《中環攻略》之卅七：外傳：寫於 2020 年 8 月

多謝大家收睇《中環攻略》，本書其實去到上一篇就應該完咗㗎喇。至少，我 2019 年出書嗰陣，都以為係咁。儘管後續都有其他諗頭或者搞作曾經想過要做，但係最終都冇實行到。

唔係因為我執行力低啦 (識我嘅都知道冇咩可能) ，而係因為原本出版嘅著作，真係因為一啲不可抗逆嘅因素而必須下架，連帶原本嘅 Facebook 專頁都要改名做《職場心經》。咁冇嘅，多謝 Penana 呢個平台，畀我可以用最短嘅時間、最少嘅功夫，就將當初寫好嗰五萬幾字重見天日。

短短一年多嘅時間，足證物是人非。其實物都唔一定「是」。例如話我原本投放大量時間落去經營嘅 Medium 平台吖， 2019 年年底話修訂計算作者收益嘅方式，實際上應該係因為平台要閂水喉所以大幅削減對作者嘅補貼。如是者，一大堆作者就各自遷徙到其他平台，例如 Patreon 或者方格子。

我都當然唔例外，畢竟寫作嘅嘢除咗射落海，都仲有一定嘅價值。正如大家捨得喺 Penana 擺低一個幾毫睇《中環攻略》或者其他作品咁。

舊年出書，我一直覺得係一件 once in a lifetime 嘅事情。意思係，出一本好喇，唔好咁折墮浪費咁多紙章同油墨。而今年將《中環攻略》借屍還魂，其實都係拯救唔到啲樹木或者地球嘅，但係，純粹覺得唔好嘥，自己啲字，如果幫到讀者嘅話，大家咪等價交換囉。

2020 年，賴叔開咗個 Facebook Page 叫《規佬筆記 Compliance Notes 》，專門從 Compliance 嘅角度分析金融新聞，亦都有講下 FinTech 嘅最新發展。兩者都係我嘅興趣 (奇怪呢) ，而我見到大家嘅反應，係比想像中熱烈嘅。

2019 年冇人估到 2020 年會全球爆發瘟疫而生活完全翻天覆地。同樣地， 2020 年，我哋都唔知道 2021 年會發生啲乜嘢事。大家可以做嘅，就係做好目前，活在當下。賴叔會繼續努力寫作，感謝大家嘅支持。日後繼續喺 Facebook 同 Patreon 再見 — 如果我會寫第二本書就另計。

Patreon link: https://www.patreon.com/shuklai