做出版嘅＜5＞書，唔係大嘅就係好

書不在Big，有Heart則明。

唔知道大家買書嘅時候會考慮啲乜嘢呢？我自己買書其中一個考慮嘅因素，係講緊書嘅Size。

喺香港買中文書，通常都係香港或者台灣出版（我冇買簡體字書好耐），大家有冇發現，台灣出版嘅書，普遍比起香港出版嘅書，Size都係偏大本？例如一般小說、工具書等等，台灣出版最少都係A5大細。而香港出版嘅書，亦傾向越嚟越大本。反而歐美嘅一般書刊都係窄身，日本就流行所謂嘅袋裝書，即係文庫本。咁樣一比較之下，A5大細嘅書真係特別難揸上手揭，尤其遇着我呢種隻手細嘅人，拎住本A5大書睇一陣就想放低。

然後，打開啲A5大細嘅書，發覺啲字印到好大隻、行距好疏，谷到本書好厚，令人有個錯覺，好似唔夠200頁都唔應該推出市面出版咁，於是就夾硬搞到啲書又大本又重。又或者本書冇咩內容，於是個版面設計就玩到天花龍鳳，逼爆晒個頁面，搞到睇字都覺得攰（唔設計嘅話，個美術編輯又俾人鬧唔做嘢blablabla…）。其實調整番內文字嘅大細、行距，只要睇得舒服就可以，以讀者角度，係唔駛夾硬谷到本書大大本，而又好似冇咩嘢睇咁。內文排版咁花，反而睇唔到啲字。

除咗啲畫集、字帖、相集、圖表、學術研究係有需要出大大本書，一般文本又真係未必需要夾硬谷大本書。

即係咁，出咁大本書做咩啫？

但係以出版社角度就唔同，唔谷咁大本書，點樣定高啲個價？而家本本書賣緊百九幾蚊，啲批發商一嚟就斬你一半個書價做發行費喎。唔係邊有咁爽皮，喺書店買台灣書有７折8 折咁開心？出到啲書大大本，又重又冇咩內容又唔環保，其實都係想賣貴啲本書，圍得一蚊得一蚊。

書嘅大細影響成本、影響發行價，但係好多書商冇諗過，大本書→賣貴啲→賺多啲，呢個原理背後，其實蝕得可能仲多。

出咁大本書蝕咗啲咩？

<１>地球嘅資源 我知。冇人CARE。

<２>讀者屋企嘅空間 我知。呢點書商都唔都CARE。 試諗吓咁大本書，令到書架變相放少咗書，書架睇落又迫又唔美觀，香港又有土地問題（唔知台灣有冇）。將心比己吖，我做讀者喺書店見到咁大本書，都要諗過度過先至買，咁咪錯失咗讀者有可能會衝動購買嘅黃金消費機會囉。

<３>印刷費 係嘅，我明白書嘅大細未必喺印刷費上差好遠，可能B6同A5每本書成本差幾蚊，但係A5可以令本書貴廿蚊。不過結果找數畀印廠都係貴咗，而本書大咗未又必幫到手賣書。咁點解唔印細少少而又平少少？

<４>倉租、倉嘅空間 書商啲倉其實係咪好平租？本書大咗，佔嘅位置多咗，個倉可以放存貨嘅空間就會少咗，好快又唔夠位放回書。於是三不五時又要開倉平賣，總之點計都係唔着數。印細本啲書咪冇咁佔空間囉。

<５>運輸費 其實物流費用都係成本，無論係印廠嘅包運、回書嘅運費、郵寄畀讀者，所有嘢都係物流支出，而且隨時都會計重量。本書大咗重咗，就算用幾輕磅嘅紙都有一定重量。大本咗＝重咗＝運費貴咗，咁簡單嘅道理唔係唔明吓嘛？

袋裝書係咪最理想？

喂呀，講到大本書咁差，咁袋裝書最好啦？ 又真係吹佢唔脹，喺香港出袋裝書真係唔WORK。

以前有一間叫做「環球」嘅出版社，專出袋裝書，細細本十足日本文庫版SIZE，推出過好多流行讀物，例如言情小說、武俠小說等等，而且價錢唔貴，印象中都好似係廿蚊一本咁上下。不過唔知係經營不善，定係其他奇怪原因，後來環球嘅命運係被收購，旗下嘅袋裝書存貨去向…唔講喇，我有份處理。

仲有「博益」出版社喺八十年代出版過好多流行讀物，Size都係細細本嘅袋裝本。好多人都應該透過博益認識赤川次郎、吉本芭娜娜、村上春樹等等日本作家。黃霑、倪匡、蔡瀾、梁望峯、黃易等等香港作家都喺博益出版過好多暢銷書。但係隨住博益喺2008年結業，袋裝書王國都隨之瓦解。

可能你會話，小說啫，咁啲工具書呀、漫畫呀，都可以出工具書細細本㗎喎。

大家有冇去過啲圖書特賣場？即係十蚊一本任揀嗰啲，當中有大量袋裝書平價出售。見到原價幾十蚊嘅袋裝書淪為十蚊一本都冇人理嘅平價貨，就感到莫名心痛。

漫畫都一樣唔好得幾多。市面上常見日本漫畫最細嘅大小，喺日本叫「新書判」，大約113mm×175mm，即係大家可能仲會買嘅《One Piece》、《金田一少年事件簿》、《龍珠》嗰啲大細。

而袋裝書文庫本有幾大？大約105mm×148mm。漫畫喺香港都有出中文文庫版嘅，例如舊版《叮噹》、《鐵拳浪子》都有出文庫版，但係唔知點解，明明價錢同一般漫畫單行本差唔多，但係銷量係一半或以下。總之香港人就唔鍾意袋裝書。

袋裝書係咪有啲咩問題？

利申，我個人係超級無敵咁鍾意文庫本，尤其日本嘅文庫本通常都係經典重鑄，除咗作者會修正，仲會收錄一啲連載嗰陣嘅彩圖、新寫嘅短篇、書評人嘅文章、作者訪問等等。但係嚟到香港或者台灣，唯有夾硬將Size拉大到A5先至有人買。呢招喺前兩年真係用到盡，例如《死亡筆記》文庫版被拉大到A5重出中文版，價錢賣到HK$85，賣到要加印。

點解袋裝書喺香港、台灣都好似唔work？

有讀者反映話畫面太細，睇得冇咁爽。我明。

有讀者反映話咁細本書，唔值得咁貴。我唔明。

書嘅價值用大細去決定，呢個概念絕對有問題。

製作書刊嘅成本，唔單止係書嘅大細，仲有書嘅用紙、印刷等等製作，同埋作品本身嘅價值。以上任何一個細節，都係影響讀者買書嘅元素。

見過熟人用咗劣質紙印刷嘅書刊，書價算標得高。我作為一個挑剔嘅讀者，就會因為劣質紙而冇買到本書。

見過畫集嘅彩色印刷偏色偏到九彩，影響鑑賞品質，又令我放番低本書喺書店。（尤其我個人幾乎唔買畫集）

點解日本咁流行細本嘅袋裝書？

呢個係錯覺。其實日本都流行精裝版書刊，尤其好多作家第一次推出作品，都係以日本稱為「新書」嘅形式去出版，可能會係硬皮釘裝、Size好多都係大大本A5或者B6，如果係學術研究嘅專門書籍，因為圖片較多，A4嘅都有（真心重，我都好少買咁大本書）。

幾時先會出文庫版？可能係新書賣咗幾年斷貨唔加印之後，又可能作品突然獲獎、突然改篇做電影、日劇，又或者純粹係同作者嘅合約完咗，簽新約出文庫版。總之喺日本有千萬個可能會出文庫版，而文庫版嘅好處係細本可以裝落袋，搭車都可以拎出嚟睇，呢點大家都知就唔多講喇。

而家搭車仲會睇書㗎咩？

係囉。搭車都碌吓部電話啦。仲睇書。

對於做出版嘅人嚟講，書嘅Size真係其中一個最關鍵嘅決定。太細本讀者又嫌Cheap，太大本讀者又嫌阻定，實在係好難決定。身為出版人，都希望對地球好啲，減少用紙。可能因為咁，電子版流行亦都係大勢所趨。

但係，我覺得印刷嘅學問係藝術，唔希望喺我哋呢一代就失去印刷嘅技術。尤其係，其實香港印刷水準非常高，唔少本地印廠都有接外國訂單，而且香港印廠唔會抖膽到亂咁CUT人稿、改人本書嘅內容，仲好有經驗同品味，印廠往往可以畀到好好嘅意見你。而且，而家好多印廠都接受少量印刷，比起以前門檻低得多。

在此極度呼籲，有興趣出書印書嘅朋友，盡量幫襯番香港嘅印廠。唔知邊間好嘅話，我可以推介好印廠。（真心推唔係廣告）

想喺香港買到日本文庫版書刊，除咗日本書屋，可以去銅鑼灣嘅寫樂堂中古書店。而個人特別鍾意去嘅二手書店精神書局都喺灣仔開咗新分店（離我屋企遠咗…［泣］），兩間書店都值得港島遊嘅時候去。

「做出版嘅」系列

做出版嘅＜１＞藍紙 做出版嘅＜２＞找數 做出版嘅＜３＞書名 做出版嘅＜４＞原創 做出版嘅＜５＞書，唔係大嘅就好 做出版嘅＜６＞Omicron 做出版嘅＜７＞復刻香港六十年代依達文藝小說 做出版嘅＜８＞我可能係史上第一個被作者NG筆名嘅責任編輯

[WTFtranslation]系列：

總集篇<01>完。 總集篇<02>完。 總集篇<03>完。 總集篇<04>完。 總集篇<05>完。

「翻譯筆記」系列：

翻譯筆記01 翻譯筆記02

My Medium Record：(Update中) https://readmedium.com/my-medium-record-e1f290f9c470 伊死出文=奇蹟

順手睇埋：

個人BLOGss~ ☆伊死的漫畫特區 （講漫畫、讚漫畫） ★嚟Plurk吹水 ☆開咗MeWe