《全民造星》55強我最喜愛的表演者
《全民造星》去到第三階段！係時候為第二階段做總結。其實想寫好耐，但俗務纏身，同埋99強閒雜人等太多，去到55大家記憶會好一啲。呢個post好正能量咖，淨係寫好嘢。
之前文章：
睇呢個節目主要係因為識 Lokman同 Dee Gor（即係我識佢佢唔識我），慢慢睇睇下其他嘢都好睇。
Lokman 自然是頂頭大熱，靚仔，跳舞勁，原來唱歌還可以。我跟過 Lokman 學跳舞但因為本人麻麻哋 locking 所以無乜點上幾多堂，反而佢（唔知重係唔係）女友教的jazz funk我係有上下。還記得 Lokman 教我嗰堂我對住塊鏡自己跳埋啲無謂嘢，好好玩好開心，哈哈。佢嗰陣重拎住啲應該係《狂舞派》嘅劇本用A4紙一開4咁印，啲字勁細粒咁喺度背。佢真人同入面一樣都係咁幾好人，不過自信除咗跳舞個陣係差啲，無咁有星味，睇《狂舞派》就知，演技係麻麻。個陣同黃修平傾偈：「佢咁靚仔竟然重咁努力跳舞無去做藝人」。修平話：「係呀，好難得」其實跳舞同做藝人未必係唔可以並存。自信或者魅力呢啲可以培養，所以真係大熱嚟。
Lokman 55強的表演係扮孫悟空，佢除咗有才華亦捉到路識得設計大家想睇嘅嘢，果然是多年的跳舞+排舞老師，努力無白費。
因為幫開啲唔識跳舞唔知做乜（如我）的0靚仔排舞，所以佢哋都係慣咗講嘢好厚道唔嚴厲咁重會氹人（但好多排舞老師背後就媽叉到爆）。之前個世界盃 live show，花姐叫佢去重新排過一個得50個人的舞，我有啲覺得蝕囉，人哋平時排舞係收錢咖，而家要人免費做。呢啲應該係有專屬排舞老師跟隊咖嘛……
第二個係Dee Gor，原來，我係做過主持訪問佢，佢個陣重係「學舌鳥」身分。一面之緣係曾經在某一 studio 裡一齊練過freestyle（一次咁大把）。其實佢跳舞做戲等等好有心，但星運同機會係唔容易遇。同佢一齊做「學舌鳥」的游學修係我眼中已經紅咗，佢做戲係非常叻非常細膩，而且造型唔算靚仔但好多角色可以做。Dee Gor，可能係似綠葉啲，但講真佢拍那兩套戲我都無睇過。但Dee Gor 真係超有heart，佢55強個《花式自殺自我介紹》係我覺得最好的表演。要度到一份稿，有咁嘅口材技巧去演譯、咬字清楚、有演技、抑揚頓挫、有埋舞台走位，你聽完佢講完覺得好笑、entertaining，時間過得好快，你知唔知係件幾咁難嘅事！
雖然Dee Gor 對自己外貌好無信心，但我睇過佢金像獎條片，佢就係為咗16秒演出努力好多日嘅人。
香港需要咁認真而有才華嘅人，希望以後見到佢更多演出！
(第3個兄弟Alton 我真係無遇過呀吓，放心，我真係麻麻哋佢，唔會講）
跟住，梗係不得不提，我最鍾意的姜濤！好多仔唔明點解下至10幾上至60的女性都會為姜濤為之尖叫，明明係一條死o靚仔……咋喎。貪佢靚仔？大把人靚仔過佢。做戲叻，係好嘅演員；唱歌叻，係歌手；跳舞叻，係dancer。但咩係偶像？就係行出嚟就會引來尖叫令少女中女熟女們心都跌出嚟的，先可稱之為偶像！觀眾緣嘅嘢，唔一定要才藝好好。啲人講得啱，楊千嬅演戲、唱歌都唔係頂級，但大家鍾意佢；Twins 更加不用說，大家就是喜歡睇。個堆咩棒棒堂、5566、流星花園，大概都是這類（我唔鍾意男明星所以真係唔知）。 話時話我都唔係好理解當年點解咁多師奶為咗羅力威尖叫( 要問雨僑)。
姨姨我，由細到大，鍾意親嘅明星，都係女性，我係從來都未鍾意過一個男明星，更加從來都無去過任何一個男歌手的個人演唱會。但姨姨我，睇 ViuTV，見到姜B出來嗰刻，係一個腐女坐喺屋企對住部腦（我無電視機）都會自己叫。上一次我咁做，應該係未結婚的楊岳橋（我絕對應該為曾經有過呢件事砍頭埋牆刀插大脾）。見到佢因為個表演設計得唔好，聽完花姐講係度喊，我心都跌埋出嚟。可以見到佢係真係好努力好想做得好嘅人（嗰啲咩遲到已經唔記得晒）。
好多人可以係專業嘅演員、歌手、舞者，但偶像，就係呢隻。或者咁講，好多人鍾意大姨媽，覺得佢各方面都係有高於平均的水準，點解唔收？因為評判覺得佢唔似明星。好多人表演幾好都唔入，都係呢個原因。評判寧願揀騎尼、人哋記得嘅，也不揀表演幾好但平平無奇嘅（當然班友係無後果，當玩）。當然，姜b係上過《快樂男星》30強，實力係有番咁上下。佢的問題係繼續萌萌萌可唔可以玩到尾啫。
然後，我想講99強表演，我最鍾意除咗姜b，就係 Jason，那個可以即興創作，形象似盧廣仲的文青音樂創作人。我係勁欣賞勁有才華嘅人，佢嗰表演係99強最好，當然去到55強就失色咗，但基本嘢有，氣質執下都討好。
我其他比較鍾意嘅55強表演，有狗毛自彈自唱《Geek in the pink》啦，話晒佢好似係出咗道，成件事係出道歌手水平喇，而且都幾靚仔，不過，我麻麻哋呢type.
不得不提嘅當然重有100毛龍志權的表演啦。佢勁在係，成個設計勁100毛風格，用表演去掩咗佢就咁唱歌無咁有吸引力嘅弱點，然後計到每幾多秒就有爆點（都係網上影片的竅門），啲gag位又有共同回憶，好叻。
Mark Tai 幾好，改篇首 《Lonely Christmas》係我會想儲來聽嘅嘢，可惜太遲早搞到無位。Ian 唱歌係掂，有吸引力，自彈自唱入面係較好的人。
然後那推咩Anson Alton，咩viutv 一姐黃心美之選，係靚仔，係基本嘢齊，但我就係無印象。我並唔係特別鍾意靚仔嘅人，總之就印象模糊，你叫認我到而家都認唔到。反而我頗鍾意 Jeremy，係好韓風，唱跳俱佳，將英文歌唱到韓文歌咁，唔係話會瘋狂鍾意但好有風格好有魅力。阿姐我鍾意呢啲種類多過已經泛濫了的靚仔。有啲人話某啲參賽者成日去各種比賽(e.g. yimk hayden)，老油條咁，如果做到星就做咗了，可能係啱。