同強勁嘅bass節拍，果種衝擊會令到你忍唔住一齊打拍子，好賞心悅目。所以揀齋唱嘅，無論唱功好定差，喺呢個舞台上都同樣蝕底，咁亦都解釋到點解Val、Yoyo同埋Ivy嘅評判分咁低。
．全晚最精彩嘅位，並唔係Marf打側手翻或者Gao嘅勁舞炸爆個場，而係Mirror壓軸出場嘅moment。全場嘅尖叫高呼，加埋前排嘅應援燈牌，將成個比賽活動，一瞬間變成Mirror嘅主場。我係第一次見鏡仔真人，可以見識到齊齊整整12人喺現場Live勁歌熱舞，都真係幾好彩。不過離遠真係好難認到人，勉強叫分到姜濤、AL同AK咁。
．呢個位我發現咗個現象，就係前排好多人都高舉手機，拍低成個Mirror嘅表演。對於睇開日系演唱會嘅我嚟講，呢樣嘢直頭係文化衝擊，因為睇開嘅Live向來都係嚴禁拍攝，係去到近期先有啲特定環節畀觀眾影相留念，所以都慣咗用自己雙眼去欣賞每一個演出。我未試過喺香港追星，好難評論咁做係啱定錯，但見到有啲人upload返上Youtube，反而又有好多留言讚賞up主嘅fan cam拍得好，仲鬧Viu個cam man周不時都亂fing個鏡頭，成日影大頭又唔影全身，睇觀眾拍片反而仲清楚喎。唔知大家又點睇？
．今次比賽雖然主席無份，但估唔到竟然有咁多出場機會！賽前FB直播一次，《妖女》條片第二多Like一次，「還我系列」一次，最後96人一齊跳前傳，得主席一個有大特寫鏡頭！我喺現場見到，當然興奮到不斷大叫主席個名啦，由頭都尾視線都無離開過，話晒都第一次見主席真身吖。今次好明顯係Viu知衰foul錯人，所以喺決賽先嚟補鑊，亦都見到Sica喺遺珠之中嘅份量有幾高。我對於主席入團相當有信心，就算主團無份，都至少有個副團玩吓卦。
10年前追AKB果陣，都係由最紅嘅時刻開始跟，好難得今次係由女團組成之前就已經有留意，而且仲有機會親眼見證住三甲誕生，都算係有緣。就算一個星期後公佈有咩成員都好，我都好有興趣睇吓佢地可以走到幾遠，到時希望再寫多啲香港追星文化嘅心得同大家分享。
