全世界都有自己獨特嘅街頭美食故事，就係香港無
Netflix四月尾新上架嘅美食節目《Stree food》，係《Chef’s table》 製作人嘅新作。相比《Chief table》嘅精緻高雅，《Stree food》充滿庶民氣息同活力，無疑更加啱我口味。
《Stree food》第一輯嘅主題係亞洲，分別有泰國曼谷、日本大阪、印度德里、印尼日惹、臺灣嘉義、南韓首爾、越南胡志明市、新加坡、菲律賓宿霧。
曼谷痣姐，七十幾歲，甩鑊嘅手勢流暢純熟悅目，帶住護目鏡炒餸嘅身影非常有型。
大阪街頭居酒屋豐嘅老闆，幽默、技藝高超，手拎火槍，徒手喺烈焰下翻動吞拿魚下巴，之所以徒手，係怕用金屬夾會傷到柔軟嘅魚肉，揚言會喺流理台上至死方休。
每一個地方都有佢地獨有嘅街頭美食同故事，街邊檔最反映到當地嘅飲食文化。連出名潔癖嘅新加坡都可以佔一集，點解成個系列就係無香港呢？香港無街邊檔咩？係。今時今日嘅香港，街邊檔已經少得可憐。
我喺屋邨大嘅，童年分別住過九龍城寨、秀茂坪、青衣。幼稚園返學之前嗰包熱辣辣多花生嘅糯米飯，夜晚城寨大排檔嘅花生雞腳湯同蕃薯糖水；秀茂坪小販成行成市，跟住阿爺落街，偶爾扭計成功會有魚蛋、砵仔糕做點心。
大個少少，去屋邨路口買明火雞蛋仔同格仔餅係偶爾可以享受嘅奢侈，仲有可遇不可求嘅即炸油炸鬼、煎釀三寶、富豪雪糕車嘅軟雪糕、街市嘅豬腸粉、豆腐花，各種小食填滿咗我嘅童年回憶。
中學跟大人去屋企附近嘅冬菇亭打冷，係好日常嘅事，椒鹽狗肚魚、炸大腸、各式小炒，當年唔覺有啲咩特別，只係好普通嘅街坊小菜，無諗到咁嘅質素喺今日已經唔容易搵得到。
即使當年屋企一啲都唔有錢，但係我依然享受過好多美食，多姿多采嘅廉價街頭小食同大排檔，構成咗我判別食物質素嘅部份基礎。
從八九十年代開始，做小販好似衰過賣白粉咁，會被小販管理隊追九條街，流動熟食小販更加被政府賣廣告抺黑，街邊嘅車仔檔亦漸漸息微。即使入咗舖，有租金嘅壓力，一檔嘢唔可能只賣一兩樣嘢，越做越雜越濫，越來越貴，越來越唔好食。
以前做冬菇亭大排檔不但可以養家活口，我親眼見過一間茶檔老闆，由乜都無做到樓都買到幾層。再後來，房署變賣屋邨商場，服務居民嘅屋邨商場變成上市公司領匯嘅資產，上市公司只會睇盈利，冬菇亭呢啲唔好睇又廉價嘅檔口，慢慢被領匯逼死。最庶民最有香港特色嘅綠色鐵皮大排檔，亦因為政府唔再發牌同續牌，已經所餘無幾。
唔好同我講最少仲有年初一至三所謂嘅旺角夜市，嗰啲只係殭屍，大家去只係為咗湊熱鬧同懷緬過去。擺檔嘅人只係想發下新年財，無需要對自己嘅出品負責任，所以無論價錢定食物質素，都完全唔值得期待。
今時今日，香港細路嘅童年味道，就得返麥記、珍珠奶茶同埋學校難食到嘔嘅飯盒，佢地嘅回憶入面，已經唔會再有香港獨有嘅味道。