作為一個人

兩個月前，托朋友福，有機會到理大打波。一直對理大感覺特別，人生流流長，即使唔係理大學生校友，總會有機會經過理大，可能係送朋友最後一程，可能係出尖東飲嘢，可能係聽演唱會。位置交通要道中間的這座紅色建築，以大學來說不算大，但麻雀雖小，那次去打波見到鮮見的「樓下」體育館，有種「it is just neat」的感覺。

然而，尋日開始，呢間大學變成咗戰場，示威者被警方圍捕，雙方激戰，中間多少網上的片段不一一細談，大家有睇都睇到心口痛。回想幾日前，中大算係逃過最差嘅情況，無被屠城。

中大係我母校，從無想過有生之年會在公司望住螢幕喊。

望住一草一木都係自己熟悉的地方，之前還常帶小兒回去行行，嘆下午茶，頓變成年輕人要互相交咐生死，拼上生命抵抗守護的要點，眼淚就流落嚟。好幾個舊同學一開工即衝入中大，到地頭蟲才知這道的小道支援，那一晚，很漫長。

如果你希望可以從這發文中尋得安慰和啟發，抱歉，要讓你失望了，要打這篇文已經很吃力，更不要說沒有好好組織，沒有中旨，我只想分享一個想法，就係，「作為一個人，我們應如何自處？」

雷聲大，雨點小。實只係想講作為一個人，咩嘢啱咩嘢錯，或者呢個世代裹面我哋好難講清楚，真相想辯都難，莫講要辯明白，講時唔駛俾人打已經好彩。

但唔講明啱同錯，可唔可以唔好講涼薄嘢呢？咩係「死得好」同「打得好」？對住個殺人犯都未聽過如此狠言，這等侮善怕惡之輩不是文盲生番，而是有受教育的人，到底係出咗咩問題所以變成咁？

綠色物體已經超出我自己所能理解的物種範圍，感覺他們是單純讓感受去做所有決定，即係鍾意點就點，而佢哋所做同自己本身價值觀完全沒有遺和，我的餘生唔知再點可以當返佢哋係人類。Never forget, never forgive.

我真係無能力長時間罷工，幫小兒罷課，自己罷到就罷，罷唔到就擺爛，試過去地鐵站睇住年輕人同一睇就知收錢做戲的藍絲口角一個鐘，然後去食早餐，再上架到唔到公司嘅巴士，落車行一個鐘返公司。返到去食午時間，下午又擺爛。

其實咁罷法，完全沒有意思，做不完的工作只會OT贖回，但作為一個人，我覺得仲坐喺公司本身已經好醜。

我又試過夜晚跑步跑過警署，見到門口有持槍警察，我不知道應唔應該跑過去，但停落嚟會唔會更危險，最後我還是跑過去，那一念是覺得作為一個人，我要拒絕活在恐懼之中。

無奈恐懼的日子可能還很長。

香港人加油。