《世界盃入門簡單問答(女生版)》

話說，四年一度嘅世界盃又嚟咧。嚟緊嗰幾星期，面書、新聞報導、辦公室茶水間、男女老幼、牛鬼蛇神嘅話題，都只會圍繞世界盃。我更加肯定每日新聞，世界盃賽果都排先過恒指升跌。

我抱住作育英才嘅心態，喺度以問答形式建議十項女生應該知道有關世界盃嘅嘢，等佢哋喺一班男同事／男同學當中，唔好無咗話題或者變咗無知婦孺。

【宏觀篇】

問（一）：其實乜嘢係「世界盃」？

答（一）：er………算罷啦，你問得出呢條題目，其實…… 算罷啦，睇第二啲文。Medium仲有好多好文章，唔使一定睇我寫嘢。

最簡單講，世界盃係每四年舉辦一次、32個國家派球隊去踢波、然後有31隊敗興而回嘅足球活動。其他嘅嘢，「老舉過年」啦。

諗真啲，如果你連世界盃都唔知係乜，「老舉過年」於你嚟講肯定等同火星文。「老舉過年」，即係算鳩數。時光寶貴，走啦～做其他嘢，或者去睇第二啲文章啦。

問（二）：就係唔識嘢先問，史兄你態度好啲得唔得？咁今屆世界盃幾時開始？踢到幾時？

答（二）：今年嘅世界盃決賽周由6月14日(星期四)開始，舉辦嘅國家為俄羅斯。

至於完結……踢到得出冠軍咪完囉，所有比賽都係咁嫁啦……其實決賽日期為7月15號，成個世界盃共踢64場比賽。

問（三）：啲比賽幾點踢？

答（三）：今屆賽事嘅時間，可謂滿足晒香港人嘅生活習慣，即使你凌晨1點瞓覺，都睇到過半賽事。

以下係全部64場嘅開賽時間分布：

晚上6點至8點：11場（完場時間大概加兩個鐘，即8點至10點） 晚上9點至11點：27場 晚上12點至凌晨2點：26場

有38場係11點前開波。當中最重要嘅決賽，係喺晚上11點開波，睇完食個宵返埋屋企，只係2點左右！

你話正唔正？對球迷就正！對佢哋嘅另一半，慘囉！足足守生寡守足一個月呀！

【規則篇】

問（四）：究竟乜嘢叫「越位」？

答（四）：如果你唔知乜嘢係「越位」，唔好問，亦唔好再嘗試去理解乜嘢叫「越位」。

信我。

唔好問，亦唔好再嘗試去理解乜嘢叫「越位」。

對好多人嚟講，「越位」比起量子力學、金鼎文、七大千禧年難題更加難以理解；而要一個識越位點解嘅男人，解畀一個唔識嘅女生聽乜嘢叫越位，更加係難中之難。你問佢，佢會依依哦哦、囉囉嗦嗦一大輪，就跳去結論：

「如果咁咁咁，咁咪越位囉。」

好多男人已經將判斷越位嘅能力殖入咗係基因度，唔會明白點解有人會唔明乜嘢係越位(正如成年人唔會問點解啲細路咁蠢，A-Z都背唔到)、更加唔識解釋畀女生聽，乜嘢係越位。除非……

四年前，你陪一大班朋友去睇世界盃，當中有個後來成為你男友嘅敗類。由世界盃開幕戰巴西對克羅地亞，到德國拎咗冠軍，每次中場嗰廿分鐘，條敗類為咗滾你上床，一直不厭其煩咁重複解釋畀你聽乜嘢叫越位。

嗰陣你以為自己識，咪係「A隊向前傳波嗰陣，佢嗰隊行得最前而又接到個波嘅嗰個球員，企咗喺B隊龍門同最後一個球員之間囉」（註）。

明唔明？即係A隊傳波嗰陣，企喺最前而又接到波嗰個，企咗係B隊龍門同一個球員中間。

講穿咗，你冇識過。德國捧盃嗰晚，你喺電視見住美斯好失落嘅表情。同你睇盃嘅敗類，明明話自己好失落，要人安慰，點知安安下同你上咗床。之後兩年，你就因為敗類一年到晚為咗英超、足總盃、西甲、國王盃、意甲、歐聯、歐霸、中超、NFL、NBA、世界黃金田徑賽而唔理你，仲要三更半夜都唔返屋企而嘈交、嘈交x4900萬次，成也風雲、敗也風雲，你哋最後都因為波而分手。

兩年又過去。就算你識過乜叫越位，都會隨住歲月過去、無再睇波而慢慢忘記咗。畢竟，越位並唔係踩單車同游水；即使你今屆以為自己識咗，過一排又會唔記得。越位已經連同你對嗰位敗類嘅記憶一同流逝。

而且，越位呢樣嘢搏大精深。現實世界嘅越位，花樣之多、情況之百變，可以獨立成書。國際足協(FIFA)喺2017/18嘅官方刊物“Laws of the Game”，有一個獨立嘅章節專講越位，書中最後有十四張圖講解解喺不同情況下是否越位。（連結在此）

我嘅建議係：你又唔係做球證，今世又做唔到足球員，越位呢啲嘢知嚟做乜春！簡單啲，你將越位同香港無真普選、殺人放火、起高鐵同樣歸類為錯事，作為一個普通女觀眾識到咁就已經非常足夠。總之，A 隊進攻嗰陣越位，個波就歸 B 隊，好唔好？反正世界盃只係四年一次，正如乜嘢金融海嘯，百年一遇（即假設人有一百歲壽命，平均一生只會遇到一次），識唔識越位又有乜所謂？知得咁深入嚟做乜春？

【註：呢個係越位最簡單嘅解釋。唔好嚟嘈我話我講得唔夠準確。】

問（五）：點解要整「越位」呢條規矩出嚟？哎呀，乜足球唔係鼓勵進攻、以入波多少嚟定勝負嫁咩，點解要定，嚟令進攻嘅一隊犯規？

答（五）：呢篇文以前嘅版本，我會解釋有個朋友解釋過，「越位嘅存在係為咗鼓勵進攻」。（連結）

慢慢我發覺，根本無得解。

只要記住，從球迷嘅角度出發，規例嘅存在，係as given，而唔係比你去挑戰或者懷疑。要挑戰都係挑戰乜嘢基本法下公民提名不合法、一撚日到黑呢個DQ嗰個DQ呢啲廢話。

再者，一問呢啲點解某種規例要存在嘅問題，你會陷入萬劫不復之地，好容易走火入魔。你會問點解打籃球無越位－真係有人問過我。我簡單答你：每一樣比賽，各種規例嘅組成，係涉及好多球賽動態、公平性、可觀性嘅考慮，係一個組合，唔係單單將一兩條規例單獨咁睇。

都係嗰句，「老舉過年」啦。

問（六）：咁有乜嘢足球嘅規例要識呢？

答（六）：千規律，萬規律，世盃規律僅一條：

總之邊隊入波多啲，邊隊就贏。

淨係識呢條就夠。如果你有機會睇波，坐喺你最愛嘅人隔離入波，靜靜哋坐喺隔離就夠。唔好講嘢，唔使講嘢，佢要啤酒你拎畀佢，佢唔開心你安慰佢。

唔係乜嘢父唔父權、男尊女卑，而係世界盃四年先得一次。無呃你，四年先一次。

一坐埋梳化，靜靜哋，知佢支持邊隊、認得波衫，嗰隊入波就尖叫，同男友high five；千祈唔好亂叫，對面入波又慶祝，咁你已經係個最好嘅伴侶。

【個人應用篇】

問（七）：今屆熱門係邊隊？

答（七）：如果你明第六題，你根本唔需要問。因為，

熱門，就係你老公或者男友支持嗰隊。

冷門，就係佢支持嗰隊嘅對家。

問（八）：我唔想認叻，只係唔想柒、避免令自己出醜，咁要知道啲乜？ 答（八）：記住以下嘅嘢－

－你伴侶支持邊隊、波衫乜顏色、左攻右定右攻左、隊中有乜球星 －今屆無意大利隊，無荷蘭隊 －世界盃係國家之間嘅比賽，無球會（即無曼聯、無皇馬、無巴塞等） －碧咸無踢世界盃好多年 －唔好一日到黑話邊個球員靚仔 －講波嘅阿叔已經過咗身好耐 －無一個足球員叫Step Curry －球賽係一場過，唔係三盤兩勝 －戴志偉同小志強，係漫畫人物，同 AV 動作片一樣，係假嘅（要睇去銅鑼灣某商場）。現實世界嘅日本隊，係強隊中嘅魚腩。

問（九）：老公／男友話要去睇波，有乜嘢唔好講？

答（九）：足球同金利來一樣，係男人嘅世界。一個月嘅賽程，踢64場波，每日兩場，作為球迷嘅老公／男友，幾乎日日都睇波。對住呢個掛住睇波嘅死佬，好容易火遮眼開佢波。

你需要嘅係冷靜，思考返你買衫嘅時候最憎人講乜做乜，你唔好做就得，所以千祈唔好講：

－「都唔知有乜嘢好睇」（講個「知」字時聲音高八度）

－「又睇？」（講個「睇」字時聲音高八度）

－「吓？做乜要出去睇波？屋企個Now都有得播喎。」（講個「吓」字時聲音高八度）

－「我一齊去睇得唔得？」

關於最後嗰句，我想講一個殘酷嘅事實畀你知：

你老公／男友寧願一個人喺外蒙嘅沙漠睇波，方原九千里內都冇半個識嘅人(甚至乎一個人都冇)，都唔想留喺屋企同理你一齊睇。

唔係佢愛唔愛你、想唔想你陪佢，定係你會唔會問一大堆無謂問題（例如乜嘢係越位），又或者睇波只在乎邊個靚仔、好大隻，而係男人睇波真係想一個人靜下，放鬆下。

不論係踢波定睇世界盃，都係件非常男性化嘅事。去酒吧睇波，除咗花生，橫飛嘅就只有粗口，特別係個「屌」字。而睇波現場出現得第二密嘅人物，就係「你老母」（最密係「球證」（例如「球證扯旗舉旗」、「球證畀牌」、球證吹雞））。

順帶一提，啲人講屌你老母，即使佢係對住你講，大部分情況下，佢都其實唔係真係想屌你老母。並非佢唔係話唔係想屌你老母咁簡單，而係佢根本無一個特定嘅老母想屌。再講深啲，佢根本唔係想「屌」同理「屌某個老母」。佢只係想發洩，想屌你老母啫… (屌你老母，越講越亂)

最重要係千祈唔好講呢句：

「你中意嗰隊都出咗局，仲有乜好睇？」

想分手或者離婚，講呢句就夠。效用快過食特快必理痛。

問（十）：真係最後一題，點解我老公可以夜晚睇波唔使瞓？佢聽日唔使返工嫁咩？

答：得閒留意下街口間診所、Know your community。星期四開始，會有好多要返工嘅男人病；啲男人會同醫生講自己肚痛、胃痛、唔舒服、嘔到仆街、頭痛到裂開（總之個醫生唔會檢查到）；

實情係嗰個病，

. . . . . . . . . . . 叫詐病。

其實，呢個問答只有女生版，沒有男生版。

哈哈哈哈哈。

最後送上今年賽程表：

今年史兄所得稿費，將全數用作支援魚蛋革命嘅義士。 https://medium.com/@relgitsjg

Facebook page：https://www.facebook.com/Relgitsjg IG (主要用嚟睇女仔) : https://www.instagram.com/iamuncleshit/