去旅行摸門釘，都有手沖咖啡飲既境界

作為一個鍾愛手沖咖啡既吃貨，去旅行前會逼人介紹啲咖啡店，等有時間就去下。

不過，不論係唔係去嘆啡，旅行最怕就係山長水遠去一個地方之後 – 摸門釘；如果摸門釘有排行榜，我都應該全球100強。但原來摸門釘，都係運氣既考驗。

話說週末同中學同學去台北快閃，咁有個下午就大家自由活動：血拼既繼續血拼、去打咭既繼續打咭。咁我當然係去嘆啡！

搭巴士到中山站附近落車，跟住Google Map行。就到Google Map講既目的地。

行埋去睇到個牌之後心諗：GG

今日係星期一，就係牌上講既「炒豆日」。我果下望下電話，又望下個牌。：「點解唔同既個時間」。 無耐，就有位叔叔行出黎，話「不好意思，今天烘焙日不會開店」，我答左句「對哦，真可惜，那我下次再來吧」。個叔叔就行番入店。

我果下只係諗住，影埋張相走啦咁。點知無耐個叔叔就追番出黎，拎住個咖啡杯。話請我飲一杯今朝沖既咖啡。

受驚若寵係唯一可以形容我心情既詞語。飲左小小，我同佢講酸味岩岩好，唔會太酸又岩岩有一絲甜味。佢有講係來自邊度既咖啡豆，但掛住飲既我唔記得了，仲俾隻蚊咬左勁大啖大脾。

然後我再望多次電話，心諗無理由架，連間舖頭名都唔同喎。點知我本來想去果間Coffee Sweet，真係唔係呢間。哈哈。

我一直相信做好人一定會有好報。咁我無以為報，就唯有特意寫篇文。 如果你有去過，或者打算去呢間店，話俾我知個叔叔叫咩名，等我下次都可以多謝佢，同真正幫親佢。

慢動作咖啡館

台北市中山區中山北路一段33巷20弄6號 Facebook page