UK Life | 英國養車一年要使幾錢？
有車使錢買方便，無車慳錢唔方便
喺英國由 2021 年 8 月買車到而家，已有兩年幾駕車經驗，做咗車主好一陣子，輕微撞車同整車經驗值都儲咗啲，呢篇文同大家分享下我養架車一年要使幾錢，究竟喺英國唔養車搭交通工具係咪會划算啲。
先列下基本使費﹕
- 買車
- 保險
- 路稅 (vehicle tax)
- 車檢 (MOT)
- 油錢
- 泊車
- 整車
- 雜費 (洗車、汽車保養用品等)
基本上養車就係以上種種，其中保險、路稅、車檢呢 3 樣係無得慳，一年一次，是但爭一樣都係違法。其他如油錢、泊車、整車、雜費，係有機會可以盡量慳嘅，但都係有限數。
至於買車，當然係自己睇餸食飯，我部車唔算貴，以年份同里數嚟計，可能算抵，但仲有無再平啲嘅車？一定有，只要接受到殘啲舊啲，問題係平車有可能好多毛病，整車條數又喺返度，我有個朋友就用 3 千幾鎊買咗架車，但 5 個月後架車就死咗要拎去劏，然後再拎多 5 千幾鎊買另一車，兩條數加埋都成 9 千鎊，如果當初用 9 千鎊買架二手車，又可能買到架更新、性能更好嘅。另外亦識得兩個人買完架二手車無耐就撞咗，total loss，保險會賠俾你都好，下年保費一定大增，亦要再買多架車，有時都時也命也，奉勸新牌仔或雪藏牌唔好買太貴嘅車，但太平嘅都要小心，否則整車、換車條數都一樣喺返度。
我架車當年就 £5200，2010 年車，即 11 年車齡，行咗 40000 里。
2023 年養車使費
車價
嚟到第三年，同一架車，無換過車，所以無買車錢。
我希望架車玩到幾耐就幾耐，我唔介意佢又殘又舊又周身傷痕，呢啲都係我哋一起走過的日子，只要性能 ok，仲安全駕駛到，我想同佢同行多三五七年。
保險、路稅、車檢
保險: £1195.27 (2023)
路稅: £240 (2023)
車檢: £115 (2023)
以上 3 項走唔甩又無乜得慳嘅必然年度使費，合共 £1550.27，一年一次，皮幾嘢係梗局，如果除返開 12 個月，即每月平均 £130 左右。
路稅基本上你唔換車的話，年年差不多，我就 3 年嚟都係俾同一個金額。 保險係最大筆錢，唔同公司唔同 plan 都可以爭好遠，格價網可以幫到手。 車檢就一般約 £40-£50，我今手搵咗一間只收 £35，算平，不過因為我要每兩條軚，每條二手軚 £40，所以最後埋數要 £115，已比舊年嗰間要我俾五百幾鎊整好多嘢好。
油錢
油錢又點？
- 1 月油錢: 154.82 (入咗 4 次: 59.47 + 29.35 + 13.82 +52.18)
- 2 月油錢: 155.37 (入咗 4 次: 21.83 + 36.60 + 56.12 + 40.82)
- 3 月油錢: £145.84 (入咗 3 次: £49.14 + £52.61 + £44.09)
- 4 月油錢: £178.20 (入咗 4 次: £39.07 + £32.74 + £54.67 + £51.72)
- 5 月油錢: £99.65 (入咗 2 次: £45.14 + £54.51) << 返咗香港
- 6 月油錢: £201.24 (入咗 4 次: £54.02 + £57.06 + £41.15 + £49.01)
- 7 月油錢: £158.64 (入咗 3 次: £58.22 + £56.69 + £43.73)
- 8 月油錢: £214.17 (入咗 4 次: £50.09 + £47.99 + £57.76 + £58.33) << 落過 Solihull
- 9 月油錢: £187.42 (入咗 3 次: £62.28 + £62.36 + £62.78)
- 10 月油錢: £158.51 (入咗 3 次: £51.30 + £42.64 + £64.57)
- 11 月油錢: £238.41 (入咗 4 次: £59.42 + £59.18 + £63.81 + £56) << 去過 Cheshire
- 12 月油錢: 估計約 £180 — £200，因為又落 Solihull，再加聖誕會去 Southampton
真係唔埋下數都唔知流幾多血，平均每月油錢要 £150，一年大概要 £1800。油價同舊年話打仗高峰期比其實已回落咗好多，但同前年比一樣係貴咗，加上返工路程遠咗，每日會用多咗油，加上「雙城戀」成日遊走兩城之間，亦使多咗油錢。
油錢: 約 £1800 (2023)
泊車
泊車同香港比又應該叫平好多，至少住 House 架車可以泊喺屋前，返工亦有公司免費停車場，去超巿買嘢啲停車場亦係免費嘅，呢方便真係惠及小巿民。
但都總有時候要俾錢泊車，出去巿中心行街、約朋友出去食飯等等，出街泊車錢一 £3— £20 不等，睇下泊咩場，睇下泊幾多個鐘，露天一定平啲，「錢七」一架，日曬雨淋都唔係咩大問題，但有時係怕治安唔好，如果太過靜同雜嘅區，扑車偷嘢或偷車都有可能發生。我兩種停車場都會泊，視乎要地點邊度就近，尤其我一個女人去拎車，泊太遠太靜太黑嘅地方都危險就無謂啦！但要慳錢，如果附近有露天場又唔太靜嘅，我都會泊露天。
由 1- 11 月，2023 年泊車錢用咗 £108.8，呢個數同香港泊車比真係唔算啲乜啦！但又咁講，我又唔係成日出巿中心逛街嘅，基本上無約會都唔出巿中心。
泊車: 約 £110 (2023)
整車、雜費
今年好似無整車，全部都係搵工程師好友幫手，但都要俾錢買下要換嘅側鏡、車身兩邊指示燈、噴油等等。
我架車都係一年一次 MOT 驗車時有嘢要執就執執，今年架車撞花咗幾次我都無再去整喇。但第一年「黑冰意外」撞車就整咗 £850，小修小補就二、三百鎊走唔甩，但我為咗慳錢，已無再花錢整車。
其他仲有咩雜費要使呢？其實又濕濕碎碎都好多喎……
加計油、洗車窗水、融冰液、裝車 cam、車擋 (太陽擋 / 雪擋)、藍芽轉插、洗車、電話座、dog seat......
有啲嘢係買一次就完，有啲嘢就要不斷補充，雜費我會當一年要使一百鎊左右。
整車加雜費，我無逐條數搵返嚟計，但今年加加埋埋，粗略估計應該用咗約 £300。
整車、雜費: 約 £300 (2023)
終極埋數，養車幾錢？
- 買車: £0
- 保險: £1195.27
- 路稅: £240
- 車檢: £115
- 油錢: £1800
- 泊車: £110
- 整車: £0
- 雜費: £300
總數，2023 年我養住架「血汗寶馬」一共要使 £3760.27。
平均每月都要 £313，應該同香港比，三千幾蚊可以養到架車都叫好平，但喺英國生活計，呢個支出都算大嘅。之但係，有車真係好方便，每日返工會慳返搭垃圾交通工具時間，可以快一倍﹔去超巿入貨可以一次過入多啲，唔使孭住背囊行返屋企﹔天寒地凍喺街度步行或等車都係好虐待，特別係呢度成日落雨，冬天又十分凍。
以上種種，令我依然覺得養車係值得嘅。
埋嚟睇，埋嚟揀！CLAP多 49下！
多謝大家睇到最後，Medium 改制後，以「拍手」同「留言」去計算俾作者嘅稿費，如果篇文唔差，請幫忙多多拍手，可以拍足 50 下！
以下目錄係介紹呢期最新文章同推介其他舊文，歡迎嚟慢慢坐、慢慢睇。