《中國娼妓史》一．搞清楚倡、娼、優、妓先。

1. 壽桃按：椎名ゆな復出咁大件事，要好好慶祝。開本juicy 書同大家開心些牙。目標係一星期一章，總共六章。

2. 介紹返，《中國娼妓史》，係1932年王書奴嘅作品，1988年三聯書店1版1刷嘅版本。點解會有哩本書出現呢？作者喺序度交代：

3. 一、佢叫雞經驗豐富。

4. 二、當時日本已經有好多講緊娼妓史，例如：中山太郎《賣笑三千年史》、道家齋二郎《賣春婦論考》、瀧本二郎《世界性業婦制度史》。反觀我地中國堂堂泱泱大國三千年叫雞歷史，竟然無人整理，實在豈有此理。

5. 三、作者認為娼妓係社會問題黎。連登仔會為左電子雞圖蕩產傾家、香港又有14 歲靚妹已經做雞頭咁叻女，娼妓同文化、政治、社會、經濟有密切關係。商代已經有「巫娼」，唐代最進步，官吏狎娼，無法律限制，抄一句章太炎《五朝學》講嘅：「唐代荒淫，累代獨絕，播在記載，文不可誣。又其浮兢慕勢，尤南朝所未有。南朝疵點，專在帝室。唐乃延及士民。」為左國家販榮娼盛，研究娼妓史係必須的。

好，入正題。講下定義，究竟咩係「娼」呢？

6. 東漢（121年）許慎嘅《說文解字》有「倡」字，而無「娼」字。

7. 去到南朝梁代（543年）顧野王嘅《玉篇》先有「娼」字，仲有解釋話：「娼，婸也。」

屌你老母，咁「婸」點解呢？

8. 又睇返《說文》：「婸，放也，一曰淫戲。」

9. 宋代（1037年）《集韻》話：「倡，樂也，或從女。」

10. 明代（1627年）《正字通》話：「倡，娼優女樂，別作娼。」

11. 總結幾本字典千幾年嘅講法：古代娼女起源於音樂。所以後世娼女雖以賣淫為生，而音樂歌舞仍是主體。

所以呀，女人老牛聲、肥婆唔跳得，喺古代無資格做娼架。

12. 再講講「優」同「倡」。壽桃按：大家或者知，「優」嘅意思係演員。所以「女優」係好古雅嘅一個詞。

13. 但古代係「優倡不分」嘅。至少到三國時代仲係。以上一段小故事《三國志．蜀書．許慈傳》：「（許）慈、（胡）潛並為博士……值庶事草創，動多疑議，慈、潛更相克伐，謗讟忿爭，形於聲色；書籍有無，不相通借，時尋楚撻，以相震攇。其矜己妬彼，乃至於此。先主愍其若斯，羣僚大會，使倡家假為二子之容。傚其訟䦧之狀，酒酣樂作，以為嬉戲，初以辭義相難，終以刀杖相屈，用感切之。」

14. 壽桃譯：許慈同胡潛喺劉備稱帝後都係做博士，哩兩個人嘅工作主要係恢復漢朝嘅制度禮儀。但佢兩個互相睇對方唔順眼，經常相互誹謗，家中嘅藏書打死都唔會借畀對方，有時仲會返工隻揪。劉備為左化解二人矛盾，有日開蜀漢員工party，特登搵左「倡家」演佢兩個鬧交打交嘅小劇場黎娛賓，終於令佢地正常返少少。

講開又講，哩壇野令我諗起簡雍。又可能係哩壇野啟發左以後嘅戲曲梨園。

15. 講多句，古代「倡」係不分男女嘅。

16. 《史記‧趙世家》：：「趙王遷，其母倡也。」

17. 《漢書‧李延年傳》說：「中山人，身及父母兄弟皆故倡也。」

You see ?「倡」is a job！無分男女，仲可以父母兄弟齊齊做。

18. 要去到唐代，「娼」嘅意思先接近而家嘅「妓女」。壽桃補一段小故事：

19. 趙璘《因話錄》：「睦州刺史柳齊物，少而俊邁，家富於財，因調集至京師。有名娼陳嬌如者，姿藝俱美，柳詣之，悅焉。陳云：「第下錦帳二十裡，即奉事終身。」本易其言，戲之耳。翌日，遂如數載錦帳以行。陳大驚，且賞其奇持，竟納入柳氏之家，執媵僕之禮，為中表所推。明皇在人間，嘗聞嬌陳之名，訪知，乃召入宮，涕泣稱痼疾且老，上知其不可強也，命之歸。」

20. 壽桃譯：睦州刺史柳齊物，後生靚仔有錢做高官，有次調到京師，順便學下長官喺辦公時間叫雞。京師有個好出名嘅娼叫做陳嬌如，靚女得黎高音甜中音準低音勁，一句講曬通透。柳齊物想私有佢。陳小姐就話：「攞廿里錦帳黎接我，我咪跟你走囉。」靚女9up一句，毒撚就當真。第二日，陳小姐打開門就見到柳生準備好廿里錦帳等佢。咁大隻水魚邊度搵？陳小姐即刻從良入柳府做牛做馬，而柳家亦無因為佢嘅出身而看輕佢。唐明皇聽到哩件事，就召陳小姐入官玩下，點知陳小姐話自己成身花柳，背脊又多暗瘡，皮膚又唔好。唐明皇知道哩條女勉強無意思，就放佢返柳府。

哩種算唔算愛情？

21. 故事講完啦，總之一句講哂，唐代嘅「娼妓」同而家嘅好接近，唱完歌就做愛。同埋由唐代開始，娼妓絕大部分都係女人。

好啦，講完「娼」就到「妓」。

22. 《說文解字》：「妓，婦人小物也。」

23. 壽桃按：作者用一句「與妓女義意毫不相干」就帶過。但「婦人小物」嘅意思係咩呢？我搵唔到有解釋。係手袋？係裝飾？唔知道。我屌你班講啲唔講啲嘅古人老母。讀者如果知道嘅，留言話我知。

24. 去到魏晉六朝，「妓」嘅意思演變成「美女」。

25. 唐代《華嚴經音義》引《埤蒼》（三國魏張揖）：「妓，美女也。」又引《切韻》（隋代陸法言）：「妓，女樂也。」

26. 大概由三國到隋代，「妓」意思係「歌女、美女」。

27. 總結啦：

28. 「倡」：係歌手加演員。

29. 「娼」：係女性歌手。

30. 「優」：演員。

31. 「妓」：美女。

32. 至於「娼妓」，作者咁定義：因要得到報酬，而實行性的亂交，以滿足對方性慾，是為娼妓。

33. 壽桃話：你的樣子如何、你的銀包如何，你的性生活也必如何啦。