ZA 世界盃「千萬獎賞在一盃」，遊戲基建之強大，其他銀行唔敢同佢競爭喇

世界盃今晚開鑼，首場卡塔爾對厄瓜多爾，馬會足智彩買卡塔爾贏 1:0 嘅波膽有 6.5 倍之多，唔知之前嗰單做假新聞有幾真咁呢？

今屆世界盃就當然問題多多啦，非常 consistent 地貪污、為咗一個世界盃起咗 7 個場館、仲要死咗無數人 (不過呢啲過多個月又邊個記得？我同你講為咗起「某條橋」都死咗唔少人，你又記唔記得？)、咁熱又要開爆冷氣、咁細又要突然整超多酒店、仲要打亂晒各國聯賽節奏 (文尼同賓施馬都收皮鳥)，盲嘅都睇到 FIFA 有幾腐敗啦！

不過呢個唔係足球 page，波就唔講太多，我就只係希望有阿仙奴球員可以捧盃就好，即係英格蘭、美國、法國、日本、瑞士、加納、巴西咁咯。

講吓各間銀行點為世界盃備戰，吖？乜得一間有動作渣？

正當我諗住數吓各間銀行因應世界盃有咩舉動，我只數到 ZA 一間有動作，仲要同「電子利是」一樣整個 UX 贏所有人幾條街，我係其他對手就會心諗：「哇，你玩到咁，我好難同你鬥個喎！」。

今次 ZA 一如已往大玩 gamification，繼續搬佢哋 2 隻吉祥物出嚟，然後好似想當年麥當奴 (我係覺得「麥當奴」好睇過「麥當勞」的) 啲 Snoopy 公仔咁換晒各個國家嘅衫，每個造型都係一張「球隊卡」，玩遊戲贏咗除咗有球隊卡，張卡嘅背面仲係一個優惠咁咯。

我就真係唔係狂熱 fans 嚟嘅，唔知有無 patron 已經抽晒 32 隻呢？我知用 Snoopy 做比喻係好 old-school 的，潮嗰啲叫 NFT 嘛！不過 ZA 無話後面有個 blockchain 食住嘛！不過不過，都係儲公仔啫，真係有需要 NFT？

ZA 啲世界盃遊戲點玩嘅呢？

暫時望到「ZA 千萬獎賞在一盃」會有 4 個階段，熱身賽同外圍賽已經開始咗，照估踏入今晚 12 點就會開始分組賽喇！

暫時頭 2 個階段各自合共有 4 個遊戲玩，包括報到 (無嘢玩的，齋攞卡)、對戰問答、射波、連續作答，話好玩過食雞就絕對唔係，係啲公仔幾得意，又有卡抽吓咁都算 OK 啦。

ZA 個遊戲基建之強大，真係會嚇怕晒其他銀行咯

我諗個遊戲最 addictive 亦係最厲害之處係有好強嘅「社群元素」喺入面。

首先佢好似 candy crush 咁，你每日可以玩嘅次數其實好有限，唔服輸想玩多次咩？可以的，搵朋友幫手就可以了。

大家都儲唔齊球隊卡點算好？無問題，雖然唔係 NFT，但都是可以 share 的，仲要係用番以為 e-利是嗰個建基，實在太屈了吧。

想將啲優惠券送畀朋友，當然亦可以啦！係咪好 cute 先？

做得快，偶爾都有出錯啦

整個玩法我覺得係好 impressive 的，雖然偶爾都有出錯，例如以下呢個咁。

喂，係咪錯咗 logo？係燒肉男定燒肉谷吖？

仲有呢個，唔通係傳說中嘅漏洞營銷？

我覺得整體上就瑕不掩瑜嘅，對客戶嚟講，有遊戲玩又有卡仔儲又有啲 coupon 用吓 (啱用的話，例如 Cova 免費咖啡就當然啱用)，又唔使錢，好事吖！

對 ZA 嚟講，設計一隻自家遊戲，只要基建已經喺度，再做都唔係太難太貴嘅事，至於 coupon 咯，大部份都係要買滿幾百蚊先用得的，即係商戶都係賺住嚟畀折扣，即係唔會真係收 ZA marketing fee 啦，話唔定係 ZA 收番佢錢都唔定。

今晚開波，又睇吓第三階段遊戲好唔好玩喇。

關於華田：
兒時夢想做i-banker，結果做了bank worker，還要是retail那種。過去在各大小銀行不同部門流徙，叫人借錢、催人還錢、審批貸款、出股票app、出借錢app、出信用卡、廣告策劃、銷售管理、分行佈點、生物認證、電子排隊、機器學習、敏捷開發，到現在還未安定下來。不懂財經、不懂經濟，只想談一下「銀行」這回事。

2021 年開始 Medium 只會發佈部份文章，想知最新銀行 insider insight，就要訂閱我 Patreon(patreon.com/watin) 喇！

2021 年 8 月 Medium 再次改制，讀者可以選擇將一半既 Medium 會費撥繳至你喜歡既作者。如果你想喺 Medium 上面支持我，可以去以下呢條 link (watin.medium.com/membership)登記做會員哦！

華田銀行 FB: facebook.com/WatinResearch
華田銀行 IG: https://www.instagram.com/bank_of_watin/
華田銀行 HKET 專欄： https://wealth.hket.com/sraw116/華田銀行