With home like Hong Kong, who needs haunted house？唔使去海洋公園啦，慳返。

哈囉喂唔使去海洋公園。留喺香港就得啦。

連萬聖節都要放催淚彈，打到社工穿頭，拉咗幾個。喂阿哥，你畀我抖下得唔得？

每日盡慶歡騰通宵至到達旦都唔可以。依家係做港女都唔得。

周末去太古廣場食飯？好奢侈，因為金鐘係爆大鑊重災區。我試過連續幾個星期，未上車，媽媽已經心急如焚咁打畀我，話「阿女！金鐘又出事啦！」過幾分鐘就金鐘封站，太古廣場落閘。其實我真係想試 dim sum library 咋，你班差佬唔好咁痴線啦。

去尖沙咀買支 YSL 唇膏刻名？唔好意思，一街之隔就放緊催淚彈， are you sure 你過得到去同走得到？我好想喺差佬封鎖線前用普通話大叫：「我是来消费的，你为啥不让我进去？我有的是钱！」結果我媽覺得佢個女太不修邊幅，要打扮下，幫我喺韓國買咗兩支六色唇膏。（港女開心之餘表示滾地：「都冇得刻名！」）

去食間樓上日本菜？唔好諗啦，有次係枱都訂埋，都冇得食。「唔好意思呀小姐，因為預計有危急情況，我哋今日唔開。」聽到呢句嗰陣係朝早十點，我喺床上硬生生被嬲醒。喂我想消費咋，三百 per person 一餐點都唔叫 no stake in the society 啦掛，依家就係因為你班差佬亂丟催淚彈，我連選擇餐廳的自由都冇。嗰間啲 lunch set 好好食㗎，唯一令人小失望係甜品個雪糕唔係自己整。

當正常生活都係奢侈，反抗就是義務。

作為香港人，六月至今已經失去好多自由，所以呢一輪成日提醒自己，要似返一個人。因為唔似返一個人，會好快唔記得抗爭的意義。點知經過下中環都可以中招。

你唔畀我過正常生活，我咪唯有抗爭。

逼上梁山，冇乜得揀。

星期六又要上街。

（不過萬聖節最可怕，係標誌住十一月一日，我學生八達通到期，要畀返正價。老啦。）