中大雜記——與蚊共存，親親大自然

好多人以為全港最大嘅血庫係喺紅十字會，但係只有受過高等教育嘅中大人先知道，最大嘅血庫係喺中大。 每逢夏天，中大就有一個個移動血包喺度行走，由無私嘅O型血去到自撚私嘅AB型血都一應俱全，間唔中仲會執到寶，可能有O型陰性添。 對於飢腸轆轆嘅蚊滋嚟講，中大就係一間米芝蓮三星仲要係自助餐嘅餐廳，每一道菜都係Gordon Ramsay親自下廚，真係邊有咁大包血漿隨街跳㗎？中大就有！ 點解香港呢啲亞熱帶地區咁多蚊蟲，偏偏要提中大？因為中大係一間崇尚自然教學嘅鄉土田野研究型大學，喺教學方面教導學生同大自然共存，例如叫學生坐熱狗巴，又或者行山返學，又或者課室入面顯示25度但係實際係30度嘅冷氣，同埋訓練學生點樣喺高二氧化碳濃度嘅課室入面聽書同埋考試。 中大嘅辦學宗旨就係人係自然嘅一部分，人生存於世上，就係要畀蚊咬，只有經得起苦難嘅人先可以成材。古埃及當年都係經歷過十災先成為到四大文明古國，所以中大學生都有十災，其中兩災，虱災相信住過宿嘅同學仔都經歷過，而蠅災，喺中大嘅威力加強版就係蚊災。 聽講校方都曾經嘗試過去滅蚊，但係佢哋可能用咗啲草本古方，又或者係用人血去滅蚊，總之我成日見到啲貪涼爽嘅同學身上都一噠噠，紅紅腫腫，唔知真係以為佢哋畀人打完一身嚟。