《畀你揀做任何日本漫畫嘅角色，你會做邊個？（上）》

有日去去下廁所諗起呢個問題，思考咗幾個月尋找自己嘅答案。

睇咗漫畫三十幾年，好少發白日夢幻想自己成為某個動漫角色，反而做成人電影男主角就有諗過（通常喺射之前有呢種諗法）。發覺好似好多選擇、諗真啲又好似好少，於是根據自己嘅性格同喜好，設定幾個篩選準則：

— 範圍：只包括我睇過嘅日本漫畫，起碼有印象而並非為寫呢篇文而新入坑（日漫清單喺文章最尾）。盡量以該角色身處嘅世界去衡量（例如揀路飛就用《海賊王》世界嚟評論），並非現實世界、或任何特定嘅漫畫世界（例如用火影世界嚟衡量所有角色）。

— 角色：起碼有一定劇情同戲份，用嚟說服自己同讀者呢個人符合準則。

— 經歷：角色大致不勞而獲。「而獲」即係有一定才能或成就、「不勞」係指唔使練功、捱苦、受難，唔需要犠牲親友，唔使經歷太多風浪同起跌。當然可以有一定付出，但相應回報一定要勁大。

— 有錢：最好有錢，儘管錢喺漫畫世界多數冇用。

— 女色：有女色親近，女多最好，起碼有女友或老婆。

— 長命：長命啲，或死得痛快，一嘢就死。

四個準則，「經歷」最重要，「有錢」次之，「女色」又低啲，「長命」重要性最低。「不勞而獲」遠比「做餐死但有錢」優勝，「有錢有女長命」，遠不及「經歷合符心水」；如果喺「有錢」同「有女」之間揀，點都揀有錢。撇開有錢就會有女呢個因果，有錢本身都好過有女。長唔長命都冇乜所謂，最好死嗰陣痛快啲，我絕對唔要做《進擊的巨人》嘅兵長里維，成本漫畫一直係武力 №1 最後落得坐輪椅嘅下場。

────────────

根據以上準則，已經能歸納出以下宏觀結論：

— 可以撇除幾乎全部主角。冇乜邊個主角可以不勞而獲，冇咩付出同犧牲……除咗入選嗰一兩個。《頭文字D》藤原拓海算唔錯，一出場已係頂級高手，輸嗰一次純粹因為架車同引擎太舊，但佢窮又冇女，更慘係中意條女去做雞（而自己又冇份插佢）。我唔識講，以後一講起拓海，少部份人會記得坑渠蓋飄移轉彎，但超多人會記得「三萬蚊，過夜」。咁點搞啊？

— 入選角色會較大機會來自運動漫畫。呢類漫畫通常唔使死人冧樓（如《足球小將》、《男兒當入樽》），角色所要付出嘅努力同犧牲亦冇格鬥類漫畫咁多咁大。受傷一樣有，《網球王子》甚至出現球員畀對手用網球從球場轟向觀眾席嘅情況，但冇手冇腳、腰斬頭斷呢啲情況的確少好多。

— 幾乎冇女角。我冇睇過女同性戀日漫，上面其中一項準則要「多女」，咁好大程度已經篩走晒啲女角。

—角色唔使係全漫畫最好打、唔使靚仔。最好打嘅結果就係不斷畀人挑戰畀人打，家無寧日，無得優哉悠哉、無不勞而獲，你睇下孫悟空！得閒就要用新型態出嚟升級進化對付新敵人。邊有人會去挑戰阿樂？另外，靚仔喺漫畫世界冇咩大作用。

────────────

【Honorable mention】

以下係考慮過但冇入選嘅角色。

— 五条悟，《咒術迴戰》。考慮原因：現代最強咒術師，漫畫戰力 №1，同第二名差距相距十個太平洋（第二係……夏油傑？宿儺？）。五条悟代表咗整套《咒術迴戰》，實力霸道，即使我話戰力唔係重要準則，但佢真係太勁，勁到憑戰力列入考慮行列。最終冇入選嘅原因係經歷極為悲慘：唯一一個好朋友諗歪咗變節做叛徒出賣友軍，自己要親手殺死對方，一定有 PTSD；朋友條屍畀奸角利用上咗身作奸犯科，二次傷害。好多人會認為五条悟最大問題係無端端被腰斬，但我覺得以上面嘅準則嚟講，死得乾脆，問題不大，小事一樁、小事一樁。

— 泰萊，《足球小將》，男三（男一為戴志偉、男二為小志強）。優點為靚仔（雖然同松山、三杉淳一樣樣）。喺漫畫中長期隨老竇周遊列國，好似唔使點返學，爽；缺點係喺「世青篇」被車撞斷腳，又傷又痛，有幾場波有傷都要被迫出場，仲要被迫出雙人射球而再傷。阿爸職業係藝術家，應該好窮（但又可以周遊列國去畫畫，我判斷唔到係有錢定窮）。另外，作者高橋陽一對泰萊好差，好多角色都有獨門絕招，唯獨係男三泰萊乜都冇，要去到「世青篇」中段先有招極騎呢嘅「迴力鏢射球」。泰萊整個經歷同佢球技一樣，平平均均，比上不足比下有餘，冇咩超突出亮點。

《足球小將》男一戴志偉唔係話經歷好定唔好，而係我除咗踢波以外對佢一無所知；男二小志強屋企好撚窮，一屋幾十口、父母兄妹等佢養（農業時代啲家庭結構咁），我唔制。

— 孟波，《城市獵人》。鎗法神準，但窮，要接 freelance維生。日日喊打喊殺，敵人動輒用鎗用飛機大炮，性命堪輿。身邊不乏女伴但從嚟食唔到，要倒扣分。

— 兵長里維，《進擊的巨人》。考慮過嘅唯一原因：漫畫戰力 №1，同第二名差距相隔一個太平洋（第二應該係米卡莎？）。最強人類，堪稱人類界中嘅巨人。唔揀嘅原因係佢生得矮，同埋結局變咗殘廢要人照顧。對於一個咁好打、機動力咁高嘅人嚟講，要佢下半生坐喺輪椅，超級難受，慘過死。仲有，同佢同期啲好友艾爾文、漢吉，里維班同調查兵團手下全部死晒，下半世應該好寂寞。

— 一輝，《聖鬥士星矢》。五小強之一，實力強橫，型棍子，性格高傲、唔中意聯群結隊，我行我素，孤癖成性。極少出場但受歡迎。鳳凰座聖衣為不死，不過即係代表要成日被打到粉碎先有得復活。某程度上似《七大罪》中嘅班，好打過班，不過班係佢個人不死（一輝只係套聖衣不死）；更重要係，班有條女，而一輝曖昧對象艾斯美達一早死咗。留意，只係曖昧對象，一輝連扑都冇扑過艾斯美達，條女就畀自己師傅殺撚咗！艾斯美達仲係師傅個女嚟，難怪一輝咁憤世嫉俗。最慘係一輝無時無刻要準備做弟弟阿瞬嘅召喚獸，好似醫生咁24時 on call，好忙又冇津貼，慘過自己出去打。

— 木葉丸（富二代）、卡卡西，《火影忍者》。木葉丸係火忍村名門望族嘅後代，有權有勢有錢，鳴人個仔又係佢徒弟，不過木葉丸冇咩劇情同經歷可言。卡卡西背景同《咒術迴戰》嘅五条悟極相似，不過卡卡西並唔係《火影忍者》嘅戰力天花。卡卡西老竇因為同伴而放棄任務，倒頭來畀人排擠同責難，最後自殺身亡；卡卡西兒時同伴帶土成為叛徒，挑起忍界大戰。卡卡西應該患有重症 PTSD。我唔制。

— 夜神月，《死亡筆記》。漫畫男一。喺漫畫世界中擁有最偉大魔法書「死亡筆記」，但宅心仁厚嘅夜神月並無用嚟貪圖私利，反而用筆記嚟執行自己正義。你可以話呢種手法係人治、犯法，夜神月的確係殺人犯、用錯方法，但冇人可以否定夜神月擁有強烈嘅正義心同正義感。即使佢殺咗 L，成為新世界嘅神，佢依然冇用筆記嚟自肥（當然其他人嘅崇拜，的確有助長夜神嘅行為，但呢樣嘢同佢利用筆記嚟貪圖私利兩回事嚟）。我一直覺得夜神月咁做完全無問題，問題係佢死後或筆記落入他人手，喺欠缺權力制衡下，承繼人能否繼續秉持正義同公平，能否抵得住引誘 — 但呢個係本筆記邊個執到嘅問題，唔係夜神月嘅問題，冇夜神月呢啲問題一樣會出現。

我覺得，如果我執到死亡筆記，依然可以好似夜神月咁對付啲人渣，好型、好正義、好偉大，really doing a public good to the society。

不過，為咗執行自己嘅正義、避免自己被捕，夜神月要犧牲老竇。雖然我現實世界嘅老竇以前對我好差，但你叫我為咗世界和平而犧牲佢，呢個取捨好難做；更何況，《死亡筆記》夜神月個老竇人品不錯，唔係死黑警。我最終都可能學夜神月咁，但有得揀最好唔揀做夜神月。最後，夜神月為執行自己嘅正義，冇埋條命，女都冇扑過。夜神月好接近入選，不過我最終都冇選到佢。

────────────

【 最終入選十強名單】

排名分先後，第十名先。

第十名：班，《七大罪》

主要配角，不死身。

排第十名咁後，解釋寫得簡潔啲。入選原因係能力「不死之身」，不死不老，勁爽。

但諗真啲作者為表達「不死之身」呢種能力，角色通常死完又復活、復活又再死過，無限輪迴，並非好受嘅經歷。事實上班都死過幾次，另外《一拳超人》殭屍男都係死完又復活。再者，為維持雙方勢力平衡，若角色擁有「不死之身」，作者往往將角色整到半死不活，困喺密封環境，無法逃脫，要佢不斷感受被困嘅痛苦—《七大罪》嘅班曾受困於煉獄二千年。另外，《給不滅的你》主角不死亦曾受困於鐡球中一段日子、《火影忍者》飛段被困於地底洞穴中、戶愚呂兄被藏馬迷惑於幻覺中無法自拔。

班性格豪邁，後尾用「不死之身」交換到妖精女友「伊蓮恩」嘅復活，仲生埋仔，側面證明班同妖精可以扑嘢。雖然冇咗不死身呢個咁偉大嘅能力，但經歷咗咁多年嘅訓練，班喺身體同意志上同不死身冇咩大分別，純粹變成普通人咁會老化、會死。

漫畫中，忠嘅角色擁有「不死之身」、「長命千歲」通常係咀咒多於祝福。目送朋友、同伴一個個離開，自己則太長命，太辛苦。最終必變成芙莉蓮咁，對感情極度壓抑，諗諗下都唔太好。

────────────

第九名：魯迪烏斯，《無職轉生：到了異世界就拿出真本事》

男主角。

入選十個角色中，運氣值最高：轉生到異世界後保留咗前世嘅智力、憑年幼時開始訓練魔法而獲得「無詠唱魔法」嘅能力、遇上好師傅雙親同伴、被老竇送去貴族做家教識到第一個女友仲學咗好多語言後尾仲食埋女友隻豬、尋找師傅途中又巴結到皇族七王子、無端端從魔界大帝奇希莉獲得魔眼、周圍識到女伴、免費讀到一流大學。 比喺香港排到新公屋仲好。

整體嚟講，憑藉頂級運氣，魯迪烏斯實力超班，勁多女伴，又有貴人相助，同行戰士多為高手，周遊列國幾乎冇遇上任何危機（除咗差啲畀龍神殺死），除咗要體力勞動靠腳行路，魯迪烏斯喺動畫冇付出過代價同犧牲而獲得極大名氣同成就。

不過，魯迪烏斯喺異世界家境一般，冇咩錢，當初畀人送去做家教都係為咗賺學費，後尾要靠奬學金先可以去大學旁聽，冒險嗰陣又試過冇盤川而做啲濕鳩任務搵錢。即使多女伴，又食咗女友艾麗斯隻豬，但艾麗斯不辭而別後，魯迪烏斯有個好嚴重嘅缺憾，就係不舉。不舉仲慘過無女，運氣再高、再好揪、經歷再好、再有錢，通通冇撚用。

真係冇撚用啊屌你。

魯迪烏斯暫時只排第九，主要因為動畫未去到結局，佢未來嘅經歷如何，係更好定更差，仍有待觀察。如果之後醫好不舉，又享齊人之福，排名肯定大幅上升。

────────────

第八名：我妻善逸，《鬼滅之刃》

主要配角，男二，咸濕仔。

入選原因，有二：第一，整部漫畫猴住好朋友炭治郎個妹彌豆子，最終又畀佢猴到，結埋婚生埋仔。第二，拜於前任鳴柱門下，只學識一招「雷之呼吸 壹之型 霹靂一閃」，憑住未來成為主角炭治郎妹夫嘅裙帶關係同光環，以極低嘅地位經歷連場大戰依然屹立不倒，戰至最後一個大佬、「鬼化炭治郎」。經歷算圓滿。

我妻善逸武力、智慧唔算高，但喺師傅已死嘅情況下發明「雷之呼吸 柒之型 火雷神」，殺死新上弦之六、前師兄獪岳。《鬼滅之刃》中，只有時透無一郎同我妻善逸能單人匹馬殺死上弦，雖然獪岳明顯係臨時拉夫，實力同其他真正上弦有距離，但咁樣側寫，又新招、又殺柱，已經將我妻善逸提升至高手、半柱級水平。

點解我妻善逸排名唔可以高啲，因為樣衰、猥鎖、咸濕、無義氣、連戰友個妹都唔放過，仲有喺無限城之戰前膽怯懦弱，性格毫不吸引。即係有啲角色明明係主角群之一，戲份唔差，但性格唔討好，你從來唔會中意佢，例如《神龍之詸》嘅何布、《One Piece》嘅騙人布。

────────────

第一至第六名，請看下回分解。

────────────

睇過嘅日漫清單（ “Selected”者為只睇過部份章節），以閱讀先後分類：

— 童年、少年時期(2000年或之前)：七龍珠、聖鬥士星矢、北斗之拳、男兒當入樽、神龍之謎、足球小將、幽遊白書、IQ博士、橙路(selected)、叮噹(selected)、金田一之少年事件簿(selected)、飄流教室、電影少女、魁！！男塾、蠟筆小新、相聚一刻、城市獵人、Boy聖子到、霸王傳說、去吧！稻中兵團、龍狼傳（屌你睇唔晒）

— 壯年(2000–2010年)：火影忍者、One Piece、網球王子、我的英雄學院、死亡筆記、全職獵人、廿世紀少年、PLUTO、火鳳燎原、賭搏默示錄、Liar Game、欺詐獵人、One out、頭文字D、Real、殺戮都市Gantz

— 近年（部份連載中）：一拳超人、東京喰種、鏈鋸人、炎炎消防隊、新世紀福音戰士、七大罪、達爾文遊戲、進擊的巨人、JoJo（頭五部）、鬼滅之刃、咒術迴戰、銀魂(selected)、齊木楠雄的災難(selected)、東京復仇者(selected)、拳願阿修羅、終末女武神、無職轉生：到了異世界就拿出真本事、葬送的芙莉蓮、給不滅的你、86、白金終局、Dr Stone、國王排名、殭屍100：在成為殭屍前要做的100件事、Spy X Family、狂賭之淵、爆漫王、我推的孩子

────────────

如果你純粹為睇我文章而訂 Medium嘅，想做會員或就嚟續期的話，請去 Patreon。https://www.patreon.com/UncleShit

未到時間續，或唔想改去 Patreon亦無問題，喺短時間內我會繼續喺 Medium登一樣嘅文章。

我會喺 2024年年中左右，徹底放棄 Medium，不再喺度發佈新文章。

如果你繼續係 Medium會員，麻煩你睇任何人嘅文章嗰陣，按夠 50下拍手，唔難為你就留個言。記得就幫下手，反正你又唔使出多啲錢。