《技術文：邊個應該買年金？》

本文僅用作分享自己對年金嘅睇法，並非用作投資或不投資推介。本人不會透過此文章得到任何人士／公司任何形式嘅金錢或非金錢回報。

投資涉及風險，個人作出投資決定前，請作出適當風險評估，並請教專家或咨詢專業意見。再者，年金係保險嚟，叫人買／唔買保險，好似唔算投資。

本文已盡力確保計算準確，但並不作出任何保證。本人不會負責由於此文章所引起嘅任何投資損失。

政府推出年金。最重要問題及答案：邊個應該買？

【結論】

有兩類人一定要申請年金，係一定！！

第一類：夫妻皆健在或未離異 －兩人皆65歲以上、75歲下 －兩人身體大致健康 －合共資產不高於$250萬（唔包括自己住緊嘅第一層樓） －無其他固定收入（如長俸） －唔介意填多張表拎「長者生活津貼」（簡稱「長生津」） －名義回報率：7.5–8.9%（拎20年年金）／9.1–10.3%（拎30年）

第二類：個人申請（未婚、婚後離異／其中一方死方） －65歲以上、75歲下 －身體大致健康 －資產不高於$130萬（唔包括住自己緊嘅第一層樓） －無其他固定收入（如長俸） －唔介意填多張表拎「長生津」 －名義回報率：7.1%-9.2%（拎20年年金）／8.7–10.6%（拎30年）

至於其他人，可以慳返唔使諗。

【解釋】

（你只在乎結果嘅話，可直接跳到最後「你要做啲乜」）

第一種絕對唔好買嘅人：窮人

如果你資產夾埋得唔夠$100萬，或者再窮啲，朝不保夕，而家連三餐都搞唔掂，仲買乜春年金、諗咁做乜？你根本無未來可以講呀！（又或者你本身已經拎到長生津，你唔應該有多餘錢買年金）

第二種絕對唔好買嘅人：年齡偏高、身體唔健康

年金係一種保險。顧名思義，保險係為咗你有意外嗰陣提供保障；而年金嘅作用係幫你抵擋太長命呢種意外－太長命嘅話你後生嗰陣儲嘅錢未必夠用。年金會每個月畀些少錢你減低呢種下行風險。（吐一下槽：你話做人幾撚慘，長命居然係種意外同下行風險）

你已退咗休，又有比較大嘅長命風險，就可能要考慮買年金。

反之，如果你預計自己活得唔耐－已經過75歲、本身有長期病患，係絕對唔建議你去買年金。

第三種絕對唔好買嘅人：（自問）投資好叻嘅人

單獨以年金計算，你畀$100萬出嚟，每年拎$63,600（女）／$69,600（男），回報唔係6%-7%－記住嗰$100萬喺你死後係拎唔返。

按拎年金年期計算，以下係年金回報率：

你睇下，拎足20年，回報率先得2.4%（女）同3.4%（男），低到可憐。

呢個回報仲要係名義回報率，即係未扣通脹。倒轉嚟講，如果未來20年嘅平均通脹係3.4%，回報率係0%。

即使你好叻豬拎到30年（65歲拎到95歲），回報都只係升到4.8%（女）同5.6%（男），都唔可以話好吸引。

單純以年金計劃睇，個計劃毫不吸引。

如果你自問投資好叻，又深信到80–90歲未死都仲可以喺股市打滾，個年金計劃對你都係廢嘅。

──

點解要喺資產$115萬-$133萬（個人）／$222-$250萬（夫妻）先好申請年金？

.

－政府有一個叫「長者生活津貼嘅計劃」，簡稱「長生津」。

• 乎合「長生津」資格嘅長者，每個月可以無條件拎$2,600（普通長生津）或$3,600（高額長生津）
• 長生津有資產同入息限額，都幾低下。

政府表示，放入年金嘅錢（假設$100萬）並唔包喺長生津嘅資產計算，而年金每月收入就計入入息！

即係點？如果一個65歲嘅女人有$130萬資產，冇任何長俸：

－未有年金前佢申請唔到長生津($100萬超出資產限額@$334,000)，佢呢舊資產嘅回報率就視乎佢投資組合同大市（畀盡你每年5%）；

－推出年金後，佢可以買$100萬年金，每月拎$5,300；跟住剩低嘅資產得返$30萬，夠資格去拎長生津(<$334,000)，每個月長生津派$2,600。即一個月拎$7,900，比起淨拎年金多咗接近50%。

－記住，呢個做法係合法嘅！政府有關年金嘅FAQ，正正有一條講呢樣年金+長生津嘅組合：

－假設通脹0%。以回報率計算，呢個組合（年金+長生津）嘅回報如下：

好恐怖呀！同樣拎20年，女人嘅回報係7.1%，男人係7.9%！呢個回報率非常非常吸引！較淨年金組合嘅2.4%同3.4%多出～4.5百分點嘅回報。

記住呢個係guarantee return，除非香港政府破產同埋你太早死，否則7.1%-7.9%係一定有。痴線嫁！我冇見過有任何投資計劃可以有7%+嘅保證回報！！！無可能唔參加！

更重要係，以上呢個年金+長生津係最基本嘅回報……

【重點1. 長生津每年會根據通脹調整。好重要！】

－長生津根據每年通脹調整。假設為3%，長生津將由第1年$2,600上升至第20年嘅$4,696。呢個年金及長生津組合，單人回報更會上升至8.4%（女）／9.1%（女）（20年計）。平均8%嘅回報率，更加吸引！如果你有信心自己好長命，拎到30年，回報率去到10%+！

【重點2. 資產更少，申請高額長生津】

－如果資產更少，得115萬（個人）、222萬（夫妻），申請$100萬年金，夠資格申請高額長生津，每個月係$3,485（普通長生津係$2,600）。

－如果假設通脹係0%，年金+高額長生津單人回報更會上升至8.5%／9.2%（20年計）。

－如果假設通脹係3%，年金+高額長生津單人回報更會上升至10.1%／10.8%（20年計）。

【重點3. 本身住緊一層私樓？】

－如果父母有層私樓，一家三口住緊，可以考慮轉畀個仔／個女，申請年金、長生津之後，父母再去申請埋公屋！到時有間公屋，用嚟養老都好！

－假設公屋嘅隱藏資助係等同長生津嘅金額（即$2,600。呢個假設算保守，真實嘅隱藏資助應該更高－公屋嘅租大概係市租20%）。通脹3%下，年金+普通長生津+公屋嘅回報會上升至13.1%／13.7%（20年計）。扣返私樓轉名啲雜費，依然超級着數。邊有計劃可以畀到每年13%以上嘅保證回報你？

成個套餐，回報高、無市場風險，惟一風險係唔好彩太早死（真係慘，未買年金就怕太長命；買咗就怕太早死）。即使你唔好彩，只係拎到15年（由65歲拎到80歲），有長生津之下個回報都有6%+。保證回報，依然唔太失禮：

【你要做啲乜？】

正所謂，「買年金，買到盡」，政府福利，唔係叫你呃叫你偷，光明正大，合法咁去申請，一毫子都唔好蝕！

－要投資、先求知：先理解年金同長生津嘅細節同指引。

年金計劃：https://www.hkmca.hk/chi/our_business/hkmc_annuity_plan.html 長生津計劃： https://www.swd.gov.hk/oala/#s4

－即刻叫你老竇老母計清楚自己嘅總資產，如果喺大約喺130萬（夫母離異或其中一人過身）／250萬（夫妻二人），可以考慮申唔申請；如果超標太多，夠錢使，唔使考慮，all skip；

－如果資產過咗些少，可以考慮將資產「贈送」予子女；

－如果父母有長俸或其他穩定每月收入，請確保有年金後，收入唔超過長生津嘅限額；

－要說服父母申請年金之時，必定要申請埋長生津。唔申請長生津，一定唔好申請年金。

呢個計劃年金+長生津combo，完全係為咗照顧啲未到超窮（資產100萬以上冇公屋冇長生津）但又擔心太長命唔夠錢嘅人。唔好理佢係保險定投資計劃，你只係需要知值唔值得投資。上面話咗你知，如果你爸爸媽媽有一兩百萬，呢個計劃真係千載難逢，比起iBond更加着數1000000倍。各位呀！再講多次：

政府福利，唔係叫你呃叫你偷，光明正大，合法咁去申請，一毫子都唔好蝕！

技術附註： －所有數字係用年度數字計算（並非每月計算） －男士$100萬年金每月收$5800、女士收$5300 －$100萬年金喺period 0支付、第一年嘅年金喺period 1收取 －假設由65歲開始拎年金；公屋即申請即有－呢點會影響令公屋套餐個回報高估咗些少（因為公屋要排四年），但唔影響大局。

今年史兄所得稿費，將全數用作支援魚蛋革命嘅義士。 https://medium.com/@relgitsjg

Facebook page：https://www.facebook.com/Relgitsjg IG (主要用嚟睇女仔) : https://www.instagram.com/iamuncleshit/