「人生財技之填窿、填氹與填海」
頭盔時間：呢篇嘢唔係講緊《施政報告》，更加唔係講緊中美貿易戰或者政治。要睇相關評論嘅，留意返《賴叔睇育》。
頭盔完畢。
人與生俱來就有窿，兩邊大耳窿、擘大個口得個窿，男女性器官，一樣有。你唔好同我講你嗰個係密籠架下，包皮過長唔衛生架。
身體髮膚以外，人生一路走來都會好多窿。孩子蒙受父母養育之恩，欠下嘅恩情，真金白銀都還唔清。不過咁樣唔代表唔使你還，所以有樣嘢叫家用。即使父母真係幾千萬未開頭唔使你養，你一旦有下一代，就欠下大筆兒女債，花光精力心血時間都只係找到利息。
喂，點解做人仔女爭父母債，到自己做人父母就欠兒女債？因為通漲囉。你老豆老母養大你未必需要四百萬港紙，但係你要養大下一條化骨龍就 double 都未必夠。
窿，係要嚟填嘅。窿，即是 loan 。 Loan ，即係債。喺債務成為一個大窿之前，債務係一個氹。羅馬非一天建造丫嘛。所以，對於債務有知有覺嘅人，喺要填窿窿之前，會諗方法填氹。
填氹嘅方法有好多種，不過唔係每一種都適合你。家有父蔭嘅就可以做伸手黨，拜觀音嘅可以借庫 (但未聽過做觀音兵嘅，可以問娘娘借錢⋯⋯時代唔同喇) 。再唔係，問下莊遜兄弟或者賴中財務，肯畀啲利息，總可以套筆錢出嚟應急填氹。
然而，借貸始終係十個茶煲九個蓋。今時今日，除咗借，更盞鬼嘅方法叫「證券化」 (Securitization) 。其實呢樣嘢一啲都唔新，十年前美國次按危機，出事嘅咪就係啲 ABS 、 MBS 。乜 S 話？
- ABS: Asset-Backed Securities
- MBS: Mortgage-Backed Securities
兩者都係攞啲資產出嚟，打包成證券，攞去賣。
咩話？ Mortgage 明明係債？你啲樓奴做銀行債仔啫 (雖則我都係) ，喺銀行以至按揭中介機構 (Fannie Mae / Freddie Mac 呢啲) 本簿入面，你爭佢哋嘅按揭貸款就係佢哋嘅資產。
佢哋攬住呢堆嘢要承擔你走數嘅風險，又責住啲錢冇得再借出去賺息喎。咁有聰明人就幫佢哋手，將唔同年期、信貸質素嘅按揭貸款 (其他 p-loan 、車輛上會等等都可以) 擺埋一齊作為 underlying assets ，發行票據或者特別用途公司 (SPV，全名 Special Purpose Vehicle) 嘅股份，將信貸風險 (credit risk) 轉移畀投資者，代價就係相對地高昂嘅利息成本 (閒閒地都八至十幾厘) 。
金融市場嘅可愛之處係，你可以證券化嘅嘢，就可以投資。 ABS 同 MBS 除咗單頭買賣之外，亦成為高息債券基金嘅寵兒。唔信嘅你去搵下啲基金資料，唔少定息基金嘅投資策略或多或少都有涉獵呢啲債務衍生工具 (credit derivatives) ，雖然買嘅比重未必太多 (例如話九成買美國國債、一成買 ABS / MBS) ，但係喺一街都好息之徒嘅時勢，呢一成債務衍生工具所帶來嘅額外利息就可能係產品回報嘅關鍵。
換句話講，你喺美國田納西州借錢買屋，或者你老豆間建築公司問銀行借錢買材料，帶來嘅按貸同貸款，喺金融市場都可能被打包成 ABS / MBS 買賣，或者畀基金投資，然後上至機構投資者，下至散戶都可以直接或間接 gain exposure to your 窿。諗起都興奮呀可？
未夠。 MBS 又有一個親戚，叫 CMBS (Commerical Mortgage-Backed Securities) 。一般 MBS 底下係住宅按揭，而 CMBS 下低係商業樓宇嘅按揭。即係舉個例，某財團宣布買起成棟 IFC 要嚟畀人玩空中飛人，但係又唔夠現金一炮過，於是要問銀行借錢做按揭。咁銀行有生意，冇話唔做架，但係你 IFC 萬一唔夠人排隊上 88 樓玩飛人，租金收入唔夠冚，到時斷供銀行就企咗喺度。於是，銀行可以將 IFC 按揭打包成 CMBS ，再賣畀各方友好，你收息，我收遮。
就係咁，呢個世界無論有幾多個窿、有幾多個氹，只要金融市場一日未落閘放狗，一日就有方法填窿填氹。
至於你話，如果個氹大到成個湖咁，甚至成個海洋咁大，要移山填海，有冇得傾呀？有！呢個世界除咗金融市場，仲有「儲備」。每間公司賺咗錢，唔派息畀股東，可以撥落儲備。每個政府收益大過開支，財政有盈餘，唔派糖畀市民，可以撥落儲備。另外，三五七時春秋二祭清明重陽，都總有藉口或理由將手頭上閒餘資金「撥備」，擺落基金度投資。喺香港，嗰隻基金就叫「外匯基金」。
根據香港金融管理局截至 2018 年 8 月底嘅數字，外匯基金總資產達 39,937億港元。當中大約有三分之一係香港特區政府嘅財政儲備、大約兩成係累計盈餘、另外四成左右構成香港嘅貨幣基礎。財政儲備可以撥入，當然有機制提取。如果真係有錢要使，要應付當下開支 (以至財政赤字) ，金管局係可以打開度門畀政府提款嘅。睇返 2001 年時任金管局總裁任志剛點講：
如果，我係話如果萬一假設若果假如，香港政府嘅財政儲備精盡人亡⋯⋯ sorry 係油盡燈枯、兵糧寸斷，金融市場仍然可以提供解決方案：金管局可以發行票據借錢啦，政府可以用港鐵公司或者公營機構去借錢承擔基建開支，然後銀行將有關貸款打包，簡稱 BS (you know who) ，再攞出嚟畀大家認購收定息。他朝填海大業既成，賣地、基建項目收成等好消息接踵而來，財務深海填下填下，自然變返一個窿仔、一個氹仔，最後還原基本步，無數。
以上唯一一個假設，係港元基礎仍然牢固，仍然為國際投資者所認受，咁呢啲以港元為底層資產嘅 SPV 先有人買。又或者學似阿根廷或土耳其咁出幾十厘息借錢囉。九出十三歸，條數聽到都覺得大。到時聯繫匯率仲係咪可以靠 HKMA 操作維持？ Question mark 。
呢個亦 somehow 解釋咗，點解 ABS / MBS / CMBS 玩到出神入化嘅美國仍然生勾勾。因為，全世界都用美金囉。你衰到盡，大家都要用你嘅貨幣進行貿易。中國過去多年努力提升人民幣嘅地位，意欲取代美元嘅國際地位，亦係為咗爭取話語權以及不死身。爭唔到嘅，填窿、填氹都係權宜之計。但係玩到汪洋大海咁大，我唔知香港玩唔玩得起。
