[WTFtranslation]總集篇 <05> 我思，故我在。
唔好誤會，今次唔係講哲學。
<解題> [WTFtranslation]：係我一見到啲translation嘅質素，就大叫WTF，因而得名。
重溫吓通常啲人翻譯嘅時候衰咩？
1. 漢字直譯：日文漢字同中文漢字真係好唔同㗎喎 2. 唔查字典：上網查字典而家咁方便 以上兩種都算你懶，下面仲有啲真係wtf 3. 二次創作：我實在唔明，根本係兩種意思 4. 大陸式用語：香港出版漫畫serve香港人，先唔理呢點，一個香港人翻譯點可能用咁多大陸用語？（btw港式潮語係接受嘅） 5. 時空錯亂：例如古裝劇情有太多現代用語之類
總集篇第5回，主力講「存在主義」。
唔好誤會，同尼采呀齊克果佢哋冇關，而係講緊有好多譯者推崇嘅譯法，由日語翻譯成中文時，經常會出現嘅語病：「～的存在」。
日本語文常見以下Case嘅句子，日文學得唔好，中文又唔係好得去邊嘅所謂譯者，都會唔用腦直接將「存在」兩個字照搬，造成大量「存在主義」，久而久之，令人覺得呢種「存在主義」好撚文藝，做文青要學識用「～的存在」。但係其實係反映出條友本身中文同日文都麻麻，冇料又唔用腦思考原文意思。我通常見到譯者咁樣譯俾我，永不錄用。
有人話我之前淨係話人WTF，又唔講點解WTF，今次用實例加解說，希望唔會悶親人。
前設講完，睇吓出事Case：
★我々はそれが許された存在だ。 ｘ我們是被允許那樣做的存在。 ◯我們（這種生物）可以這樣（做）。 ◯人類容許如此。
原文漫畫係ＳＦ作品，探討人類行為與超能力者之間嘅矛盾。
「～された」受身被動直譯成「被允許」已經夠硬譯，後面以連體型「た＋存在だ」，變成「被允許的存在」，完全係累贅。
見到咁複雜嘅中文句子，令SF漫畫更加難以理解。譯者應該好好為讀者着想。
★一番ひどいのは、水の存在。 ｘ最麻煩的是，水的存在。 ◯最麻煩的是，有水。
唔記得呢幕講咩，大約係某個求生環境，水反而成為障礙。
原句明明好簡單，譯成「水的存在」變成哲學命題，又要令人諗多一重。簡簡單單直譯咪好囉。
以上兩個例子，咁簡單嘅句子都搞到咁鬼複雜，下面呢句咁長，仲唔譯到WTF咩。
★「念流」という能力を依頼する「犬」が異質の存在として… ｘ依賴「念流」這種能力的「狗」作為異質的存在… ◯依賴「念流」這種能力的「狗」， 是一種異類… 解釋吓先，作品入面「狗」係超能力者，而唔係真係動物。
首先，一見到狂用連體型［*1］嘅日文，仲要咁長，可以考慮譯做中文嗰陣，以分句處理，令原句表達嘅思路更加清晰。
唉，重溫吓小學生閱讀理解。 原句有兩個意思： 1. 「狗」依賴「念流」這種能力。 2. 「狗」是異類。 （異質兩個漢字照搬都抵屌啦）
日文以連體修飾，去連接一個主體嘅多重說明，係非常普遍嘅用法。但係中文唔同，一句句子一個主體，講一至兩件事已經好複雜，好難好似日文咁狂用「～た」「の」「な」「として」去連用，尤其當日文出現倒裝用法，譯者好多時一唔用腦（或者本身譯者真係冇腦）就會中伏照搬直譯。
講起「存在主義」，我覺得有個超錯嘅示範，就係漫畫《僕等がいた》，中文版譯成《我們的存在》。
就算唔係好識日文嘅人都可能有個疑問，「的」嘅日文唔係「の（讀no）」咩？「僕等がいた」冇個「の」字喎？即係話唔識日文都知道係錯嘅。 （當然，日文除咗「の」，有好多方式表現「的」嘅意思，例如係連體型用法。）
「が（讀ga）」呢個助詞，其中一個功能係表示「主語嘅狀態」，並冇「的」呢個用法。
當主語係「僕等（意思＝「我們」，讀Bokura）」，「いた（讀ita）」就係「我們」嘅狀態。 （咁簡單嘅嘢講出嚟好似好廢咁，但係文法就係咁樣，由簡單開始去理解。）
「いた」係動詞「居る（いる，讀iru）」嘅「た型」，可以係過去式，亦都可以係一種假設。
用英文去解可能會容易啲明。
僕等 が いた Ｗe were there
如果用英文睇，就更加會明白，譯成「我們的存在」，「～的存在」係錯誤演繹。
「いた」，係講緊「我們」嘅狀態，呢個狀態就係「（曾經）存在」。
成句嘅意思，可以好核突咁直譯做「我們在」、「我們以前在」。就算真係好想推廣「存在主義」，呢一句譯成「我們曾經存在」會更加適合。
有人反駁：「《我們的存在》好聽啲喎！」 定係你習慣咗咋？
習慣，係可怕嘅洗腦，譯者要比一般人更加清醒。
「存在主義」真係存在喺每個地方。 嗱，呢句就用多咗「存在」兩個字。 更簡單嘅講法，係「存在主義真係無處不在」。
係咪唔用得「存在」兩個字？
點會呢？成日用㗎喎，例如：
★頭毛的存在是我從來都志在 （《個頭痕唔痕呀》I Love U Boyz／作詞：I Love U Boyz）
★你的依賴所以我存在 （《心痛》陳潔儀／作詞：林秋離）
★八萬五已經唔存在喇 （董建華／作詞：董建華）
「存在」兩個字唔係唔用，而係唔應該濫用、誤用。點樣用、為咩而用任何字眼，都應該經過個腦去思考。
尤其喺日文，「存在」兩個字，好多時都係表示一個「狀態」，思考句子表達嘅意思再譯，先至係譯者嘅工作，唔好呃稿費。
下次喺用「存在」兩個字之前，可以諗吓係咪有其他講法，畢竟語言多變，唔係得單一嘅用法。
例如咁樣： ★你當我唔存在？ ⇨你當我冇到？ ⇨你當我唔喺度？ ⇨你當我食玻璃大嘅？
★外星人存唔存在？ ⇨有冇外星人㗎？
★唔存在呢個講法。 ⇨冇呢個講法。 ⇨冇人咁講。
★「公務員向制度、市民忠誠，唔存在向個人忠誠。」（公務員事務局前局長王永平言論） ⇨「公務員向制度、市民忠誠，並唔會向個人忠誠。」 ⇨「公務員忠誠於制度、市民，而唔係忠誠於個人。」
中文字研究達人（我話嘅）內木一郎提出過呢個SAMPLE，睇完我拍手：
ｘ這真是一個反面教材的存在。 ◯這簡直是反面教材。
不經不覺，呢種「存在主義」隨住劣質翻譯、錯誤使用滲入日常（例如「刷存在感」已經非常常用），使用「存在」之前，真係要諗一諗，唔好變成濫用。
過度單一使用某一個用語／用法，等如變相慢性消滅其他用語／用法。
［*1］連體型 日語語法。簡單講，就係將好L多嘢駁埋一齊落一句句子。 例如以「原型動詞+名詞」、「～ている＋名詞」、受身／過去式「～た＋名詞」、助詞「に」等等等等，就可以將句子不斷連接埋一齊，真係講到唔知喺邊度唞氣。
仲有好多連體用法，例如動詞連用型、形容詞連用型等等，都可以令句子無限地變長。
我啲文法還番晒俾阿SIR喇…
Originally published at www.plurk.com. June 1, 2011 14:03 Last edited 今日補刀。噗浪太偉大了。
重溫[WTFtranslation]系列：
總集篇<01>完。 總集篇<02>完。 總集篇<03>完。 總集篇<04>完。 總集篇<05>完。 唔知仲有冇得寫落去。 人已離開原本服務嘅幾間出版社，見少咗啲WTFtranslation，歡迎舊同事或同業提供案例。
重溫「翻譯筆記」系列：
「做出版嘅」系列
做出版嘅＜１＞藍紙 做出版嘅＜２＞找數 做出版嘅＜３＞書名 做出版嘅＜４＞原創 做出版嘅＜５＞書，唔係大嘅就好 做出版嘅＜６＞Omicron 做出版嘅＜７＞復刻香港六十年代依達文藝小說
睇書依正路，漢化睇壞腦
My Medium Record：(Update中) https://readmedium.com/my-medium-record-e1f290f9c470 越多嘢做越想寫嘢…［逃避中］
順手睇埋~
個人BLOGss~ ☆伊死的漫畫特區 （講漫畫、讚漫畫） ★嚟Plurk吹水 ☆開咗MeWe